സംസ്ഥാനത്ത് വരും ദിവസങ്ങളിലും കനത്ത മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രം. മഴയോടനുബന്ധിച്ച് ഉച്ചയ്ക്ക് രണ്ടുമണി മുതല്‍ വൈകീട്ട് 10 മണിവരെയുളള സമയത്ത് ശക്തമായ ഇടിമിന്നലിനുളള സാധ്യതയുണ്ട്. ഇത്തരം ഇടിമിന്നലുകള്‍ അപകടകാരികള്‍ ആയതുകൊണ്ട് ജാഗ്രത പാലിക്കണമെന്നും മുന്നറിയിപ്പില്‍ പറയുന്നു. ശനിയാഴ്ച ആറു ജില്ലകളിലും ഞായറാഴ്ച നാലു ജില്ലകളിലും യെല്ലോ അലര്‍ട്ട് പ്രഖ്യാപിച്ചു.

ശനിയാഴ്ച കണ്ണൂര്‍, വയനാട്, കോഴിക്കോട്, എറണാകുളം, ഇടുക്കി, ആലപ്പുഴ ജില്ലകളിലും ഞായറാഴ്ച വയനാട്, മലപ്പുറം, ഇടുക്കി, പത്തനംതിട്ട ജില്ലകളിലുമാണ് യെല്ലോ അലര്‍ട്ട് പ്രഖ്യാപിച്ചിരിക്കുന്നത്. രാജ്യത്താകമാനം കാലവര്‍ഷത്തില്‍ പെയ്ത മഴയുടെ അളവ് കൂടിയിട്ടുണ്ട്. ഇനിയും മഴയുടെ തോത് കൂടാനാണ് സാധ്യത. കനത്ത മഴമൂലം നീരൊഴുക്ക് വര്‍ധിച്ചതിനാല്‍ തിരുവനന്തപുരം അരുവിക്കര ഡാമില്‍ നിന്നും കൂടുതല്‍ ജലം കഴിഞ്ഞയാഴ്ച പുറത്തേക്ക് ഒഴുക്കിവിട്ടിരുന്നു.

അതേസമയം ഉത്തരേന്ത്യയില്‍ മഴയ്ക്ക് അല്‍പ്പം ശമനം ഉണ്ട്. ഉത്തര്‍പ്രദേശില്‍ നാലു ദിവസത്തെ കനത്ത മഴയില്‍ 73 പേരാണ് മരിച്ചത്. കിഴക്കന്‍ ഉത്തര്‍പ്രദേശിലും ബിഹാറിലെ പട്‌നയിലും മിക്ക പ്രദേശങ്ങളിലും റെഡ് അലര്‍ട്ട് പ്രഖ്യാപിച്ചിരുന്നു. കഴിഞ്ഞ വെള്ളിയാഴ്ച്ച ഉത്തര്‍പ്രദേശില്‍ 1700 മടങ്ങ് അധികം മഴയാണ് പെയ്തത്. പ്രയാഗരാജില്‍ 102.2 മി.മി, വാരണാസിയില്‍ 84.2 മി.മി മഴയാണ് ലഭിച്ചത്. പല ജില്ലകളിലും സ്‌കൂളുകള്‍ പ്രവര്‍ത്തിക്കുന്നില്ല. മരിച്ചവരുടെ കുടുംബങ്ങള്‍ക്ക് നാല് ലക്ഷം രൂപ നഷ്ട പരിഹാരം നല്‍കാന്‍ ഉത്തര്‍പ്രദേശ് സര്‍ക്കാര്‍ ഉത്തരവിട്ടിട്ടുണ്ട്.