മോഹന്‍ലാല്‍ സര്‍ക്കാരിന് പണം തിരികെ നല്‍കാന്‍ തീരുമാനിച്ചത് തിരുവനന്തപുരത്ത് നടന്ന മാരത്തന്‍ ചര്‍ച്ചയില്‍. മലയാളത്തിലെ പ്രമുഖ നിര്‍മാതാവും ഒരു ചാര്‍ട്ടേഡ് അക്കൗണ്ടന്റുമാണ് ചര്‍ച്ചകള്‍ക്ക് ചുക്കാന്‍ പിടിച്ചത്. ഇത്രയും വിവാദങ്ങള്‍ ഉണ്ടായ സ്ഥിതിയ്ക്ക് പണം തിരികെ നല്‍കുന്നതാണ് നല്ലതെന്നും അല്ലെങ്കില്‍ സമീപ ഭാവിയില്‍ വിജിലന്‍സ് അന്വേഷണം ഉള്‍പ്പടെയുള്ള നടപടികള്‍ നേരിടേണ്ടി വരുമെന്നും ഇവര്‍ ഉപദേശിച്ചതായാണ് സൂചന. ഇതിനെ തുടര്‍ന്നാണ് മോഹന്‍ലാല്‍ പണം തിരികെ നല്‍കാമെന്ന് സര്‍ക്കാരിനെ അറിയിച്ചത്.
മോഹന്‍ലാല്‍ പണം നല്‍കാന്‍ തീരുമാനിച്ചുവെങ്കിലും അത് വാങ്ങണോ എന്ന കാര്യത്തില്‍ സര്‍ക്കാരില്‍ ആശയക്കുഴപ്പം തുടങ്ങി. പണം തിരികെ വാങ്ങെണ്ടെന്ന് ഒരുകൂട്ടര്‍ പറയുമ്പോള്‍ വാങ്ങാതിരിക്കുന്നതെങ്ങനെ എന്ന ചോദ്യം മറ്റൊരു കൂട്ടര്‍ ഉയര്‍ത്തുന്നു. ഇക്കാര്യത്തില്‍ ഇതുവരെ തീരുമാനമൊന്നും എടുത്തിട്ടില്ലെന്ന് മന്ത്രി തിരുവഞ്ചൂര്‍ രാധാകൃഷ്ണന്‍ പറഞ്ഞത്. ഇക്കാര്യം പലരുമായി ചര്‍ച്ച ചെയ്യേണ്ടതുണ്ടെന്നും അദ്ദേഹം വ്യക്തമാക്കി.
അതേസമയം, ഇക്കാര്യത്തില്‍ സര്‍ക്കാര്‍ വെട്ടിലായിരിക്കുകയാണെന്നാണ് സൂചന. ലാലിന്റെ പക്കല്‍ നിന്ന് പണം തിരികെ വാങ്ങിയാലും ഇല്ലെങ്കിലും സര്‍ക്കാര്‍ നാണംകെടും. ദേശീയ ഗെയിംസിന് അനുവദിച്ച തുക തിരികെ വാങ്ങുന്നതോടെ സംഗതി പാളിപ്പോയെന്ന വിമര്‍ശകരുടെ വാദത്തിന് കീഴടങ്ങിയെന്ന പഴി കേള്‍ക്കേണ്ടിവരും. വാങ്ങാതിരുന്നാല്‍ അതും കുഴപ്പമാകും. രണ്ടായാലും പരിപാടി നടത്തിപ്പില്‍ പിഴവ് സംഭവിച്ചുവെന്ന് സര്‍ക്കാരിന് സമ്മതിക്കേണ്ടിവരും.
എ.ആര്‍. റഹ്മാന്റെ സംഗീത വിരുന്നാണ് സംഘാടകര്‍ ഉദ്ദേശിച്ചിരുന്നത്. എന്നാല്‍, മൂന്നുകോടി രൂപയാണ് അദ്ദേഹം പ്രതിഫലമായി ആവശ്യപ്പെട്ടത്. മാത്രമല്ല, മറ്റു ചെലവുകള്‍ കൂടിയാകുമ്പോള്‍ ആറുകോടിയാകും. തുടര്‍ന്നാണ് അതൊഴിവാക്കി ലാലിനെ സമീപിച്ചത്. ലാലിസം വിവാദമായതോടെ പണം തിരിച്ചുകൊടുക്കാന്‍ ലാല്‍ തയ്യാറായി. എന്നാല്‍, നിര്‍ബന്ധിച്ച് ഏല്‍പ്പിച്ച പരിപാടിക്കെതിരെ വിമര്‍ശനം ഉയര്‍ന്നപ്പോള്‍ പണം തിരികെ വാങ്ങി തടിയൂരാന്‍ സര്‍ക്കാരിന് കഴിയില്ലെന്നാണ് ചിലര്‍ വ്യക്തമാക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha