ചന്ദ്രയാന്‍ രണ്ടിന്റെ നിയന്ത്രണം ഏകോപിപ്പിക്കുന്ന ബംഗളൂരുവിലെ ഐഎസ്ആര്‍ഒ കേന്ദ്രത്തിന് ചന്ദ്രന് 2.100 കിലോമീറ്റര്‍ ഉയരത്തില്‍ ലാന്‍ഡറു(വിക്രം)മായി ബന്ധം നഷ്ടപ്പെടുകയായിരുന്നു. വരും മണിക്കൂറുകളിലേ കൂടുതല്‍ വിവരങ്ങള്‍ ലഭ്യമാകുകയുള്ളുവെന്നും ഐഎസ്ആര്‍ഒ അറിയിച്ചു.

37 ശതമാനം മാത്രം വിജയസാധ്യത കണക്കാക്കിയ സോഫ്റ്റ് ലാന്‍ഡിംഗ് ഏറെ ശ്രമകരമായ ഘട്ടമായിരുന്നു. ശനിയാഴ്ച പുലര്‍ച്ചെ 1.52ന് ലാന്‍ഡിംഗ് പ്രക്രിയ തുടങ്ങിയെങ്കിലും പിന്നീട് സിഗ്‌നല്‍ ലഭിക്കാതെ വരികയായിരുന്നു. ചന്ദ്രന്റെ ഉപരിതലത്തില്‍ നിന്നു നൂറു കിലോമീറ്റര്‍ മുകളില്‍നിന്നാണ് വിക്രം ചന്ദ്രയാനില്‍നിന്നും വേര്‍പെട്ടത്. ഇതിനു ശേഷം 15 നിമിഷങ്ങള്‍ക്കകം ചാന്ദ്രപ്രതലത്തില്‍ നാല് കാലുകളില്‍ വന്നിറങ്ങാനായിരുന്നു പദ്ധതി.

വിക്രം ഇറങ്ങുന്ന ചന്ദ്രന്റെ ദക്ഷിണധ്രുവം വന്‍ ഗര്‍ത്തങ്ങളും അഗ്‌നിപര്‍വത സ്‌ഫോടനങ്ങളെത്തുടര്‍ന്ന് രൂപപ്പെട്ട നിരവധി പാറക്കെട്ടുകളുടെയും (ലാവ ഒഴുകി തണുത്തുറഞ്ഞ്) മേഖലയാണ്. അതുകൊണ്ടു തന്നെ അപകടരഹിതമായ ലാന്‍ഡിംഗ് കേന്ദ്രം കണ്ടെത്തുക വളരെ ശ്രമകരമാണ്.

വിക്രം വേര്‍പെട്ട് ചന്ദ്രോപരിതലത്തില്‍ ഇറങ്ങുന്ന 15 മിനിട്ട് മുന്‍പൊരിക്കലും ഇല്ലാത്ത വിധംഭയപ്പെടുത്തുന്ന നിമിഷങ്ങള്‍' എന്നാണ് ശാസ്ത്രജ്ഞര്‍ വ്യക്തമാക്കിയിരുന്നത്. ചന്ദ്രനിലെ പാറകളുടെയും മണ്ണിന്റേയും ഘടന പഠിക്കുന്ന റോവര്‍ വിക്രമിന്റെ ഉള്ളിലുണ്ട്. റോബട്ടിക്ക് സാങ്കേതികവിദ്യ ഉപയോഗിച്ച് ആറു ചക്രത്തില്‍ ഓടുന്നതാണ് റോവര്‍.

വിക്രം എവിടെയെങ്കിലും ഇടിച്ചിറങ്ങിയോ, മറ്റെവിടെയെങ്കിലും വിജയകരമായി ഇറങ്ങിയോ, ചന്ദ്രനിലെ ഗര്‍ത്തങ്ങളിലെവിടെയെങ്കിലും പെട്ടുപോയോ എന്നീ മൂന്ന് സാധ്യതകളാണ് ശാസ്ത്രജ്ഞര്‍ സംശയിക്കുന്നത്. സുരക്ഷിതമായി ഇറങ്ങിയെങ്കില്‍ പിന്നീട് സിഗ്‌നല്‍ ലഭിക്കാനും സാധ്യതയുണ്ട്. ഇതിനായി കാത്തിരിക്കുകയാണ് ശാസ്ത്രലോകം.

ചന്ദ്രന്റെ ഉപരിതലത്തില്‍നിന്ന് 100 കിലോമീറ്റര്‍ ഉയരത്തില്‍ ഭ്രമണം ചെയ്യുന്ന ഓര്‍ബിറ്ററില്‍് നിന്നുള്ളവിവരവും നിര്‍ണായകമാണ്. ഒരു വര്‍ഷം പ്രവര്‍ത്തന കാലമുള്ളതാണ് ഓര്‍ബിറ്റര്‍. ഹൈ റെസലൂഷന്‍ കാമറയാണ് ഓര്‍ബിറ്ററിന്റെ പ്രധാന ഉപകരണങ്ങളിലൊന്ന്.