മാണിക്ക് കോഴ നല്‍കിയിട്ടില്ലന്ന് ബാറുടമ ചൈനാ സുനില്‍, ബിജു രമേശ് പറയുന്നത് പച്ചക്കള്ളം
മാണിക്ക് കോഴ നല്‍കിയിട്ടില്ലന്ന് ബാറുടമ ചൈനാ സുനില്‍. കഴിഞ്ഞ ദിവസം വിജിലന്‍സ് എസ്.പി. ആര്‍.സുകേശന് നല്‍കിയ മൊഴിയിലാണ് സുനില്‍ ഇക്കാര്യം പറഞ്ഞത്. ബിജു രമേശ് പുറത്തുവിട്ട ശബ്ദരേഖയുടെ ആധികാരികതയില്‍ സംശയം പ്രകടിപ്പിച്ച സുനില്‍ മാണിക്ക് കോഴ നല്‍കിയിട്ടില്ലെന്ന് പറഞ്ഞു. മാണിക്കോ മറ്റു മന്ത്രിമാര്‍ക്കോ പണം നല്‍കിയിട്ടില്ല. കേസ് നടത്തിപ്പിനായി ബാറുടമകളില്‍നിന്ന് പിരിവുനടത്തിയത് സത്യമാണ്. എന്നാല്‍, അത് കോഴ നല്‍കാനായിരുന്നില്ല. ബാര്‍ ഓണേഴ്‌സ് അസോസിയേഷന്‍ വര്‍ക്കിങ് പ്രസിഡന്റ് ബിജു രമേശ് ഉന്നയിച്ച ആരോപണങ്ങള്‍ മൊഴിയടുക്കല്‍വേളയില്‍ ഇദ്ദേഹം നിഷേധിച്ചു.
ബിജു രമേശ് പറയുന്നതുപോലെ കൊച്ചിയില്‍ അസോസിയേഷന്‍ യോഗം ചേര്‍ന്നതായി ഓര്‍ക്കുന്നില്ലന്നും സുനില്‍ പറഞ്ഞു. അടച്ച ബാറുകള്‍ ഒരിക്കലും തുറക്കാതിരിക്കാന്‍ താന്‍ അഞ്ചുകോടി നല്‍കിയെന്ന് ബാറുടമ അനിമോന്‍ പറയുന്നതായുള്ള സംഭാഷണം ശരിയല്ല. ശബ്ദരേഖയുടെ ആധികാരികത സാങ്കേതിക പരിശോധനയിലൂടെ വ്യക്തമാകുമെന്നും സുനില്‍ പറഞ്ഞു.ഇന്നലെ വൈകീട്ട് മൂന്നുമണിക്ക് പൂജപ്പുരയിലെ വിജിലന്‍സ് സ്‌പെഷ്യല്‍ ഇന്‍െവസ്റ്റിഗേഷന്‍ ഓഫീസിലെത്തിയ സുനിലിനെ ആറുമണി വരെ ചോദ്യംചെയ്തു. ഇദ്ദേഹത്തിന്റെ മൊഴി വീഡിയോയില്‍ പകര്‍ത്തിയിട്ടുണ്ട്.
ചൊവ്വാഴ്ച സുനിലിന്റെ വീട്ടിലും സ്ഥാപനങ്ങളിലും ആദായ നികുതി വകുപ്പ് റെയ്ഡ് നടത്തിയിരുന്നു. എന്നാല്‍ ബാര്‍ ഉടമ ബിജുരമേശിനെ തള്ളിപ്പറഞ്ഞ് നിരവധിപേര്‍ രംഗത്ത് വന്നിട്ടുണ്ട്. ഇവരില്‍ നിന്നെല്ലാം ഒറ്റപ്പെട്ട നിലയിലാണ് ബിജുരമേശ്. ആദായ നികുതി വകുപ്പ് റെയ്ഡ് ആരംഭിച്ചതോട് കൂടി ബാര്‍ മുതലാളിമാര്‍ക്കിടയില്‍ ഭിന്നത രൂക്ഷമായിട്ടുണ്ട്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
