ശബരിമല സര്‍ക്കാരിനും പാര്‍ട്ടിക്കും ഉണ്ടാക്കിയ ക്ഷീണം വളരെ വലുതാണ്. കഴിഞ്ഞ തെരഞ്ഞെടുപ്പില്‍ അത് പ്രതിഫലിക്കുകയും ചെയ്തു. ഇപ്പോഴിതാ തുറന്ന വേദിയില്‍ വച്ച് ശബരിമല വിഷയത്തില്‍ സംസ്ഥാന സര്‍ക്കാരിനെ രൂക്ഷമായി വിമര്‍ശിച്ചിരിക്കുകയാണ് മാര്‍ത്തോമ സുറിയാനി സഭയുടെ അദ്ധ്യക്ഷന്‍ ഡോക്ടര്‍ ജോസഫ് മാര്‍ത്തോമ്മാ മെത്രാപ്പോലീത്താ. മാനവീയതയുടെ ഐക്യത്തിനായി ഉണ്ടായ നവോത്ഥാന പ്രസ്ഥാനമാണ് ശബരിമല. ആളുകളെ കൊണ്ട് വന്ന് മതില്‍ പണിതാല്‍ നവോത്ഥാനം ഉണ്ടാകില്ലെന്നും അദേഹം പറഞ്ഞു. ദേവസ്വം മന്ത്രി കടകംപള്ളി സുരേന്ദ്രനെ വേദിയിലിരുത്തിയായിരുന്നു ജോസഫ് മാര്‍ത്തോമ്മാ മെത്രാപ്പോലീത്തയുടെ രൂക്ഷ വിമര്‍ശനം.

സംസ്ഥാന സര്‍ക്കാരിന്റെ ശബരിമല വിഷയത്തിലെ നിലപാട് നേരത്തെ തന്നെവിശ്വാസികള്‍ക്ക് എതിരായിരുന്നു. വിശ്വാസികളെ കൂടെ നിര്‍ത്തുന്നതില്‍ സര്‍ക്കാരിന് വീഴ്ച്ച പറ്റി. ജോസഫ് മാര്‍ ബര്‍ണബാസ് തിരുമേനിയുടെ സപ്തതി ആഘോഷത്തില്‍ പങ്കെടുത്ത് കൊണ്ടാണ് ജോസഫ് മാര്‍ത്തോമ്മാ മെത്രാപ്പോലീത്താ സര്‍ക്കാരിനെതിരെ വിമര്‍ശനം ഉയര്‍ത്തിയത്. എന്നാല്‍ ചടങ്ങ് ഉദ്ഘാടനം ചെയ്ത ദേവസ്വം മന്ത്രി ഇതിന് മറുപടി നല്‍കിയില്ല.

വിശ്വാസ സമൂഹത്തെ കൂടെ നിര്‍ത്തുന്നതില്‍ സര്‍ക്കാരിന് വീഴ്ച്ച പറ്റിയെന്ന് തെരഞ്ഞെടുപ്പിന് ശേഷമുള്ള വിലയിരുത്തലില്‍ സിപിഎം വിലയിരുത്തിയിരുന്നു. ഇതിന് പുറമെയാണ് സുറിയാനി സഭയുടെ പരമോദ്ധ്യക്ഷന്‍ ഡോ.ജോസഫ് മാര്‍ത്തോമ്മാ മെത്രാപ്പോലീത്താ ശബരിമല വിഷയത്തിലെ സര്‍ക്കാര്‍ നിലപാടിനെ വിമര്‍ശിച്ചത്.

