ബാര്‍ മുതലാളിമാരുടെ കള്ളപ്പണത്തെ കുറിച്ച് അന്വേഷിക്കാന്‍ എന്‍ഫോഴ്‌മെന്റെ ബാര്‍ മുതലാളിമാരുടെ വീട്ടിലും സ്ഥാപനങ്ങളിലും റെയ്ഡ് നടത്തി.എലഗന്‍സ് ഗ്രൂപ്പിന്റെ ഉടമസ്ഥതയിലുള്ള ബാറുകളിലടക്കം 25 കേന്ദ്രങ്ങളിലാണ് റെയ്ഡ്. എലഗന്‍സ് ഉടമകളുടെയും പങ്കാളികളുടെയും മാനേജര്‍മാരുടെയും വീടുകളിലും ഫഌറ്റുകളിലും എന്‍ഫോഴ്‌സ്‌മെന്റെ അധികൃതര്‍ റെയ്ഡ് നടത്തി. അതോടൊപ്പം കൊല്ലത്തെ വ്യവസായി സുനില്‍സ്വാമിയുടെ വീട്ടിലും റെയ്ഡുണ്ടായിരുന്നു.ബാര്‍ ആരോപണത്തില്‍ പെട്ട മന്ത്രി കെഎം മാണിയ്‌ക്കെതിരെ ലോകായുക്ത തെളിവില്ലെന്ന് പറഞ്ഞതിന് പിന്നാലെയാണ് ബാര്‍ മുതലാളിമാരുടെ വീട്ടില്‍ എന്‍ഫോഴ്‌സ്‌മെന്റ് റെയ്ഡ് നടത്തിയത്.
ഇന്നലെ വൈകിട്ട് ആറിന് എറണാകുളം കോട്ടയം ജില്ലകളിലെ എലഗന്‍സ് ബാറുകളിലും ഉടമകളുടെ വീടുകളിലും ഒരേസമയമാണ് റെയ്ഡ് ആരംഭിച്ചത്. കോട്ടയം ജില്ലയില്‍ കിടങ്ങൂര്‍, കാഞ്ഞിരപ്പള്ളി, എറണാകുളം ജില്ലയില്‍ അങ്കമാലി, കറുകുറ്റി, പെരുമ്പാവൂര്‍ എന്നിവിടങ്ങളിലുള്ള എലഗന്‍സ് ഗ്രൂപ്പിന്റെ ബാറുകളിലായിരുന്നു റെയ്ഡ്. തൃപ്പൂണിത്തുറയിലെ രണ്ട് ആഡംബര ഫഌറ്റുകള്‍, അങ്കമാലിയിലെ വീട് എന്നിവിടങ്ങളിലും പരിശോധന നടന്നു. എലഗന്‍സ് ബാര്‍ ഉടമ ബിനോയിയുടെ പാലായിലുമുള്ള വീടുകളിലും റെയ്ഡ് നടത്തി.
ആദായനികുതി വകുപ്പ്, സെയില്‍ ടാക്‌സ് വിഭാഗങ്ങള്‍ സംയുക്തമായാണു പരിശോധിക്കുന്നത്. നിരവധി രേഖകള്‍ പിടിച്ചെടുത്തിട്ടുണ്ടെന്നാണു വിവരം. അഞ്ച് ഉദ്യോഗസ്ഥര്‍ വീതമുള്ള രണ്ടു സംഘങ്ങളായിട്ടാണ് പരിശോധന. ബാറുകളില്‍ പത്തംഗസംഘമാണ് പരിശോധന നടത്തുന്നത്. പൂട്ടിയ 418 ബാറുകള്‍ തുറന്നു നല്‍കരുതെന്ന് ആവശ്യപ്പെട്ട് കോഴ നല്‍കിയെന്ന ബിജു രമേശിന്റെ ആരോപണമാണ് റെയ്ഡിനാധാരം. എലഗന്‍സ് ഗ്രൂപ്പിന് അഞ്ചു ജില്ലകളിലായി ഒമ്പതു ബാറുകളാണുള്ളത്.
അങ്കമാലിയില്‍ കള്ള്ഷാപ്പുകള്‍ ലേലത്തിനെടുത്തു നടത്തിയിരുന്ന ബിനോയിയും സംഘവും ആദ്യബാര്‍ ആരംഭിച്ചത് കറുകുറ്റിയിലാണ്. തുടര്‍ന്ന് ഏഴുകൊല്ലത്തിനുള്ളിലാണ് എലഗന്‍സ് ഗ്രൂപ്പ് ഒമ്പതു ബാറുകള്‍ സ്വന്തമാക്കിയത്. ചെറിയ കാലയളവിനുള്ളില്‍ കോടിക്കണക്കിനു രൂപ വരുന്ന ബാറുകള്‍ കെട്ടിപ്പൊക്കിയതും മന്ത്രി മാണിക്കുകോഴ നല്‍കാനുമുള്ള പണവും മറ്റും എവിടെ നിന്നാണു ലഭിച്ചത് എന്നൊക്കെയാണ് അന്വേഷിക്കുന്നത്.
സര്‍ക്കാര്‍ മദ്യനയം രൂപികരിച്ച് 418 ബാറുകള്‍ പൂട്ടിയപ്പോള്‍ ഇവരുടെ ഉടമസ്ഥതയിലുള്ള ഒരു ബാറിനുമാത്രമാണു താഴു വീണത്. ഫോര്‍ സ്റ്റാര്‍ പദവിയുള്ള എലഗന്‍സിന്റെ എട്ടു ബാറുകള്‍ തുറന്നു പ്രവര്‍ത്തിച്ചു. ഇക്കാലയളവില്‍ കോടികള്‍ ലാഭമുണ്ടാക്കിയ എലഗന്‍സ് ഉടമകള്‍ പൂട്ടിയ ബാറുകള്‍ തുറക്കാതിരിക്കാനാണ് കോഴ കൈമാറിയതെന്നാണു പരാതി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha