പ്രളയ ബാധിതരെ സഹായിക്കാനായി സി.പി.എം നടത്തിയ ഫണ്ട് ശേഖരണത്തില് നല്കിയ തുക കുറഞ്ഞതിനാല് കടയിലെ ജീവനക്കാരനെ മര്ദ്ദിച്ചെന്ന് പരാതി
പ്രാദേശിക നേതാക്കള് ഉള്പ്പെടെ ജനങ്ങളോട് മാന്യമായി പെരുമാറണമെന്നും നിര്ബന്ധിത പിരിവ് നടത്തരുതെന്നും ഭീഷണിപ്പെടുത്തരുതെന്നും സംസ്ഥാന സെക്രട്ടറി കോടിയേരി ബാലകൃഷ്ണനും സംസ്ഥാന സെക്രട്ടറിയേറ്റും നല്കിയ നിര്ദ്ദേശം എറണാകുളത്തെ സി.പി.എം പ്രവര്ത്തകര് അട്ടിമറിച്ചതായി ആക്ഷേപം. കൊച്ചി ഇടപ്പള്ളിയില് പാര്ട്ടി പ്രവര്ത്തകര് പ്രളയ ബാധിതരെ സഹായിക്കാനായി നടത്തിയ ഫണ്ട് ശേഖരണത്തില് നല്കിയ തുക കുറഞ്ഞതിനാല് കടയിലെ ജീവനക്കാരനെ മര്ദ്ദിച്ചെന്നാണ് ഉടമയായ മനുവിന്റെ പരാതി. ബ്യൂട്ടി പാര്ലര് ജീവനക്കാരനെയാണ് മര്ദ്ദിച്ചത്. സി.പി.എം പ്രവര്ത്തകനും വാര്ഡ്് കൗണ്സിലറുമായ സുദര്ശന്റെ നേതൃത്വത്തിലായിരുന്നു മര്ദ്ദനമെന്നും ഇയാളുടെ പറയുന്നു.
100 രൂപയാണ് മനു സംഭാവന നല്കിയത്. അത് പോരായെന്ന് പറഞ്ഞ സുദര്ശന് പണം തിരികെ നല്കിയ ശേഷം പ്രവര്ത്തകര്ക്കൊപ്പം തിരികെ പോയി. അതിനിടെ പാര്ട്ടിപ്രവര്ത്തകരില് ചിലര് കടയിലെ സ്റ്റിക്കര് ഇളക്കിയതോടെ ജീവനക്കാരില് ഒരാള് എതിര്ത്തു. തുടര്ന്നായിരുന്നു മര്ദ്ദനം. അതോടെ നഷ്ടപരിഹാരം ആവശ്യപ്പെട്ട് മനു പൊലീസില് പരാതി നല്കി. തുടര്ന്ന് പ്രാദേശിക നേതാക്കള് നിരന്തരം ഭീഷണി തുടങ്ങി. കേസ് കൊടുത്തിട്ടും പൊലീസ് കാര്യമായി ഇടപെട്ടില്ലെന്നും കടയുടമ ആരോപിച്ചു. സംഭവത്തിന് ശേഷം സുദര്ശന്റെ നേതൃത്വത്തില് തനിക്കെതിരെ വ്യാജപ്രചരണങ്ങളും നടത്തുന്നുണ്ടെന്നും മനു ആരോപിക്കുന്നു. ബ്യൂട്ടി പാര്ലറിന്റെ മറവില് കഞ്ചാവ് ഉള്പ്പെടെയുള്ള ലഹരിവസ്തുക്കള് വില്ക്കുകയാണെന്നും അത് വാര്ഡ് കൗണ്സിലറായ താന് ചോദ്യം ചെയ്തോടെയാണ് തന്നെയും പാര്ട്ടിയേയും അപമാനിക്കാന് ഇല്ലാത്ത പരാതി നല്കിയതെന്നാണ് സുദര്ശനന് പൊലീസുകാരോട് ഉള്പ്പെടെ പറഞ്ഞത്.
പ്രാദേശിക നേതാക്കളുടെ പെരുമാറ്റം വളരെ മോശമായ രീതിയിലാണെന്ന അഭിപ്രായം ശക്തമാണെന്ന് സി.പി.എം സംസ്ഥാന സെക്രട്ടറിയേറ്റ് തയ്യാറാക്കിയ കരട് രൂപരേഖയില് വ്യക്തമായി പറഞ്ഞിരുന്നു. പലപ്പോഴും പ്രാദേശിക നേതാക്കളുടെയും പ്രവര്ത്തകരുടെയും സ്വഭാവരീതിയാണ് പാര്ട്ടിക്കെതിരായ ജനവികാരമായി രൂപപ്പെടുന്നത്. ബ്രാഞ്ച്-ലോക്കല് അംഗങ്ങളും നേതാക്കളും പ്രദേശവാസികള്ക്കൊപ്പം പലകാര്യങ്ങളിലും നില്ക്കുന്നില്ലെന്ന അഭിപ്രായം പലയിടങ്ങളിലും ശക്തമാണ്. പഞ്ചായത്ത് അംഗങ്ങളുടെയും മറ്റും ഇടപെടീലുകള് ഇക്കാര്യത്തില് പ്രധാനമാണ്. ഗൃഹസന്ദര്ശനത്തിനെത്തിയ നേതാക്കളോട് പലരും ഇക്കാര്യം പറഞ്ഞിട്ടുണ്ട്. ഇക്കാര്യങ്ങള് സി.പി.എം സംസ്ഥാന സമിതി ചര്ച്ച ചെയ്തിരുന്നു. ഡിവൈഎഫ്ഐ, എസ്.എഫ്ഐ, സര്വ്വീസ് സംഘടനകള്, മറ്റ് പോഷക സംഘടനകള് എന്നിവയുടെ പ്രവര്ത്തനങ്ങളും വിലയിരുത്തിയിട്ടുണ്ട്. പാര്ട്ടിയിലെയും പോഷക സംഘടനകളിലെയും അംഗങ്ങളുടെയും കുടുംബാംഗങ്ങളുടെയും വോട്ടുകള് ലോക്സഭാ തെരഞ്ഞെടുപ്പില് കോണ്ഗ്രസിനും ബി.ജെ.പിക്കും ലഭിച്ചിട്ടുണ്ട്. അത് വലിയ അപകടകരമായ കാര്യമാണെന്നാണ് വിലയിരുത്തല്.
താഴേ തട്ട് മുതല് മുകളിലേക്കുള്ള നേതാക്കളുടെ പെരുമാറ്റവും അച്ചടക്കവും വളരെ പ്രധാനമാണ്. സംഘടനാ തലത്തിലുള്ള അച്ചടക്കം പോലും പാലിക്കുന്നതില് പലരും വീഴ്ചവരുത്തുന്നതായി വിമര്ശനം ഉയര്ന്നിട്ടുണ്ട്. അതിനാല് പാര്ട്ടി അംഗങ്ങളും നേതാക്കളും ജനപ്രതിനിധികളും ജനങ്ങളുമായി നിരന്തരം സമ്പര്ക്കം പുലര്ത്തണം. പ്രാദേശികമായ വിഷയങ്ങള് പോലും വിവാദമാക്കാതെ പരിഹരിക്കണം. അതേസമയം ചേര്ത്തലയില് ഓമനക്കുട്ടന് സംഭവിച്ചത് പോലുള്ള കാര്യങ്ങളില് ശക്തമായി ഇടപെടുകയും വേണം. സര്ക്കാരിന്റെ ഭരണം പലയിടത്തും മെച്ചമാണെങ്കിലും അടിക്കടി പാര്ട്ടിയിലും നേതാക്കളെയും കേന്ദ്രീകരിച്ചുണ്ടാകുന്ന വിവാദങ്ങള് അതിന്റെ ശോഭ കെടുത്തുന്നു. ശബരിമല വിഷയത്തില് ജാഗ്രതക്കുറവുണ്ടായി അത് സ്വയംവിമര്ശനമായി പാര്ട്ടി വിലയിരുത്തിയതായും സെക്രട്ടറിയേറ്റ് തയ്യാറാക്കിയ രൂപരേഖയില് പറയുന്നു. ഇക്കാര്യങ്ങള് പത്രമാധ്യമങ്ങളിലടക്കം വന്നതാണ്. താമസിക്കാതെ കീഴ്ഘടകങ്ങളെ അറിയിക്കുകയും ചെയ്യും. എന്നിട്ടും പ്രാദേശിക നേതാക്കളും പ്രവര്ത്തകരും ധിക്കാരവും ധാര്ഷ്ട്യവും അവസാനിപ്പിക്കാതെ മുന്നോട്ട് പോകുന്നത് സി.പി.എമ്മിന് വലിയ തിരിച്ചടിയാകും. പ്രത്യേകിച്ച് പാലാ ഉപതെരഞ്ഞെടുപ്പ് അടുത്തിരിക്കുന്ന വേളയില്.
https://www.facebook.com/Malayalivartha
