ഗര്‍ഭിണിയായ വീട്ടമ്മ വാടകവീട്ടില്‍ ദേഹത്തു തീപടര്‍ന്ന് വെന്തു മരിച്ചു. പാറശാലയ്ക്കു അടുത്തുള്ള ചെങ്കല്‍ വട്ടവിളയിലെ വാടകവീട്ടില്‍ പരശുവയ്ക്കല്‍ ആലമ്പാറ സ്വദേശി ശ്രീജിത്തിന്റെ ഭാര്യ ബി.എസ്. ദേവികയാണ് മരണമടഞ്ഞത്. ഗുരുതരമായി പൊള്ളലേറ്റ ശ്രീജിത്തിനെ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

ഇവരുടെ അഞ്ചുവയസുകാരനായ മകന്‍ ദേവജിത് വീടിനു മുന്നില്‍ നിറുത്തിയിട്ടിരുന്ന കാറില്‍ ഈ സംഭവം നടക്കുമ്പോള്‍ ഉറങ്ങുകയായിരുന്നു. ഞായറാഴ്ച രാത്രിയോടെ ശ്രീജിത്തിന്റെ നിലവിളി കേട്ട് നാട്ടുകാര്‍ ഓടിയെത്തിയപ്പോള്‍ ദേവികയുടെ ശരീരത്തില്‍ തീ ആളിപ്പടരുന്നതും ശ്രീജിത്ത് ഭാര്യയെ രക്ഷപ്പെടുത്താന്‍ ശ്രമിക്കുന്നതുമാണ് കണ്ടത്. രണ്ടുപേരെയും നാട്ടുകാര്‍ നെയ്യാറ്റിന്‍കര ജനറല്‍ ആശുപത്രിയില്‍ എത്തിച്ചെങ്കിലും ദേവിക മരിച്ചു.
സാരമായി പൊള്ളലേറ്റ ശ്രീജിത്തിനെ പിന്നീട് മെഡിക്കല്‍ കോളേജ് ആശുപത്രിയിലേക്ക് കൊണ്ടുപോവുകയായിരുന്നു. വീട്ടുവഴക്കിനെ തുടര്‍ന്ന് ദേവിക ദേഹത്ത് മണ്ണെണ്ണയൊഴിച്ച് തീകൊളുത്തിയെന്നും, രക്ഷപ്പെടുത്താന്‍ ശ്രമിക്കുന്നതിനിടെ തനിക്ക് പൊള്ളലേറ്റെന്നുമാണ് ശ്രീജിത്ത് പറഞ്ഞത്. കുടുംബവുമൊത്ത് വൈകുന്നരേം കാറില്‍ പുറത്തുപോയി തിരിച്ചു വരുമ്പോഴേക്കും കുട്ടി ഉറക്കമായിരുന്നെന്നും, അതുകൊണ്ട് കാറില്‍ത്തന്നെ കിടത്തിയെന്നുമാണ് ശ്രീജിത്ത് പറയുന്നത്.
നെയ്യാറ്റിന്‍കരയിലെ ഇരുമ്പ് വ്യാപാരക്കടയില്‍ ജീവനക്കാരനാണ് പരശുവയ്ക്കല്‍ ആലമ്പാറ ചിറക്കോണം സ്വദേശിയായ ശ്രീജിത്ത്. ദേവിക അരുവിക്കര ചെറിയകൊണ്ണി സ്വദേശി നാരായണന്‍കുട്ടിയുടെയും ശൈലജയുടെയും മകളാണ് . ഇവര്‍ വട്ടവിളയിലെ വാടകവീട്ടില്‍ ഒന്നര മാസത്തോളം മുമ്പാണ് താമസത്തിനെത്തിയത്.
സ്വകാര്യ ആശുപത്രിയില്‍ ദേവിക കുറച്ചുനാള്‍ നഴ്‌സ് ആയി ജോലിചെയ്തിരുന്നു. ദേവികയെ ചികിത്സിക്കുന്ന ഗൈനക്കോളജിസ്റ്റിനെ കാണാന്‍ ഇവര്‍ ഞായറാഴ്ച കുടുംബസമേതം കാറില്‍ പോയിരുന്നു. കുറച്ചുനാള്‍ മുമ്പാണ് ദേവികയെ ആശുപത്രിയില്‍ കൊണ്ടുപോകാനും മറ്റുമായി ശ്രീജിത്ത് പഴയ ആള്‍ട്ടോ കാര്‍ വാങ്ങിയത്. ഇരുവരും തമ്മില്‍ സന്ധ്യ കഴിഞ്ഞ് വഴക്കു നടന്നതായും ശ്രീജിത്ത് ഉറക്കെ സംസാരിക്കുന്നത് കേട്ടതായും അയല്‍വാസികള്‍ പറയുന്നുണ്ട്.
വഴക്കിനെ തുടര്‍ന്ന് ദേവിക ദേഹത്ത് മണ്ണെണ്ണയൊഴിച്ച് തീകൊളുത്തിയെന്നാണ് പൊലീസിന്റെ നിഗമനം. ദേവികയുടെ മൃതദേഹം പോസ്റ്റ്‌മോര്‍ട്ടത്തിനു ശേഷം ബന്ധുക്കള്‍ക്ക് വിട്ടുകൊടുത്തു.