അതേസമയം ശബരിമലയില്‍ പ്രത്യേക നിയമനിര്‍മാണത്തിനൊരുങ്ങിയിരിക്കുകയാണ് സംസ്ഥാന സര്‍ക്കാര്‍. ശബരിമലയുടെ ഭരണകാര്യങ്ങളില്‍ ഉള്‍പ്പെടെ നിയമ നിര്‍മാണം കൊണ്ടുവരാന്‍ തീരുമാനിച്ചതായി സര്‍ക്കാര്‍ സുപ്രീം കോടതിയെ അറിയിച്ചു. തിരുവിതാംകൂര്‍ ദേവസ്വം ബോര്‍ഡിനു കീഴിലുള്ള ക്ഷേത്രങ്ങളിലെ നിലവിലെ ഭരണസംവിധാനം മാറ്റുമെന്നും സര്‍ക്കാര്‍ സുപ്രീം കോടതിയെ അറിയിച്ചിട്ടുണ്ട്. എന്നാല്‍ കൂടുതല്‍ വിശദാംശങ്ങള്‍ സര്‍ക്കാര്‍ അഭിഭാഷകന്‍ വെളിപ്പെടുത്തിയിട്ടില്ല.

ശബരിമലയുമായി ബന്ധപ്പെട്ട ഒരു ഹര്‍ജി പരിഗണിക്കവേ സംസ്ഥാന സര്‍ക്കാരിനു വേണ്ടി ഹാജരായ ജയതി ഗുപ്തയാണ് ഇക്കാര്യം കോടതിയെ അറിയിച്ചത്. ജസ്റ്റിസ് രമണ അധ്യക്ഷനായ മൂന്നംഗ ബെഞ്ചാണ് ഹര്‍ജി പരിഗണിച്ചത്. ഹര്‍ജി നാലാഴ്ചയ്ക്കു ശേഷം വീണ്ടും പരിഗണിക്കാന്‍ മാറ്റിവെച്ചിട്ടുണ്ട്. എന്നാല്‍ ശബരിമല ക്ഷേത്രത്തിന്റെ ഭരണത്തിനായി നിലവിലുള്ള സ്ഥിതി മാറ്റുന്നതിനെ കുറിച്ച് സര്‍ക്കാര്‍ തീരുമാനിച്ചിട്ടില്ലെന്ന് മന്ത്രി കടകംപള്ളി സുരേന്ദ്രന്‍ പറഞ്ഞു. അതോറിറ്റി രൂപീകരിക്കാന്‍ സര്‍ക്കാര്‍ ആലോചിച്ചിട്ടില്ല. കോടതിയില്‍ സര്‍ക്കാര്‍ ഇതുമായി ബന്ധപ്പെട്ട ഒരു സത്യവാങ്മൂലവും നല്‍കിയിട്ടില്ലെന്നും കടകംപള്ളി വ്യക്തമാക്കി.

ശബരിമല യുവതി പ്രവേശന വിഷയത്തില്‍ നിയമനിര്‍മാണം കൊണ്ടുവരുന്നത് സജീവ പരിഗണനയിലുണ്ടെന്ന് കേന്ദ്രമന്ത്രി സദാനന്ദ ഗൗഡ. വ്യക്തമാക്കി. കേന്ദ്രനേതൃത്വത്തിന്റെ അറിവോടെയാണ് ശബരിമല വിഷയത്തില്‍ കേരളത്തില്‍ ബി.ജെ.പി നടത്തിയ സമരം. പാലാ ഉപതെരഞ്ഞെടുപ്പില്‍ ശബരിമല വിഷയം പ്രധാനപ്പെട്ടതാണെന്നും അദ്ദേഹം പറഞ്ഞു.

ഉപതെരഞ്ഞെടുപ്പായതിനാല്‍ ശബരിമല വിഷയം കരുതലോടെയാണ് ഇടതുമുന്നണി കാണുന്നത്. പാര്‍ട്ടി നേതാക്കള്‍ ശബരിമലയെ പറ്റി സംസാരിക്കുമ്പോള്‍ അളന്ന് മുറിച്ച് വേണമെന്നാണ് തീരുമാനം. വെറുതേയൊരു പ്രസ്താവന പോലും കോണ്‍ഗ്രസും ബിജെപിയും നേട്ടം കൊയ്യുന്ന സാഹചര്യമുണ്ടാക്കരുതെന്നും വ്യക്തമാക്കുന്നു.