മരട് ഫഌറ്റ് വിഷയത്തില്‍ സുപ്രീം കോടതി നിയമിച്ച നഷ്ടപരിഹാര സമിതിയുടെ ആദ്യ യോഗം സമിതി ചെയര്‍മാന്‍ ജസ്റ്റിസ് കെ. ബാലകൃഷ്ണന്‍ നായരുടെ കൊച്ചിയിലെ വീട്ടില്‍ നടന്നു. ഒരു വര്‍ഷത്തിനുള്ളില്‍ നഷ്ടപരിഹാരം നല്‍കുന്നതിനുള്ള പ്രക്രിയ പൂര്‍ത്തീകരിക്കാനാണ് ഉദ്ദേശിക്കുന്നതെന്ന് ജസ്റ്റിസ് കെ. ബാലകൃഷ്ണന്‍ നായര്‍ പറഞ്ഞു.ജസ്റ്റിസ് കെ. ബാലകൃഷ്ണന്‍ നായര്‍ക്ക് പുറമെ റിട്ടയേര്‍ഡ് ഐ.എ.എസ് ഉദ്യോഗസ്ഥനും റിട്ടയേര്‍ഡ് സിവില്‍ എഞ്ചിനീയറും അടങ്ങുന്ന സമിതിയായിരിക്കും നഷ്ടപരിഹാരം നിശ്ചയിക്കുന്നത്. സുപ്രീം കോടതി നിശ്ചയിച്ച 25 ലക്ഷം രൂപ വരെയള്ള തുകയാണ് ആദ്യഘട്ട നഷ്ടപരിഹാരമായി കൊടുക്കുക. എല്ലാ ഫ്ഌറ്റ് ഉടമകള്‍ക്കും 25 ലക്ഷം രൂപ തന്നെ ലഭിക്കണമെന്നില്ല. രേഖകളും വിശദമായ പരിശോധനയും നടത്തിയ ശേഷമായിരിക്കും തുക നിശ്ചയിക്കുക. കൂടുതല്‍ തുക ആവശ്യപ്പെടുകയാണെങ്കില്‍ അക്കാര്യം സമിതി വിശദമായി പരിശോധിച്ച് സുപ്രീം കോടതിക്ക് റിപ്പോര്‍ട്ട് നല്‍കും. അതിന് ശേഷമായിരിക്കും 25 ലക്ഷം രൂപയ്ക്ക് മുകളിലുള്ള തുകയുടെ കാര്യത്തില്‍ തീരുമാനം എടുക്കുക.

പല ഫഌറ്റ് ഉടമകളും യഥാര്‍ത്ഥ തുകയേക്കാള്‍ കുറച്ചുകാണിച്ചാണ് രജിസ്റ്റര്‍ ചെയ്തിരിക്കുന്നത്. ഇത് നഷ്ടപരിഹാരം നിശ്ചയിക്കുന്നതില്‍ പ്രതിസന്ധി സൃഷ്ടിച്ചേക്കാം. അത്തരം സാഹചര്യങ്ങളില്‍ സര്‍ക്കാരിന്റെയും ഫഌറ്റ് ഉടമകളുടെയും ഫഌറ്റ് നിര്‍മ്മാതാക്കളുടെയും വിശദമായ വാദം കേട്ട ശേഷമായിരിക്കും നഷ്ടപരിഹാരത്തുക നിശ്ചയിക്കുക. ഫഌറ്റുകള്‍ ഒഴിഞ്ഞ ഉടമകള്‍ നഗരസഭയില്‍ നേരിട്ടെത്തി ഫഌറ്റ് ഒഴിഞ്ഞതിന്റെ രേഖകള്‍ കൈപ്പറ്റണമെന്ന് സബ് കലക്ടര്‍ സ്‌നേഹില്‍ കുമാര്‍ സിംഗ് അറിയിച്ചു. ഈ രേഖ കൈപ്പറ്റുന്നവര്‍ക്ക് മാത്രമേ നഷ്ടപരിഹാരത്തിന് അര്‍ഹതയുണ്ടാകൂ എന്നും സബ് കലക്ടര്‍ അറിയിച്ചു.
ഇനി മരട് ഫഌറ്റുകളില്‍ നിന്ന് 29 കുടുംബങ്ങള്‍ കൂടി ഒഴിയാനുണ്ട്.ഫഌറ്റുകള്‍ ഒഴിയാനുള്ള സമയപരിധി അവസാനിച്ചിട്ടും നാല് സമുച്ചയങ്ങളിലായി 50 അപ്പാര്‍ട്ട്‌മെന്റുകള്‍ ഇപ്പോഴും അടഞ്ഞുകിടക്കുകയാണ്. ഇതെല്ലാം വിറ്റുപോയ ഫഌറ്റുകളാണെങ്കിലും കൈവശാവകാശ രേഖകള്‍ നഗരസഭയില്‍ നിന്ന് കൈപ്പറ്റിയിട്ടില്ല. അതിനാല്‍ രജിസ്‌ട്രേഷന്‍ വകുപ്പില്‍ നിന്ന് ഉടമസ്ഥരുടെ രേഖകള്‍ ശേഖരിക്കും. എട്ടാം തീയതിക്കുള്ളില്‍ ഫഌറ്റുകളില്‍ നിന്ന് സാധനങ്ങള്‍ പൂര്‍ണ്ണമായി നീക്കും. പൊളിക്കുന്നതിനായി ടെന്‍ഡര്‍ നല്‍കിയ കമ്ബനികളില്‍ നിന്ന് യോഗ്യരായവരേയും ഈ ദിവസങ്ങളില്‍ തീരുമാനിക്കും.