ജമ്മുകാശ്മീര്‍ വിഷയങ്ങള്‍ ഉയര്‍ത്തിപ്പിടിച്ച് ഇന്ത്യയെ പ്രകോപിക്കാനൊരുങ്ങുകയാണ് പാകിസ്ഥാന്‍. പാക് അധീന കാശ്മീരില്‍ കാശ്മീര്‍ പ്രഖ്യാപനം നടത്താനിരിക്കുന്ന പാകിസ്താന്‍ പ്രധാനമന്ത്രി ഇമ്രാന്‍ ഖാന് പിന്നാലെ വിദേശകാര്യമന്ത്രി ഷാ മഹ്മൂദ് ഖുറേഷിയും. ജമ്മു കശ്മീരിലെ സാഹചര്യങ്ങള്‍ ഇന്ത്യയുമായി ഒരു അപ്രതീക്ഷിത യുദ്ധത്തിലേക്ക് നയിച്ചേക്കാമെന്ന ഭീഷണിയാണ് ഷാ മഹ്മൂദ് ഖുറേഷി ഉയര്‍ത്തുന്നത്. ജനീവയില്‍ നടക്കുന്ന യുഎന്‍ മനുഷ്യാവകാശ കൗണ്‍സില്‍ സമ്മേളനത്തിനിടെ മാധ്യമങ്ങളോടാണ് വിദേശകാര്യമന്ത്രി ഇക്കാര്യം വ്യക്തമാക്കിയത്.

ഒരു യുദ്ധമുണ്ടായാല്‍ അതിന്റെ അനന്തരഫലം എന്താകുമെന്ന് അറിയുന്നവരാണ് പാകിസ്താനും ഇന്ത്യയും. എന്നാല്‍ ഈ സാഹചര്യമാണ് തുടരുന്നതെങ്കില്‍ എന്തും സംഭവിക്കാം. അപ്രതീക്ഷിതമായ ഒരു യുദ്ധം തള്ളികളയാനാവില്ല്. ജമ്മുകശ്മീരിലെ സ്ഥിതിഗതികള്‍ സംബന്ധിച്ച് അന്താരാഷ്ട്ര അന്വേഷണം നടക്കണം. യുഎന്‍ മനുഷ്യാവകാശ ഹൈക്കമ്മീഷണറെ കണ്ട് സംസാരിച്ചു. പാകിസ്താന്റെയും ഇന്ത്യയുടെയും അധീനതയിലുള്ള കശ്മീര്‍ സന്ദര്‍ശിക്കാന്‍ അവരെ ക്ഷണിച്ചിട്ടുണ്ട്. മനുഷ്യാവകാശ കമ്മീഷണര്‍ ഇരുപ്രദേശങ്ങളും സന്ദര്‍ശിച്ച് കഴിയുന്നത്ര വസ്തുനിഷ്ഠമായി കാര്യങ്ങള്‍ വിലയിരുത്തണം. അതിലൂടെ എന്താണ് യാഥാര്‍ത്ഥ്യമെന്ന് ലോകത്തിന് മനസിലാക്കാമെന്നും വിദേശകാര്യമന്ത്രി വ്യക്തമാക്കി.

സമാധന ചര്‍ച്ചകളെ അദ്ദേഹം തള്ളിക്കളയുന്നുമുണ്ട്. ഒരു ബഹുമുഖ ഫോറത്തിലോ മൂന്നാം കക്ഷിയുടെ മധ്യസ്ഥതയോ വേണ്ടി വരും. അമേരിക്ക അത്തരമൊരു കര്‍ത്തവ്യം ഏറ്റെടുക്കുകയാണെങ്കില്‍ നന്നായിരിക്കും. അവര്‍ക്ക് മേഖലയില്‍ കാര്യമായ സ്വാധീനമുണ്ടെന്നും ഷാ മഹ്മൂദ് ഖുറേഷി പറഞ്ഞു. കാശ്മീര്‍ വിഷയത്തില്‍ ബാഹ്യ ഇടപെടലുകള്‍ പാടില്ലെന്ന ഇന്ത്യന്‍ നിലപാടുകള്‍ക്ക് എതിരായാണ് പാകിസ്താന്‍ മന്ത്രിയുടെ ഈ നിലപാട്.

