ലാലിസത്തിന്റെ വിവാദം തീരും മുമ്പേ സര്‍ക്കാരിനെ പ്രതിരോധത്തിലാക്കി ചീഫ് സെക്രട്ടറി. ദേശീയ ഗെയിംസ് സംഘാടനത്തില്‍ ഗുരുതരമായ പിഴവുപറ്റിയെന്ന് ചീഫ് സെക്രട്ടറി ജിജിതോംസണിന്റെ പ്രസ്താവനയില്‍ കായിക മന്ത്രി തിരുവഞ്ചൂര്‍ രാധാകൃഷ്ണന് കടുത്ത അതൃപ്തി. സര്‍ക്കാരിന്റെ അഭിപ്രായം താനാണ് പറയേണ്ടതെന്ന് മന്ത്രി തുറന്നടിച്ചു. ചീഫ് സെക്രട്ടറിയുടെ പരാമര്‍ശത്തില്‍ തിരുവഞ്ചൂര്‍ മുഖ്യമന്ത്രിയെയും അതൃപ്തി അറിയിച്ചു. ചീഫ് സെക്രട്ടറിക്ക് പിന്തുണയുമായി ആഭ്യന്തര മന്ത്രി രമേശ് ചെന്നിത്തലയും എത്തിയതോടെ രംഗം കൊഴുത്തു. 
ഉദ്ഘാടനച്ചടങ്ങില്‍ പിഴവുകളുണ്ടായിട്ടുണ്ടെങ്കില്‍ സമാപനച്ചടങ്ങില്‍ അതു സംഭവിക്കാതിരിക്കാനുള്ള നിര്‍ദേശങ്ങള്‍ മുന്നോട്ടുവയ്ക്കുക മാത്രമാണു ചീഫ് സെക്രട്ടറി ചെയ്തതെന്നാണു മനസ്സിലാകുന്നതെന്നു ചെന്നിത്തല പറഞ്ഞു.ഗെയിംസ് സംഘാടനത്തിലെ പാളിച്ചകള്‍ തിരുത്തി മുന്നോട്ടുപോകാനും ബോധപൂര്‍വം പിഴവു വരുത്തിയ ഉദ്യോഗസ്ഥര്‍ക്കെതിരെ നടപടിയെടുക്കാനും ചീഫ് സെക്രട്ടറി നിര്‍ദേശിച്ചു. മേളയുടെ ഉദ്ഘാടനത്തിനായി 15 കോടി തീരുമാനിച്ചത് ഗെയിംസ് സെക്രട്ടേറിയറ്റല്ല സര്‍ക്കാരാണെന്ന് വ്യക്തമാക്കി ഗെയിംസ് സിഇഒ. ജേക്കബ്ബ് പുന്നൂസും പറഞ്ഞതും മന്ത്രിയെ ചൊടിപ്പിച്ചു.

ചീഫ് സെക്രട്ടറിയായി ജിജി തോംസണ്‍ ചുമതലയേറ്റിട്ട് ദിവസങ്ങളേ ആയിട്ടുള്ളൂ. കോമണ്‍വെല്‍ത്ത് ഗെയിംസ് നടത്തിപ്പിലെ അനുഭവ സമ്പത്തുമായി ദേശീയ ഗെയിംസിനെ നേരെയാക്കാന്‍ ജിജി തോംസണ്‍ ഇന്നലെയാണ് ഉന്നതതല യോഗം വിളിച്ചത്. അതിന് ശേഷമാണ് ഗെയിംസിനെ വിമര്‍ശിച്ചത്. ഓണാഘോഷം നടത്തുന്നതു പോലെയാണ് ഗെയിംസ് നടത്തുന്നതെന്നായിരുന്നു പരാതി. മാദ്ധ്യമങ്ങളോടും പരസ്യമായി ചിലത് പറഞ്ഞു. ഇതാണ് കായിക മന്ത്രിയെ ക്ഷോഭിപ്പിച്ചത്. ഇക്കാര്യത്തിലുള്ള അസന്തുഷ്ടി മുഖ്യമന്ത്രി ചീഫ് സെക്രട്ടറിയെ അറിയിച്ചിട്ടുമുണ്ട്.
കായിക മേളയുടെ ഉദ്ഘാടനച്ചടങ്ങുകള്‍ വിവാദത്തില്‍ മുങ്ങിയതോടെയാണ് സ്ഥിതി വിലയിരുത്താന്‍ ചൊവ്വാഴ്ച രാവിലെ ചീഫ് സെക്രട്ടറി ഉന്നതോദ്യോഗസ്ഥരുടെ യോഗം വിളിച്ചത്..അനാവശ്യച്ചെലവ് ഒഴിവാക്കണമായിരുന്നു. ഉദ്ഘാടനത്തിന് ചെലവാക്കിയ തുക വളരെ കൂടുതലാണ്. സമാപനച്ചടങ്ങില്‍ പോരായ്മ ഒഴിവാക്കാന്‍ ആവശ്യമായ നിര്‍ദ്ദേശം നല്‍കും. ചെലവ് നിയന്ത്രിക്കാനും കണക്ക് സുതാര്യമാക്കാനും കായിക മന്ത്രിയുമായി ആലോചിച്ച് ആവശ്യമായ ക്രമീകരണം ഏര്‍പ്പെടുത്തുമെന്നും യോഗത്തിനുശേഷം ചീഫ് സെക്രട്ടറി അറിയിച്ചു.
 ഉദ്ഘാടനച്ചടങ്ങിലെ പിഴവിന്റെയും ധൂര്‍ത്തിന്റെയും ഉത്തരവാദിത്വം ഏറ്റെടുക്കാന്‍ തയ്യാറല്ലെന്ന് മന്ത്രി തിരുവഞ്ചൂര്‍ വ്യക്തമാക്കി. ചീഫ് സെക്രട്ടറിയുടെ അഭിപ്രായങ്ങള്‍ക്ക് ഇപ്പോള്‍ മറുപടി പറയുന്നില്ലെന്നു പറഞ്ഞ മന്ത്രി, ഗെയിംസുമായി ബന്ധപ്പെട്ട മുഴുവന്‍ കണക്കും സര്‍ക്കാര്‍ സംവിധാനം ഉപയോഗിച്ച് ഓഡിറ്റ് ചെയ്യണമെന്ന് ആവശ്യപ്പെട്ട് ചീഫ് സെക്രട്ടറിക്ക് കത്ത് നല്‍കിയിട്ടുണ്ടെന്നും പറഞ്ഞു.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha