മരടിലെ ഫ്‌ലാറ്റുകളില്‍ നിന്നും ഒഴിഞ്ഞുപോകണമെന്ന് കാണിച്ച് ഉടമകള്‍ക്ക് നഗരസഭ ഇന്ന് നോട്ടീസ് നല്‍കും. സുപ്രീംകോടതി ഉത്തരവ് നടപ്പിലാക്കണമെന്ന ചീഫ് സെക്രട്ടറിയുടെ കര്‍ശന നിര്‍ദേശത്തെ തുടര്‍ന്നാണിത്. ഇതാദ്യമായിട്ടാണ് ഫ്‌ലാറ്റുകളിലെ ഉടമകള്‍ക്ക് നഗരസഭ ഔദ്യോഗികമായി നോട്ടീസ് നല്‍കുന്നത്. കൂടാതെ തുടര്‍നടപടികള്‍ ചര്‍ച്ച ചെയ്യാനായി രാവിലെ 10.30 ന് നഗരസഭ കൗണ്‍സില്‍ യോഗവും ചേരുന്നുണ്ട്. ഫ്‌ലാറ്റ് പൊളിക്കുന്നതിന് കണക്കാക്കുന്ന 30 കോടിയോളം രൂപ സര്‍ക്കാര്‍ നല്‍കണമെന്ന് ആവശ്യപ്പെടാനാണ് തീരുമാനം. ഫ്‌ളാറ്റ് പൊളിക്കാന്‍ ടെന്‍ഡര്‍ ക്ഷണിക്കുന്നതടക്കമുള്ള കാര്യങ്ങള്‍ നഗരസഭ കൗണ്‍സില്‍ യോഗം വിശദമായി ചര്‍ച്ച ചെയ്യും. ഫ്‌ലാറ്റില്‍ നിന്ന് ഒഴിപ്പിക്കുന്നവരുടെ പുനരധിവാസത്തിനാവശ്യമായ സൗകര്യങ്ങള്‍ സംബന്ധിച്ച് ജില്ലാ ഭരണകൂടവും നഗരസഭയും ഏകദേശ ധാരണയിലെത്തിയിട്ടുണ്ട്.
ഫ്‌ലാറ്റുകളില്‍ താമസിക്കുന്നവരെ ഏലൂരിലെ ഫാക്ടിന്റെ അതിഥി മന്ദിരങ്ങളിലേക്കടക്കം മാറ്റിത്താമസിപ്പിക്കാണ് നഗരസഭയുടെയും ജില്ലാഭരണകൂടത്തിന്റെയും തീരുമാനം. എന്നാല്‍ നഗരസഭയുടെ നോട്ടീസ് റദ്ദാക്കണമെന്നാവശ്യപ്പെട്ട് ഹൈക്കോടതിയേയോ സുപ്രീംകോടതിയേയോ മറ്റൊരു ഹര്‍ജിയുമായി സമീപിക്കാന്‍ ഫ്‌ലാറ്റ് ഉടമകളുടെ അസോസിയേഷന്റെ ആലോചനയിലുണ്ട്. വിഷയത്തില്‍ സുപ്രീം കോടതിയെ സര്‍ക്കാരും നഗരസഭയും കൃത്യമായി കാര്യങ്ങള്‍ ധരിപ്പിച്ചില്ലെന്നാണ് ഫ്‌ലാറ്റുടമകള്‍ ആരോപിക്കുന്നത്. അപ്പാര്‍ട്‌മെന്റുകളില്‍ താമസക്കാരുണ്ടെന്ന് ആരും സുപ്രീം കോടതിയെ ധരിപ്പിച്ചില്ലെന്നും ഫ്‌ലാറ്റുടമകള്‍ ആരോപിക്കുന്നു. ഫ്‌ലാറ്റ് പൊളിക്കുന്നത് ഏത് വിധേനയും പ്രതിരോധിക്കുമെന്ന് നിലപാടിലാണ് ഇവര്‍.