അതേസമയം പാകിസ്താന്റെ നിലപാടുകളെ ഇന്ത്യ സസൂക്ഷ്മം നിരീക്ഷിക്കുകയാണ്. എന്തെങ്കിലും പ്രകോപനമുണ്ടായാല്‍ ശക്തമായി തന്നെ തിരിച്ചടിക്കുന്നതാണ്. അതിര്‍ത്തികളില്‍ മതിയായ സേനകളെ സജ്ജമാക്കിയിട്ടുണ്ട്.
പാക് അധീന കാശ്മീരിനെപ്പറ്റിയും വ്യക്തമായ സൂചന ഇന്ത്യ നല്‍കുന്നുണ്ട്. അതിന്റെ അവസാനത്തെ ഉദാഹരണമാണ് കരസേന മേധാവി ബിപിന്‍ റാവത്തയുടെ പ്രസ്താവന. പാക് അധീന കശ്മീര്‍ നേടിയെടുക്കുന്നതിനായി എന്തിനും തയ്യാറാണെന്ന് കരസേനാ മേധാവി വ്യക്തമാക്കി. കേന്ദ്ര സര്‍ക്കാരാണ് ഇക്കാര്യത്തില്‍ തീരുമാനം എടുക്കേണ്ടത്. കേന്ദ്ര സര്‍ക്കാരിന്റെ ഏത് നിര്‍ദ്ദേശവും നടപ്പാക്കാന്‍ കരസേന തയ്യാറാണ്. പാക് അധീന കശ്മീരിനെ ഇന്ത്യയുടെ ഭാഗമാക്കുകയാണ് ഇനി ലക്ഷ്യമെന്നാണ് കരസേനാ മേധാവി വ്യക്തമാക്കിയത്.

ഇനി പാകിസ്താനുമായി ചര്‍ച്ച നടത്തുന്നത് പാക് അധിനിവേശ കാശ്മീരിന്റെ വിഷയത്തില്‍ മാത്രമായിരിക്കുമെന്ന് നേരത്തെ പ്രതിരോധമന്ത്രി രാജ്‌നാഥ് സിങ് അഭിപ്രായപ്പെട്ടിരുന്നു. ആണവായുധം ആദ്യം ഉപയോഗിക്കില്ലെന്ന നിലപാട് ഇന്ത്യ പുന:പരിശോധിക്കുമെന്നും രാജ്‌നാഥ് വ്യക്തമാക്കിയിരുന്നു. ഈ പശ്ചാത്തലത്തിലാണ് സൈന്യം എന്തിനും തയാറാണെന്ന പ്രസ്താവനയുമായി കരസേന മേധാവി രംഗത്തെത്തിയത്.

അതേസമയം തന്നെ കശ്മീര്‍ വിഷയത്തില്‍ അന്താരാഷ്ട്ര സമൂഹത്തില്‍നിന്ന് തുടര്‍ച്ചയായ തിരിച്ചടികളാണ് പാകിസ്താന്‍ നേരിടുന്നത്. ഏറ്റവുമൊടുവില്‍ യു.എന്‍. സെക്രട്ടറി ജനറല്‍ പോലും കശ്മീര്‍ വിഷയത്തില്‍ ഇടപെടില്ലെന്ന് വ്യക്തമാക്കിയതോടെ പാകിസ്താന്‍ വീണ്ടും ഒറ്റപ്പെടുകയും ചെയ്തു. ലോകത്തിന്റെ പലഭാഗത്ത് നിന്നും തിരിച്ചടി നേരിട്ടിട്ടും പാക് അധീന കശ്മീരില്‍ ഇമ്രാന്‍ ഖാന്‍ വന്‍ പ്രതിഷേധ സമ്മേളനത്തിന് ആഹ്വാനം ചെയ്തിരിക്കുകയാണ്. കശ്മീര്‍ വിഷയത്തില്‍ അന്താരാഷ്ട്ര സമൂഹത്തിന്റെ ശ്രദ്ധലഭിക്കാന്‍ വേണ്ടിയാണ് പാക് പ്രധാനമന്ത്രി വെള്ളിയാഴ്ച മുസാഫറബാദില്‍ പ്രതിഷേധ റാലി സംഘടിപ്പിക്കുന്നത്. എന്നാല്‍ ഇത് പാകിസ്താന് തന്നെ തിരിച്ചടി നല്‍കുമെന്നാണ് ഇന്ത്യ കരുതുന്നത്.