സ്വാമി സന്ദീപാനന്ദഗിരിയുടെ തിരുവനന്തപുരത്തെ ആശ്രമത്തിന് തീയിട്ട കേസില്‍ സത്യം വൈകാതെ തന്നെ തെളിയുമെന്ന് ക്രൈം ബ്രാഞ്ച് മേധാവി ടോമിന്‍ ജെ. തച്ചങ്കരി. കേസിന്റെ അന്വേഷണം ഏറ്റെടുത്ത ശേഷം ക്രൈം ബ്രാഞ്ച് സംഘം സ്വാമിയുടെ ആശ്രമം സന്ദര്‍ശിച്ച ശേഷമാണ് അദ്ദേഹം സംസാരിച്ചത്. ആശ്രമം സന്ദര്‍ശിച്ചതിന് പുറമെ സ്വാമിയുടെ മൊഴിയും രേഖപ്പടുത്തി.

ശബരിമല യുവതി പ്രവേശന വിവാദം കത്തിനില്‍ക്കുന്ന സമയത്ത്, ഒരര്‍ധരാത്രിയിലാണ് തിരുവനന്തപുരം കുണ്ടമണ്‍കടവിലുള്ള ആശ്രമിത്തിന് തീപിടിച്ചതും വാഹനങ്ങളടക്കം കത്തിയമര്‍ന്നതും. മുഖ്യമന്ത്രി സഹിതം ഓടിയെത്തി തീവച്ചത് സംഘപരിവാര്‍ ശക്തികളെന്ന് ആരോപിച്ചെങ്കിലും ഒരു വര്‍ഷം നീണ്ട പൊലീസ് അന്വേഷണത്തില്‍ ഒന്നും കണ്ടെത്തിയില്ല. എന്നാല്‍ ആക്രമണത്തിന് മുന്‍പ് തന്നെ അതിന്റെ സൂചനകള്‍ പൊലീസിന് ലഭിച്ചിരുന്നു. വാഹനം വീട്ടില്‍ നിന്ന് മാറ്റണമെന്ന് മുന്നറിയിപ്പും നല്‍കി. അതുകൊണ്ട് തന്നെ പ്രതിയെ തിരിച്ചറിഞ്ഞിട്ടും പിടികൂടാതെ സംരക്ഷിക്കുന്ന നിലപാടാണ് സ്വീകരിച്ചതെന്നാണ് സന്ദീപാനന്ദഗിരി ആരോപിക്കുന്നത്.

ആശ്രമത്തിന്റെ ആറ് കിലോമീറ്റര്‍ പരിധിയിലെ സിസിടിവി ദൃശ്യങ്ങള്‍ പരിശോധിച്ചിരുന്നെങ്കിലും സംശയകരമായി ഒന്നും കണ്ടെത്താന്‍ കഴിഞ്ഞില്ല. സ്വാമിയേ സാമൂഹ്യമാധ്യമങ്ങള്‍ വഴി ഭീഷണിപ്പെടുത്തിയവരെ ചോദ്യം ചെയ്‌തെങ്കിലും അവിടെയും ഒന്നും കണ്ടെത്താന്‍ കഴിഞ്ഞിരുന്നില്ല.