എത്രവേഗമാ കളി മാറിയത്... ഒന്നേമുക്കാല് കോടിയ്ക്ക് ചെക്ക് കേസ് ഒതുക്കാമെന്ന് തുഷാര് സമ്മതിച്ചതാണ്; പറ്റില്ലെന്ന് പറഞ്ഞ് കടുംപിടുത്തം പിടിച്ച നാസില് അബ്ദുള്ളയ്ക്ക് കിട്ടിയത് കിടു പണി; ഒരു രൂപയും നല്കുകയും വേണ്ട നാട്ടില് കേസില് കുടുങ്ങുകയും ചെയ്യും
വെള്ളാപ്പള്ളി നടേശന്റെ മകന് തുഷാര് വെള്ളാപ്പള്ളിക്കെതിരെ തൃശൂര് മതിലകം സ്വദേശി നാസില് അബ്ദുള്ള നല്കിയ 20 കോടി രൂപയുടെ ചെക്ക് കേസ് തെളിവില്ലെന്ന് കണ്ട് അജ്മാന് കോടതി തള്ളിയോടെ ശരിക്കും അന്തം വിട്ടിരിക്കുന്നത് നാസില് അബ്ദുള്ളയാണ്. കേസ് ജയിക്കുമെന്ന് കരുതി പരമാവധി വിലപേശാനായിരുന്നു നാസിലിന്റെ തന്ത്രം. പക്ഷെ തുഷാറിന്റെ പാസ്പോര്ട്ട് വിട്ടു നല്കാനും കേസ് തള്ളിയതായും കോടതി ഉത്തരവിട്ടതോടെ എല്ലാം പൊളിഞ്ഞു. ഇതോടെ ഓണത്തിന് മുമ്പ് നാട്ടില് തിരിച്ചെത്താനുള്ള ശ്രമത്തിലാണ് തുഷാര്.
പതിനെട്ടു കോടിക്കു ചെക്ക് കേസ് കൊടുത്ത നാസില് അബ്ദുല്ല ഒത്തുതീര്പ്പിനായി അഞ്ചേമുക്കാല് കോടി രൂപയാണ് തുഷാറിനോട് ചോദിച്ചത്. എന്നാല് തുഷാര് വെള്ളാപ്പള്ളിയാകട്ടെ ഒന്നേമുക്കാല് കോടി വരെ നല്കാന് തയ്യാറായിരുന്നു. അത് വാങ്ങി കേസൊതുക്കാന് നാസില് തയ്യാറായില്ല. പകരം കേസ് ജയിക്കുമെന്ന് വിചാരിച്ച് തുഷാറിനെ മുള്മുനയില് നിര്ത്തുകയും ചെയ്തു. എന്നാല് കോടതിവിധി തിരിച്ചടിയായതോടെ എല്ലാം മാറിമറിഞ്ഞു. ഒന്നേമുക്കാല് കോടി രൂപ പോയിട്ട് ഒന്നേമുക്കാല് രൂപ പോലും ലഭിക്കില്ല.
അതേസമയം വെള്ളാപ്പള്ളിക്കെതിരായ ചെക്ക് കേസ് അജ്മാന് കോടതി തള്ളിയതോടെ പരാതിക്കാരനായ നാസില് അബ്ദുല്ല കുടുങ്ങാനും സാധ്യതയുണ്ട്. നേരത്തെ തുഷാറിനെ നിയമനടപടികളില് കുടുക്കാന് ഉപയോഗിച്ച ചെക്ക് നാസില് പണം നല്കി സംഘടിപ്പിച്ചതാണെന്ന് തെളിയിക്കുന്ന ശബ്ദ സന്ദേശങ്ങള് പുറത്ത് വന്നിരുന്നു. കേരളത്തിലെ ഒരു സുഹൃത്തിന് അഞ്ച് ലക്ഷം രൂപ നല്കിയാണ് ഈ ചെക്ക് നാസില് അബ്ദുള്ള സംഘടിപ്പിച്ചതെന്ന കൃത്യമായ വിവരങ്ങളാണ് ശബ്ദ സന്ദേശങ്ങളില് ഉണ്ടായിരുന്നത്. കേരളത്തില് നിന്നാണ് ചെക്ക് സംഘടിപ്പിച്ചത് എന്നത് പുറത്തു വന്നതിനാല് തുഷാര് മടങ്ങിയെത്തി പരാതി നല്കിയാല് നാസിലിനെതിരെ നടപടിയുണ്ടാകുമെന്ന് ഉറപ്പാണ്. ശബ്ദരേഖ പുറത്തുവന്ന സമയത്ത് തുഷാര് കേരളത്തില് മടങ്ങിയെത്തിയ ശേഷം നടപടികള് ഉണ്ടാകുമെന്ന് പിതാവ് വെള്ളാപ്പള്ളി നടേശന് വ്യക്തമാക്കുകയും ചെയ്തു.
