ബാറുമുതലാളിമാരെല്ലാം ഇപ്പോള്‍ നെട്ടോട്ടമോടുകയാണ്. തനിക്ക് 2000കോടി രൂപയുടെ ആസ്തിയുണ്ടെന്ന് ഒരു മുതലാളി ചാനലിലൂടെ വീമ്പടിച്ചതിന് കണക്കുപറയാനാണ് ആദായ നികുതി വകുപ്പ് ഉദ്യോഗസ്ഥാര്‍ ടിയാനോട് പറഞ്ഞിരിക്കുന്നത്. ചാനലില്‍ സ്ഥിരം അഭിപ്രായ, ആരോപണ തൊഴിലാളിയായ ഈ മുതലാളി മറ്റു ബാറുമുതലാളിമാര്‍ക്കുകൂടി പാരയാവുകയാണ് ചുരുക്കത്തില്‍. ആരുമായി സംസാരിച്ചാലും റിക്കോഡ് ചെയ്തു ആപ്പിലാക്കുന്നതാണ് ഈ മുതലാളിയുടെ തമാശ. ഈ തമാശ ചാനലുകാര്‍ ലൈവായി കാണിച്ചു. തനിക്ക് 2000കോടിയുടെ സ്വത്ത്. കൊള്ളാലോ എങ്കില്‍ പിന്നെ ഇതിനെല്ലാം ടാക്‌സ് അടക്കുന്നുണ്ടോ എന്ന് ആദായ നികുതി വകുപ്പ് അന്വേഷിച്ചു. ഇല്ലെന്നാണ് അവര്‍ക്ക് കിട്ടിയ സൂചന. അവനവന്‍ കുഴിക്കുന്ന കുഴിയില്‍ അവനവന്‍ തന്നെ വീഴുമെന്ന അവസ്ഥ.
വരുമാനത്തിനുള്ള നികുതിക്ക് അപ്പുറം വെല്‍ത്ത് ടാക്‌സും അടക്കണോ എന്ന പേടിയിലാണ് ടിയാനിപ്പോള്‍.
2000 കോടി രൂപയുടെ ആസ്തിക്ക് ഒരു ശതമാനം എന്ന നിലയില്‍ 20 കോടി രൂപയാണ് വെല്‍ത്ത് ടാക്‌സായി അടയ്‌ക്കേണ്ടത്. ഇത് അടച്ചിട്ടില്ലാത്ത സാഹചര്യത്തില്‍ പത്തിരട്ടി വരെ അതായത് 200 കോടി രൂപ വരെ പിഴയായി കൊടുക്കേണ്ടി വരും. ഇതിനൊപ്പം പണം കടമായി നല്‍കി എഴുതി വാങ്ങിയ വസ്തുക്കളുമുണ്ട്. ഇതെല്ലാം കടംകൊടുക്കല്‍ നിയമത്തിന്റെ പരിധിയില്‍ വരുന്നതാണ്. ഇത്തരം ക്രമക്കേടുകള്‍ക്കെല്ലാം മറുപടി പറയേണ്ട അവസ്ഥയിലാണ് ഇയാള്‍.
ചുരുക്കിപ്പറഞ്ഞാന്‍ മാണിയ്ക്ക് 20 കോടി കൊടുത്തെന്നുപറയുന്ന ഇയാള്‍ 200കോടി ഗവണ്‍മെന്റിന് കൊടുക്കാന്‍ പോകുന്നു. പണികിട്ടി ആശാനേ.. 200കോടി പോയി. ഇതിനൊപ്പമാണ് ബാറുടമകള്‍ക്കിടയിലെ ഒറ്റപ്പെടല്‍. വ്യക്തിപരമായ പ്രശ്‌നങ്ങള്‍ കാരണം ടിയാന്‍ നടത്തിയ നീക്കങ്ങള്‍ എല്ലാ ബാറുടമകളേയും ദോഷമായി ബാധിച്ചിട്ടുണ്ട്.
