കെപിസിസി മുന്‍ ഭാരവാഹിയായ പ്രമുഖ മന്ത്രിയുള്‍പ്പടെ സംസ്ഥാനത്തെ കോണ്‍ഗ്രസ് മന്ത്രിമാര്‍ക്ക് ബാറുടമകള്‍ കോഴയായി നല്‍കിയത് എട്ടുകോടി രൂപ. ബാര്‍ ഓണേഴ്‌സ് അസോസിയേഷന്റെ കയ്യിലുള്ള \'സീക്രട്ട് ബുക്കിലാണ് മന്ത്രിമാരുടെ പേരുകളുള്ളത്. സംഘടനയുടെ ഒരു പ്രമുഖ ഭാരവാഹിയുടെ കൈയിലാണ് ഈ ബുക്കെന്ന് റിപ്പോര്‍ട്ട്.
ബാര്‍ ലൈസന്‍സ് പുതുക്കുന്നതിനുള്ള ഫീസ് കുറയ്ക്കാന്‍ രണ്ടുവര്‍ഷംമുമ്പ് മൂന്ന് മന്ത്രിമാര്‍ക്ക് മാത്രമായി ഏഴരക്കോടി രൂപയും മറ്റൊരു മന്ത്രിക്ക് സമീപകാലത്ത് അരക്കോടി രൂപയും നല്‍കിയതായാണ് ബുക്കിലുള്ളത്. ഇതിനെ കുറിച്ച് ബാര്‍ ഹോട്ടല്‍ അസോസിയേഷന്‍ സംഘടനാ ഭാരവാഹികള്‍ പുറത്തുവിടാത്ത ശബ്ദരേഖയിലുണ്ടന്നും റിപ്പോട്ടിലുണ്ട്.
2012ലെ ബജറ്റില്‍ ബാര്‍ ലൈസന്‍സ് പുതുക്കുന്നതിനുള്ള ഫീസ് 22 ലക്ഷത്തില്‍നിന്ന് 30 ലക്ഷമാക്കാന്‍ സര്‍ക്കാര്‍ തത്വത്തില്‍ തീരുമാനിച്ചിരുന്നു. ഇതറിഞ്ഞ ബാറുടമകള്‍ ഏഴരക്കോടി രൂപയ്ക്ക് കോഴകൊടുത്ത് ഫീസ് 23 ലക്ഷം രൂപയാക്കി കുറച്ചു. ബാറുടമകളുമായി നിരന്തരം ബന്ധമുള്ള ഒരു മന്ത്രിയും ഇടനിലക്കാരും ബാര്‍ സംഘടനാ ഭാരവാഹികളും നടത്തിയ മാരത്തോണ്‍ ചര്‍ച്ചയിലാണ് കോഴ ഉറപ്പിച്ചത്. ബജറ്റവതരണത്തിനു മുമ്പുതന്നെ ഈ പണം മൂന്ന് കോണ്‍ഗ്രസ് മന്ത്രിമാര്‍ക്ക് വീതിച്ചു നല്‍കുകയായിരുന്നു. തലസ്ഥാന ജില്ലയുമായി അടുത്ത ബന്ധമുള്ള നാലാമന് \'അടിയന്തര\' ആവശ്യം നിറവേറ്റാന്‍ രണ്ടുതവണയായി 25 ലക്ഷം രൂപ വീതമാണ് നല്‍കിയത്. മുമ്പ് ഉമ്മന്‍ചാണ്ടിക്ക് ജാഥയുടെ ചെലവിലേക്കെന്നു പറഞ്ഞ് 25 ലക്ഷം നല്‍കിയെന്ന് ബിജു രമേശ് മുമ്പ് വെളിപ്പെടുത്തിയിരുന്നു.
വിവാദമായ സാമ്പത്തിക തട്ടിപ്പ് കേസ് ഒതുക്കാന്‍ കോണ്‍ഗ്രസ് എംഎല്‍എക്കും പണം നല്‍കിയിരുന്നു. ഇതിന് പുറമെയാണ് എട്ടുകോടി രൂപ കോണ്‍ഗ്രസ് മന്ത്രിമാര്‍ക്ക് നല്‍കിയത്. ഇതില്‍ ഒരു മന്ത്രി കെപിസിസി ഭാരവാഹിയായിരിക്കെ രണ്ടുകോടി രൂപയാണ് വാങ്ങിയത്.തലസ്ഥാനത്തെ രണ്ട് ബാറുടമകളാണ് \'നാലാമന്\' പണം കൈമാറിയത്. ആദ്യം 25 ലക്ഷംരൂപ ബാറുടമ കൈമാറി. ഏതാനും ദിവസം കഴിഞ്ഞപ്പോള്‍ ഒരു മാധ്യമസ്ഥാപനത്തിനെന്നുപറഞ്ഞ് 25 ലക്ഷം രൂപകൂടി ആവശ്യപ്പെടുകയായിരുന്നു. എന്നാല്‍ 25 ലക്ഷത്തില്‍നിന്ന് 10 ലക്ഷംരൂപമാത്രമാണ് മാധ്യമസ്ഥാപനത്തിന് ലഭിച്ചതെന്നറിയുന്നു.
ഇതിനുപുറമെ യുഡിഎഫ് സര്‍ക്കാര്‍ അധികാരമേറ്റയുടന്‍ ബാര്‍ ലൈസന്‍സിന് പ്രത്യേക പിരിവ് ഏര്‍പ്പെടുത്തിയതായി ബാര്‍ ഹോട്ടല്‍ ഓണേഴ്‌സ് അസോസിയേഷന്റെ ഒരു ഭാരവാഹി പറഞ്ഞു. വിദേശമദ്യ ലൈസന്‍സിന് 30 ലക്ഷവും ബിയര്‍വൈന്‍ പാര്‍ലര്‍ ലൈസന്‍സിന് 15 ലക്ഷം രൂപയുമാണ് നിരക്ക്. ഒരു മന്ത്രിയുടെ അടുപ്പക്കാരനായ എറണാകുളം സ്വദേശിയാണ് ഈ പണം ശേഖരിച്ചിരുന്നത്.
(കടപ്പാട് ദേശാഭിമാനി)

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha