വാട്‌സാപ്പ് സന്ദേശം വഴി ശ്രീറാം വെങ്കിട്ടരാമന്‍ തന്നെ വിളിച്ചുവരുത്തുകയായിരുന്നെന്ന് ഒപ്പമുണ്ടായിരുന്ന വഫ ഫിറോസ് പോലീസിനു മൊഴി നല്‍കി. കാറുമായി വരാന്‍ ശ്രീറാം ആവശ്യപ്പെട്ടതിന്റെ അടിസ്ഥാനത്തിലാണ് രാത്രിയില്‍ വഫ എത്തിയത്. തന്റെ പേരിലുള്ള കെ.എല്‍. 01ബിഎം 360 എന്ന കാര്‍ അപകടത്തില്‍പ്പെടുമ്പോള്‍ ശ്രീറാം ആണ് ഓടിച്ചിരുന്നതെന്നും അവര്‍ കന്റോണ്‍മെന്റ് പോലീസിന് മൊഴി നല്‍കി.

അമിതവേഗത്തിലെത്തിയ ഈ കാറിടിച്ചാണ് മാധ്യമപ്രവര്‍ത്തകനായ ബഷീര്‍ മരിച്ചത്. കവടിയാറില്‍ എത്താനാണ് തന്നോട് ശ്രീറാം ആവശ്യപ്പെട്ടത്. അവിടെനിന്ന് വഴുതക്കാടുള്ള ഒരു ക്ലബ്ബില്‍ കാറുമായി എത്തി. ശ്രീറാം നല്ലരീതിയില്‍ മദ്യപിച്ചശേഷമാണ് അവിടെ നിന്നു മടങ്ങിയത്.

താന്‍ ഡ്രൈവ് ചെയ്യാമെന്നു പറഞ്ഞിട്ടും ശ്രീറാം കാര്‍ ഓടിക്കുകയായിരുന്നു. പട്ടം മരപ്പാലത്തെ തന്റെ ഫ്‌ളാറ്റിലേക്കു മടങ്ങിപ്പോവുകയായിരുന്നെന്നും അവര്‍ പോലീസിനോട് പറഞ്ഞു. എന്നാല്‍, കവടിയാറിലെ തന്റെ വീട്ടിലേക്കു പോകുമ്പോഴാണ് അപകടമുണ്ടായതെന്നാണ്

ശ്രീറാം വെങ്കിട്ടരാമന്‍ പോലീസിനു മൊഴിനല്‍കിയത്.
മൂന്നാര്‍ സബ് കളക്ടറായിരിക്കെ ശ്രീറാമെടുത്ത നടപടികളുമായി ബന്ധപ്പെട്ട് ആരാധന തോന്നി ഫെയ്‌സ്ബുക്ക് വഴിയാണ് അദ്ദേഹത്തെ പരിചയപ്പെട്ടതെന്ന് വഫ പറഞ്ഞു. ഒട്ടേറെ ഐ.എ.എസ്.ഐ.പി.എസ്. ഉദ്യോഗസ്ഥരുമായി പരിചയമുണ്ട്. ഈയിടെ ഗള്‍ഫില്‍ പ്രതിയെ പിടികൂടാനെത്തിയ വനിതാ ഐ.പി.എസ്. ഉദ്യോഗസ്ഥയ്ക്ക് ആവശ്യമായ സഹായം നല്‍കിയിരുന്നു. വിവാഹിതയായ വഫ അബുദാബിയില്‍ ഭര്‍ത്താവിനും മക്കള്‍ക്കുമൊപ്പമായിരുന്നു താമസം. ഈയിടെയാണ് നാട്ടിലെത്തിയത്.

തിരുവനന്തപുരം കൊല്ലം ജില്ലാ അതിര്‍ത്തിയായ നാവായിക്കുളത്താണ് കുടുംബവീട്. ഇവിടത്തെ വിലാസത്തിലാണ് അപകടത്തില്‍പ്പട്ട കാര്‍ രജിസ്റ്റര്‍ ചെയ്തിരുന്നത്. അതിവേഗത്തിന് മോട്ടോര്‍വാഹന വകുപ്പ് നേരത്തേയും ഈ കാറിന് പിഴ ചുമത്തിയിട്ടുണ്ട്.

യുവതിയെ കേസിലെ നിര്‍ണായക സാക്ഷിയാക്കുന്നതിന്റെ ഭാഗമായി കന്റോണ്‍മെന്റ് പോലീസ് സ്‌റ്റേഷനില്‍ നടന്ന മൊഴിയെടുപ്പ് വൈകുന്നേരം വരെ നീണ്ടു. പിന്നീട് കോടതിയില്‍ ഹാജരാക്കി മജിസ്‌ട്രേറ്റ് രഹസ്യ മൊഴിയും രേഖപ്പെടുത്തി. എട്ടുപേജുള്ള രഹസ്യമൊഴിയാണ് ജുഡീഷ്യല്‍ ഫസ്റ്റ് ക്ലാസ് മജിസ്‌ട്രേറ്റിന് നല്‍കിയത്.