ടിയാന്‍ കാരണം ബാക്കിബാറുകാരും ആസ്തികുറയ്ക്കാനുള്ള ഓട്ടത്തിലാണ്. അവസാനം ജയിലില്‍ പോകുമോ എന്ന പേടിയിലാണ് എല്ലാവരും. ക്രമക്കേടുകള്‍ കണ്ടെത്തിയാല്‍ ബാര്‍ കോഴയില്‍ സിബിഐ അന്വേഷണത്തിന് എന്‍ഫോഴ്‌സ്‌മെന്റ് തന്നെ കേന്ദ്ര സര്‍ക്കാരിന് ശുപാര്‍ശയും നല്‍കുമെന്നാണ് സൂചന. കഴിഞ്ഞ ദിവസം അദായ നികുതി വകുപ്പ് അധികൃതര്‍ റെയ്ഡ് നടത്തിയ സുനില്‍ സ്വാമിക്കും എലഗന്‍സ്് ഗ്രൂപ്പിനും ബാര്‍ കോഴയില്‍ പങ്കുണ്ടെന്ന് ടിയാന്‍ ആരോപിച്ചിരുന്നു. കണക്കില്‍പെടാത്ത സ്വത്ത് കൈവശമുണ്ടെന്ന സൂചനയെത്തുടര്‍ന്നാണ് സുനില്‍ സ്വാമിയുടെ ചെന്നൈയിലെ ഓഫീസിലും കൊല്ലത്തെ വീട്ടിലും ആദായ നികുതി വകുപ്പ് റെയ്ഡ് നടത്തിയത്.
കൊച്ചിയില്‍ നിന്നുള്ള ആദായനികുതി ഉദ്യോഗസ്ഥരാണ് റെയ്ഡ് നടത്തിയത്. കോഴ നല്‍കിയെന്ന് പറയപ്പെടുന്ന തുകയുടെ സ്രോതസ് കണ്ടെത്തുകയും കൈമാറിയത് എങ്ങനെയെന്നുമുള്ള വിവരങ്ങളാണ് ആദായ നികുതി വകുപ്പ് അന്വേഷിക്കുന്നതെന്നാണ് സൂചന. റെയ്ഡുമായി ബന്ധപ്പെട്ട വിവരങ്ങള്‍ വെളിപ്പെടുത്താന്‍ ഉദ്യോഗസ്ഥര്‍ തയ്യാറായിട്ടില്ല.
എന്‍ഫോഴ്‌സ്‌മെന്റ് ചോദ്യം ചെയ്താല്‍ എല്ലാം പറയേണ്ടി വരുമെന്ന ഭയവും ബാറുടമകള്‍ക്ക് ഉണ്ട്. സംസ്ഥാന സര്‍ക്കാരിന് കീഴിലെ വിജിലന്‍സ് ചോദ്യം ചെയ്ത മയം അവിടെ ലഭിക്കില്ല. ആരെല്ലാം എന്തെല്ലാം പറയുമെന്ന് ആര്‍ക്കും ഉറപ്പില്ല. ഇതെല്ലാം ഉണ്ടാക്കിയത് ടിയാന്റെ തെറ്റായ നീക്കങ്ങളാണെന്നാണ് വിമര്‍ശനം. ധനമന്ത്രി കെഎം മാണിക്ക് എതിരായുള്ള വ്യക്തിപരമായ ടിയാന്റെ വൈരാഗ്യം ബാറുടമകള്‍ക്കാണ് പാരയായത്.
ടിയാന്റെ എടുത്തുചാട്ടമാണെന്നാണ് ബാറുടമകളില്‍ ഭൂരി ഭാഗത്തിന്റേയും നിലപാട്. വളരെ എളുപ്പത്തില്‍ പരിഹരിക്കേണ്ട പ്രശ്‌നം ടിയാന്‍ സങ്കീര്‍ണ്ണമാക്കിയെന്നാണ് ആക്ഷേപം. കോഴ വാങ്ങുന്നതും കൊടുക്കുന്നതും ഒരു പോലെ തെറ്റാണെന്ന് അറിഞ്ഞ് കൊണ്ട് നടത്തിയ ടിയാന്റെ നീക്കങ്ങള്‍ അതിരുവിട്ടെന്ന അഭിപ്രായം ബാറുടമകള്‍ക്കുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha