ഒരിടവേളയ്ക്ക് ശേഷം ശബരിമല സജീവ ചര്‍ച്ചാ വിഷയമാകുകയാണ്. കഴിഞ്ഞ മഞ്ഡലകാലത്തിലെ അനുഭവം ഉള്‍ക്കൊണ്ട് വലിയ തയ്യാറെടുപ്പുകളോടെയാണ് സര്‍ക്കാര്‍ നീങ്ങുന്നത്. നേരത്തെ തന്നെ മുഖ്യമന്ത്രിയുടെ നേതൃത്വത്തില്‍ ഉന്നതതല യോഗം വിളിച്ചു കൂട്ടി ഓരോ വിഭാഗങ്ങളുടേയും നടപ്പിലാക്കേണ്ട പ്രവര്‍ത്തനങ്ങള്‍ ചര്‍ച്ച ചെയ്തു. കഴിഞ്ഞ ലോക്‌സഭാ തെരഞ്ഞെടുപ്പിലെ പരാജയ കാരണം ശബരിമലയാണെന്ന വിലയിരുത്തല്‍ വന്നതിനാല്‍ കരുതലോടെയുള്ള പ്രവര്‍ത്തനമാണ് സിപിഎമ്മും നടത്തുന്നത്. ഇനി വരാനിരിക്കുന്ന ഉപതെരഞ്ഞെടുപ്പുകളെ ശബരിമല സ്വാധീനിക്കും. അത് കഴിഞ്ഞ് പഞ്ചായത്ത് തെരഞ്ഞെടുപ്പും. പിന്നെ നിയമസഭാ പൊതു തെരഞ്ഞെടുപ്പാണ്. വിശ്വാസികളുടെ പിന്തുണ ഉറപ്പാക്കാന്‍ വിശ്വാസ്യതയുള്ള പ്രവര്‍ത്തനം വേണമെന്നാണ് പാര്‍ട്ടി കണക്കാക്കുന്നത്.

അതിനിടെ തിരുവിതാംകൂര്‍ ദേവസ്വം ബോര്‍ഡിനു കീഴില്‍ ശബരിമല ക്ഷേത്രത്തിനായി പ്രത്യേക അതോറിറ്റി രൂപീകരിക്കുമെന്നു സംസ്ഥാന സര്‍ക്കാര്‍ സുപ്രീം കോടതിയെ അറിയിച്ചിരിക്കുകയാണ്. ഇതിനായി നിയമനിര്‍മാണം നടത്തും. പന്തളം രാജവംശത്തിലെ മുതിര്‍ന്ന അംഗമായ രാമവര്‍മ്മ സമര്‍പ്പിച്ച ഹര്‍ജിയിലാണു സര്‍ക്കാര്‍ നിലപാട് വ്യക്തമാക്കിയത്.

ശബരിമലയ്ക്കായി പ്രത്യേക അതോറിറ്റി രൂപീകരിക്കാനുള്ള സര്‍ക്കാര്‍ നീക്കം നേരത്തെ ചര്‍ച്ചയായിരുന്നു. ശബരിമല ക്ഷേത്രഭരണം ദേവസ്വം ബോര്‍ഡില്‍നിന്നു മാറ്റി പ്രത്യേക ബോര്‍ഡിനു കീഴിലാക്കണമെന്നും വീണ്ടും ദേവപ്രശ്‌നം നടത്തണമെന്നുമാണു രാമവര്‍മയുടെ ഹര്‍ജിയിലെ ആവശ്യം. 2011ലെ ഉന്നതാധികാരസമിതി നിര്‍ദേശിച്ച രീതിയില്‍ ദേവപ്രശ്‌നം നടത്തുകയും വേണം. ക്ഷേത്രഭരണത്തിനായി ദേവസ്വം കമ്മിഷണര്‍, സെക്രട്ടറി, തന്ത്രി എന്നിവരും അയ്യപ്പസേവാസംഘം, പന്തളം കൊട്ടാരം പ്രതിനിധികളും ഉള്‍പ്പെട്ട സമിതി വേണമെന്നും ഹര്‍ജിയില്‍ ആവശ്യപ്പെടുന്നു.

ദേവസ്വം, റവന്യൂ വകുപ്പുകളാണ് ഈ കേസിലെ എതിര്‍കക്ഷികള്‍. നാലാഴ്ചയ്ക്കുശേഷം ഹര്‍ജി വീണ്ടും പരിഗണിക്കുന്നതാണ്. ബി.ജെ.പി. നേതാവ് സുബ്രഹ്മണ്യന്‍ സ്വാമി നല്‍കിയ മറ്റൊരു ഹര്‍ജിയും ഇതോടൊപ്പം പരിഗണിക്കുന്നുണ്ട്. ദേവസ്വം ബോര്‍ഡ് അംഗങ്ങളെ തെരഞ്ഞെടുക്കുന്നതു ഹിന്ദു എം.എല്‍.എമാരാണെങ്കിലും അവരില്‍ പലരും അവിശ്വാസികളാണെന്നാണ് സുബ്രഹ്മണ്യന്‍ സ്വാമിയുടെ വാദം. അതിനാല്‍, ഇപ്പോഴത്തെ രീതി മാറ്റി വിശ്വാസത്തില്‍ ഊന്നിയുള്ള തെരഞ്ഞെടുപ്പ് ആവശ്യമാണെന്നും അദ്ദേഹം ആവശ്യപ്പെടുന്നു. ഇതിനെ സര്‍ക്കാര്‍ എങ്ങനെ വാദിക്കുന്നു എന്നതാണ് മുഖ്യം.

തിരിവിതാംകൂര്‍ ദേവസ്വം ബോര്‍ഡിന്റെ നിലനില്‍പ്പ് തന്നെ ശബരിമല ക്ഷേത്രത്തിന്റെ വരുമാനമാണ്. അപ്പോള്‍ ശബരിമല മാത്രമായി വിഭജിച്ചാല്‍ മറ്റ് ക്ഷേത്രങ്ങളുടെ സ്ഥിതി പരിതാപകരമാകും. തിരുവിതാംകൂര്‍ ദേവസ്വം ബോര്‍ഡിനു കീഴില്‍ 1258 ക്ഷേത്രങ്ങളാണുള്ളത്. ഇവയില്‍ ശബരിമല ഉള്‍പ്പെടെ 58 ക്ഷേത്രങ്ങളാണു കൂടുതല്‍ വരുമാനമുള്ളവ. ഈ വരുമാനമുപയോഗിച്ചാണു മറ്റു ക്ഷേത്രങ്ങളുടെ ചെലവുകള്‍ നടന്നുപോകുന്നത്. അതിനാലാണ് ശബരിമലയെ പ്രത്യേക ദേവസ്വം ബോര്‍ഡ് ആക്കണമെന്ന നിര്‍ദേശം സര്‍ക്കാര്‍ തള്ളുന്നത്.

തിരുവിതാംകൂര്‍ ദേവസ്വം ബോര്‍ഡിനു കീഴില്‍ത്തന്നെ തിരുപ്പതി മാതൃകയില്‍ പ്രത്യേക അതോറിറ്റിയാണു ദേവസ്വം വകുപ്പിന്റെ പരിഗണനയിലുള്ളത്. വര്‍ഷം തോറും ലക്ഷക്കണക്കിനു തീര്‍ഥാടകരെത്തുന്ന ക്ഷേത്രത്തിനു പ്രത്യേകഭരണസംവിധാനം ആവശ്യമാണെന്നു ബോധ്യപ്പെട്ട സാഹചര്യത്തിലാണിത്. തിരുപ്പതി മോഡല്‍ ശബരിമലയിലും പ്രാവര്‍ത്തികമാക്കാനുള്ള ചര്‍ച്ചകര്‍ നേരത്തേയും നടന്നിരുന്നു. എന്നാല്‍ ഹിന്ദു സംഘടനകളുടെ ഇടയില്‍ നിന്നും ശക്തമായ എതിര്‍പ്പ് നേരത്തെ ക്ഷണിച്ചു വരുത്തിയിരുന്നു. അതിനാല്‍ ചര്‍ച്ചകളിലൂടെയായിരിക്കും അന്തിമ രൂപം നല്‍കുന്നത്.