ശബരിമല യുവതീ പ്രവേശന വിവാദത്തെത്തുടര്‍ന്നാണ് മുഖ്യമന്ത്രിയുടെ നേതൃത്വത്തില്‍ സംസ്ഥാന സര്‍ക്കാര്‍ നവോത്ഥാന സംരക്ഷണ സമിതി രൂപീകരിച്ചത്. അതിന് പിന്നാലെ വനിതാമതില്‍ പണിയുകയും പിറ്റേ ദിവസം കനകദുര്‍ഗയേയും ബിന്ദുവിനേയും ശബരിമലയില്‍ കയറ്റുകയും ചെയ്തു. ഇതോടെ നവോത്ഥാനക്കാര്‍ കൂട്ടയടിയായി. അന്ന് തുടങ്ങിയ സ്വര ചേര്‍ച്ചയില്ലായ്മ ഇപ്പോള്‍ പിളര്‍പ്പിലുമായി. നവോത്ഥാന സമിതി നേതാവ് സി.പി. സുഗതന്റെ നേതൃത്വത്തില്‍ ഹിന്ദു പാര്‍ലമെന്റിലെ 54 സമുദായ സംഘടനകള്‍ സമിതി വിടാന്‍ തീരുമാനിച്ചതോടെയാണ് പിളര്‍പ്പിലേക്ക് നീങ്ങിയത്.

മകന്‍ തുഷാര്‍ വെള്ളാപ്പള്ളിയെ ഗള്‍ഫില്‍ നിന്നും രക്ഷിച്ചതിന്റെ നന്ദിസൂചകമായി വെള്ളാപ്പള്ളി നടേശന് കിട്ടിയ ആദ്യ അവസരമാണിത്. അതിനാല്‍ തന്നെ മുഖ്യമന്ത്രി പറയും മുമ്പുതന്നെ വെള്ളാപ്പള്ളി വിഷയത്തില്‍ പ്രതികരിച്ചു. ഒരു സുഗതന്‍ പോയത് കൊണ്ട് ഒന്നും സംഭവിക്കില്ലെന്നും നവോത്ഥാന സമിതിയുമായി മുന്നോട്ട് പോകുമെന്നും അദ്ദേഹം വ്യക്തമാക്കി. നവോത്ഥാന മൂല്യങ്ങളുടെ സംരക്ഷണത്തിനായി ഏതറ്റം വരെയും പോകും. ഹിന്ദുഐക്യമല്ല നവോത്ഥാന സമിതി ലക്ഷ്യം വച്ചതെന്നും അദ്ദേഹം പറഞ്ഞു.

സമിതിയില്‍ നിന്നും പിന്മാറാനുള്ള തീരുമാനം അറിയിച്ച ഹിന്ദു പാര്‍ലമെന്റ് സംസ്ഥാന ജനറല്‍സെക്രട്ടറിയും നവോത്ഥാനസമിതി വൈസ് ചെയര്‍മാനുമായ സി.പി. സുഗതനെയും വെള്ളാപ്പള്ളി ശക്തമായ ഭാഷയിലാണ് വിമര്‍ശിച്ചത്. സുഗതന്‍ കടലാസ് പുലിയാണ്. അദ്ദേഹത്തിന് പാര്‍ലമെന്ററി വ്യോമോഹങ്ങളാണ്. ഒരു സുഗതന്‍ പോയത് കൊണ്ട് ഒന്നുമാകില്ല. സമിതി പൂര്‍വാധികം ശക്തിയോടെ മുന്നോട്ടുപോകും. എസ്.എന്‍.ഡി.പി യോഗത്തിന് രാഷ്ട്രീയ നിലപാടുകളില്ല. രാഷ്ട്രീയമില്ലാത്തതിന്റെ പേരിലാണ് നിലപാടുകളില്ലെന്ന വിമര്‍ശനം ഉയരുന്നതെന്നും അദ്ദേഹം വ്യക്തമാക്കി.

നവോത്ഥാന സമിതിയില്‍ നിന്നും പിന്മാറുകയാണെന്ന് ഹിന്ദു പാര്‍ലമെന്റ് ഇന്നലെയാണ് പ്രഖ്യാപിച്ചത്. 94 ഹിന്ദുസംഘടനകളുടെ കേന്ദ്രസമിതിയാണ് ഹിന്ദു പാര്‍ലമെന്റ്. പിന്മാറുകയാണെങ്കിലും ഹിന്ദു പാര്‍ലമെന്റ് അംഗങ്ങളായ ഏതെങ്കിലും സമുദായങ്ങള്‍ക്ക് അവരുടെ സ്വന്തം തീരുമാനമനുസരിച്ച് നവോത്ഥാനസമിതിയില്‍ തുടരാന്‍ തടസ്സമുണ്ടാവില്ലെന്നും അംഗ സംഘടനകള്‍ക്കയച്ച സര്‍ക്കുലറില്‍ വ്യക്തമാക്കിയിരുന്നു.

അതേസമയം സുഗതന്റേത് വ്യക്തിപരമായ തീരുമാനം മാത്രമാണെന്നും അത് നവോത്ഥാന മൂല്യസംരക്ഷണ സമിതിയുടെ തുടര്‍പ്രവര്‍ത്തനത്തിന് ഒരു ബുദ്ധിമുട്ടുമുണ്ടാക്കില്ലെന്നും കണ്‍വീനര്‍ പുന്നല ശ്രീകുമാര്‍ ഇന്നലെ തന്നെ വ്യക്തമാക്കിയിരുന്നു. നവോത്ഥാന മൂല്യസംരക്ഷണ സമിതിയുടെ രൂപീകരണ യോഗത്തില്‍ ഹിന്ദു പാര്‍ലമെന്റിനെ പ്രതിനിധീകരിച്ച് 94 സംഘടനകളുടെയും പ്രതിനിധികള്‍ പങ്കെടുത്തിരുന്നു. നവോത്ഥാന മൂല്യ സംരക്ഷണ സമിതിയുമായി ബന്ധപ്പെട്ടുള്ള സര്‍ക്കാര്‍ നിലപാടുകളെ പുതിയ സര്‍ക്കുലറില്‍ തള്ളിപ്പറഞ്ഞിട്ടില്ല. കണ്‍വീനര്‍ പുന്നല ശ്രീകുമാറിന് പക്ഷേ പരോക്ഷ വിമര്‍ശനവുമുണ്ട്. പുന്നലയോടുള്ള അഭിപ്രായ ഭിന്നതയാണ് പിന്മാറ്റത്തിന് പിന്നിലെന്ന് വ്യക്തമാക്കുന്നതാണ് സര്‍ക്കുലര്‍.

ശബരിമല വിഷയത്തിന്റെ തുടക്കത്തില്‍ സന്നിധാനത്ത് യുവതികളെ തടയുന്നതിന് നേതൃത്വം നല്‍കിയ നേതാവ് കൂടിയാണ് സുഗതന്‍. പിന്നീടാണ് അദ്ദേഹം നിലപാടില്‍ മാറ്റം വരുത്തി നവോത്ഥാനസമിതിയുമായി ചേര്‍ന്നത്. വീണ്ടും സുഗതന്‍ പഴയ തട്ടകത്തിലേക്കാണോ പോകുന്നതെന്നറിയാന്‍ ഏറെ ആകാക്ഷയുണ്ട്.