സ്വാഭാവിക മരണമെന്ന് കരുതി സംസ്കരിക്കാന് തയാറെടുക്കുന്നതിനിടെ പൊലീസിനു ലഭിച്ച രഹസ്യ സന്ദേശത്തെ തുടര്ന്ന് പോസ്റ്റ്മോര്ട്ടം നടത്തി, ഭര്ത്താവ് കൊലപ്പെടുത്തിയതാണെന്ന് കണ്ടെത്തി!
എറണാകുളം ഗാന്ധിനഗര് ഉദയാ കോളനി 103-ാം നമ്പര് വീട്ടില് സുരേഷിന്റെ ഭാര്യ പ്രേമലതയുടേത് സ്വാഭാവിക മരണമെന്നു കരുതി സംസ്കരിക്കാന് തയ്യാറെടുക്കുന്നതിനിടെ പോലീസെത്തി ജഡം പോസ്റ്റ്മോര്ട്ടത്തിനയച്ചു.
പൊലീസിനു ലഭിച്ച രഹസ്യ സന്ദേശത്തെ തുടര്ന്നാണ് പരിശോധിച്ചതും പോസ്റ്റ്മോര്ട്ടത്തിനു വിധേയമാക്കിയതും. പോസ്റ്റ്മോര്ട്ടം റിപ്പോര്ട്ടില് നിന്നും അതൊരു സ്വാഭാവിക മരണമല്ല, കൊലപാതകം ആയിരുന്നുവെന്ന് വ്യക്തമായി. ഭര്ത്താവ് സുരേഷ് തന്നെയാണ് കൊലപ്പെടുത്തിയതെന്നും അന്വേഷണത്തില് വ്യക്തമായി.
വീട്ടില് സുരേഷിനോടും ഭാര്യയോടുമൊപ്പം മകനും, മകളും മകളുടെ ഭര്ത്താവും താമസിക്കുന്നുണ്ട്. തിരുവോണ ദിവസം രാവിലെ മദ്യപിക്കുന്നതിനിടെ സുരേഷ് ഭാര്യയുമായി വഴക്കുണ്ടാക്കി. മാതാപിതാക്കളുടെ വഴക്കു പതിവായതിനാലും മദ്യലഹരിയില് ആയിരുന്നതിനാലും മക്കള് അത്ര കാര്യമാക്കിയില്ല. എന്നാല്, വഴക്കിനിടെ മര്ദനമേറ്റ പ്രേമലത വാരിയെല്ലു പൊട്ടി രക്തം വാര്ന്നു മരിക്കുകയായിരുന്നെന്ന് പൊലിസ് പറയുന്നു.
പിറ്റേന്നു രാവിലെ സാധാരണ മരണമെന്നു പറഞ്ഞു സുരേഷ് ആളുകളെ തെറ്റിദ്ധരിപ്പിക്കുകയും സംസ്കാരത്തിന് ഒരുങ്ങുകയും ചെയ്തു. അസ്വാഭാവികത തോന്നിയ അയല്വാസികള് സംശയം പൊലീസില് അറിയിക്കുകയായിരുന്നു.
കടവന്ത്ര പൊലീസ് മൃതദേഹത്തിന്റെ ഇന്ക്വസ്റ്റ് തയാറാക്കി പോസ്റ്റ്മോര്ട്ടത്തിന് അയച്ചു. ഇതോടെയാണ് കൊലപാതകമെന്നു വ്യക്തമായത്. ചോദ്യം ചെയ്യലില് സുരേഷ് കുറ്റം സമ്മതിച്ചതിനെ തുടര്ന്ന് അറസ്റ്റ് രേഖപ്പെടുത്തി. എറണാകുളം ടൗണ് എസിപി കെ. ലാല്ജിയുടെ നേതൃത്വത്തില് പാലാരിവട്ടം സിഐ രാജപ്പന്, കടവന്ത്ര എസ്ഐ തോമസ് മോര്ഗന് എന്നിവരാണു പ്രതിയെ അറസ്റ്റ് ചെയ്തത്.
https://www.facebook.com/Malayalivartha