തുഷാര് നാട്ടിലേക്കു വരുന്നത് തടയാന് നാസില് നല്കിയ സിവില് കേസും കഴിഞ്ഞ ദിവസം കോടതി തള്ളിയിരുന്നു. കഴിഞ്ഞ 21ന് അജ്മാനിലെ ഒരു ഹോട്ടലില് താമസിക്കുമ്പോള് രാത്രിയില് പൊലീസ് എത്തി തുഷാറിനെ അറസ്റ്റ് ചെയ്യുകയായിരുന്നു. നാസിലിന് താന് ചെക്ക് നല്കിയിട്ടില്ലെന്ന് ജാമ്യത്തിലിറങ്ങിയ ശേഷം പല തവണ തുഷാര് വ്യക്തമാക്കിയിരുന്നു. ഖദീര് എന്നയാളെക്കൊണ്ട് തുഷാറിന്റെ ഒപ്പുള്ള ബഌങ്ക് ചെക്ക് കൈവശമാക്കിയ ശേഷം അതില് 20 കോടി രൂപ എന്ന് എഴുതിച്ചേര്ത്ത് നാസില് വ്യാജ ചെക്ക് ഉണ്ടാക്കുകയായിരുന്നു. തുഷാറിനെ കുടുക്കി പണം തട്ടാന് നാസില് പദ്ധതി ആസൂത്രണം ചെയ്തതിന്റെ ശബ്ദരേഖ പുറത്തു വന്നതോടെ് തട്ടിപ്പ് വെളിയിലാവുകയും ചെയ്തു.
മറ്റൊരാളില് നിന്ന് താന് അഞ്ച് ലക്ഷം രൂപ കൊടുത്ത് ചെക്ക് വാങ്ങിയതാണെന്ന് ശബ്ദരേഖയില് നാസില് പറയുന്നത്. നാസിലിന് ചെക്ക് നല്കിയിട്ടില്ലെന്ന് തുഷാര് വ്യക്തമാക്കിയത് ശരിവയ്ക്കുന്നതായിരുന്നു ശബ്ദരേഖ. പത്തുവര്ഷം മുമ്പുള്ള ചെക്കിന് ഇപ്പോള് സാധുത ഇല്ലെന്നും തുഷാര് വാദിച്ചിരുന്നു. ഇന്നലെ കേസ് പരിഗണിച്ചപ്പോള്, വിശ്വാസ യോഗ്യമായ രേഖകള് ഹാജരാക്കാന് കഴിയാത്തതിനാല് പരാതിക്കാരന്റെ വാദം നിലനില്ക്കില്ലെന്ന് കണ്ടെത്തി കേസ് തള്ളുകയായിരുന്നു. ഇത് നീതിയുടെ വിജയമാണെന്ന് തുഷാര് വെള്ളാപ്പള്ളി പറഞ്ഞു. അതേസമയം വ്യവസായ പ്രമുഖന് എം.എ. യൂസഫ് അലിക്കും മുഖ്യമന്ത്രി പിണറായി വിജയനും തുഷാര് നന്ദി രേഖപ്പെടുത്തി.
പുറത്തു വന്ന സന്ദേശത്തിലെ ശബ്ദം തന്റേതു തന്നെയാണെന്ന് നാസില് അബ്ദുല്ല മാധ്യമങ്ങളോട് സ്ഥിരീകരിച്ചത് കൂടുതല് നിയമക്കുരുക്കിലേക്ക് പോകും. ഗള്ഫില് നാസില് രക്ഷപ്പെട്ടാലും നാട്ടില് കുടങ്ങുമെന്നുറപ്പാണ്. കേരളത്തില് കേസ് കൊടുത്ത് കടുപ്പിക്കാനാണ് തുഷാറിന്റെ നീക്കം. അതോടെ നാസില് കേരളത്തിലെത്തിയാല് പിടി വീഴുമെന്നുറപ്പാണ്. അതെ അടുത്ത അങ്കം കേരളത്തിലാണ്.
https://www.facebook.com/Malayalivartha
