കെ.കരുണാകരന്‍ ട്രസ്റ്റിന്റെ പേരില്‍ തുടങ്ങിയ ആശുപത്രി കെട്ടിടം പണിത കരാറുകാരന് പണം നല്‍കാത് ട്രസ്റ്റ് ഭാരവാഹികളായ കോണ്‍ഗ്രസ് നേതാക്കള്‍ വഞ്ചിച്ചെന്ന് കെ.പി.സി.സി സമിതി. സമിതി നടത്തിയ അന്വേഷണത്തിലാണ് ഇക്കാര്യം വ്യക്തമായത്. കുറ്റക്കാരായ ട്രസ്റ്റ് ഭാരവാഹികള്‍ക്കെതിരെ നടപടിയെടുക്കാന്‍ കെ.പി.സി.സിക്ക് ശുപാര്‍ശ നല്‍കുമെന്നും സമിതി അറിയിച്ചു. പ്രശ്‌നം കൈകാര്യം ചെയ്തതില്‍ വീഴ്ച സംഭവിച്ചത് പാര്‍ട്ടിക്ക് പൊതുജനമധ്യത്തില്‍ അവമതിപ്പ് സൃഷ്ടിച്ചെന്നും ഇവര്‍ പറഞ്ഞു. റിപ്പോര്‍ട്ട് കൈ.പി.സി.സിക്ക് കൈമാറി.

കണ്ണൂരിലെ ലീഡര്‍ കെ കരുണാകരന്‍ മെമ്മോറിയല്‍ സഹകരണ ആശുപത്രിയുടെ കരാറുകാരന്‍ ചെറുപുഴ സ്വദേശി മുതുവാറക്കുന്നേല്‍ ജോസഫിനെയാണ് (55) ആശുപത്രി കെട്ടിടത്തിനു മുകളില്‍ കൈ ഞരമ്പ് മുറിച്ച് രക്തം വാര്‍ന്നു മരിച്ച നിലയില്‍ രണ്ടാഴ്ച മുമ്പ് കണ്ടെത്തിയത്. സംഭവ സ്ഥലത്ത് നിന്ന് ആത്മഹത്യാ കുറിപ്പ് കണ്ടെത്തിയിരുന്നു. ഇതില്‍ കടം കൊടുക്കാനുള്ളവരുടെയും തരാനുള്ളവരുടെയും പേരുകളുണ്ടായിരുന്നു. ആശുപത്രി നിര്‍മാണ ചെലവിലേക്കായി കോണ്‍ഗ്രസ് നേതൃത്വം പൊതു ജനങ്ങളിന്‍ നിന്ന് രണ്ട് കോടി രൂപയാണ് പിരിച്ചെടുത്തതെന്ന് പ്രദേശ വാസികള്‍ പറയുന്നു. എന്നിട്ടും ജോസഫിന് നല്‍കാനുള്ള ഒരു കോടി 34 ലക്ഷം കൊടുത്തില്ല.

പ്രദേശത്ത് കോണ്‍ഗ്രസിനെതിരെ ശക്തമായ പ്രതിഷേധം ഉയര്‍ന്നതിനെ തുടര്‍ന്നാണ് കെ.പി.സി.സി സമിതിയെ അന്വേഷണത്തിന് നിയമിച്ചത്. ജോസഫ് മരിച്ച ദിവസം ഒത്തുതീര്‍പ്പ് ചര്‍ച്ചകള്‍ നടന്നിരുന്നു. അതിന് ശേഷം ജോസഫിനെ കാണാതാവുകയായിരുന്നു. ഇതേ തുടര്‍ന്ന് വീട്ടുകാര്‍ പൊലീസില്‍ പരാതി നല്‍കിയിരുന്നു. ഇടപാട് തീര്‍ക്കുന്നത് സംസാരിക്കാനായി ചില കോണ്‍ഗ്രസ് നേതാക്കള്‍ ജോസഫിനെ ആശുപത്രിയിലേക്കു വിളിപ്പിച്ചിരുന്നു. അവിടെ എന്താണ് സംഭവിച്ചതെന്ന് അറിയില്ലെന്ന് ബന്ധുക്കള്‍ പറഞ്ഞിരുന്നു. ജോസഫിനെ കാണാതായതോടെ ഫോണിലും ബന്ധപ്പെടാന്‍ കഴിഞ്ഞില്ല. രാത്രിയില്‍ തെരച്ചില്‍ നടത്തിയിരുന്നു. കെ. കരുണാകരന്റെ പേരില്‍ പണിയ ആശുപത്രിയുടെ നിര്‍മാണത്തിനായി കോടിക്കണക്കിന് രൂപ പിരിച്ചെടുത്തതായി ആക്ഷേപം ഉയര്‍ന്നിരുന്നു. കരാറുകാരനെ നേതാക്കള്‍ സമ്മര്‍ദ്ദത്തിലാക്കിയോ, മാനസികമായി പീഡിപ്പിച്ചിരുന്നോ തുടങ്ങിയ കാര്യങ്ങള്‍ അന്വേഷിക്കണമെന്ന് ബന്ധുക്കള്‍ ആവശ്യപ്പെട്ടു.

സംഭവം വിവാദമായതോടെ രാഷ്ട്രീയ മുതലെടുപ്പിന് സി.പി.എം കണ്ണൂര്‍ ജില്ലാകമ്മിറ്റി ശ്രമം തുടങ്ങിയിരുന്നു. ഇതിന്റെ ഭാഗമായി പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചിരുന്നു. ആത്മഹത്യാപ്രേരണ കുറ്റത്തിന് കേസ് എടുക്കണമെന്നായിരുന്നു അവരുടെ ആവശ്യം. കെ. കരുണാകരന്റെ പേരില്‍ ഇത്തരം വിവാദങ്ങള്‍ ഉണ്ടാകുന്നത് അനുവദിക്കാനാകില്ലെന്നും ഇത്തരം ട്രസ്റ്റുകള്‍ ആരംഭിക്കുന്നവര്‍ കുടുംബാംഗങ്ങളുടെ അനുവാദം വാങ്ങണമെന്ന് കെ. മുരളീധരന്‍ എം.പി വ്യക്തമാക്കി. അതിന് പിന്നാലെയാണ് കെ.പി.സി.സി സമിതിയെ നിയമിച്ചത്. ചെറുപുഴ സ്വദേശി ജോയിയെ ഈ മാസമാദ്യമാണ് മരിച്ച നിലയില്‍ കണ്ടെത്തിയത്. ജോയിയെ കാണാനില്ലെന്ന ബന്ധുക്കളുടെ പരാതിയിന്മേല്‍ അന്വേഷണം നടത്തവേയാണ് കെട്ടിടത്തിനു മുകളില്‍ ആത്മഹത്യ ചെയ്ത നിലയില്‍ അദ്ദേഹത്തെ കണ്ടെത്തിയത്. കൈഞരമ്പ് മുറിച്ച നിലയിലായിരുന്നു മൃതദേഹം. മരണത്തില്‍ ദുരൂഹതയുണ്ടെന്ന് കുടുംബാംഗങ്ങള്‍ ആരോപിച്ചിരുന്നു.