മലയാളികള്‍ ഏറെ അമ്പരപ്പോടെ ഒരുമാസം മുമ്പ് കേട്ട വാര്‍ത്തയാണ് തൊടുപുഴയില്‍ ഒരു കുഞ്ഞ് വനത്തില്‍ അത്ഭുതകരമായി രക്ഷപ്പെട്ട സംഭവം. ജീപ്പില്‍ ഉറങ്ങിപ്പോയ അമ്മയുടെ മടിയില്‍നിന്ന് രാത്രി റോഡിലേക്ക് തെറിച്ചുവീണ ഒന്നര വയസുകാരി മുട്ടിലിഴഞ്ഞ് വനംവകുപ്പ് ചെക്ക്‌പോസ്റ്റിലെത്തിയാണ് രക്ഷപ്പെട്ടത്. 50 കിലോമീറ്റര്‍ സഞ്ചരിച്ച ശേഷമാണ് കുഞ്ഞ് നഷ്ടപ്പെട്ട വിവരം രക്ഷിതാക്കള്‍ അറിഞ്ഞത്. അത്ഭുതകരമായി രക്ഷപ്പെട്ട കുഞ്ഞിനെ ജീവനക്കാര്‍ മാതാപിതാക്കള്‍ക്ക് കൈമാറി. രാത്രിയില്‍ വന്യമൃഗങ്ങളുടെ ശല്യമുള്ള പ്രദേശത്താണ് കുട്ടി വീണത്.

ഇടുക്കി കമ്പിളികണ്ടം മുള്ളരിക്കുടി താന്നിക്കല്‍ സതീശ്, സത്യഭാമ ദമ്പതികളുടെ മകള്‍ രോഹിതയാണ് ജീപ്പില്‍നിന്ന് തെറിച്ചുവീണത്. എന്നാല്‍ ഈ സംഭവത്തില്‍ വമ്പന്‍ ട്വിസ്റ്റ് ഉണ്ടായിരിക്കുകയാണ്. മടിയിലുറങ്ങിയ ഒരു വയസുകാരിയെ യാത്രക്കിടെ നഷ്ടമായ സംഭവത്തില്‍ വലിയ വഴിത്തിരിവാണ് ഉണ്ടായിരിക്കുന്നത്. വനപാലകര്‍ രക്ഷകരായെന്ന് പ്രചരിച്ച സംഭവത്തില്‍ മുഖ്യറോള്‍ ഓട്ടോ ഡ്രൈവര്‍ക്കായിരുന്നെന്നാണ് വെളിപ്പെടുത്തല്‍. മൂന്നാര്‍ പൊലീസ് ശേഖരിച്ച സി.സി ടി.വി ദൃശ്യങ്ങളില്‍ വനപാലകര്‍ പറഞ്ഞതില്‍നിന്ന് വ്യത്യസ്തമായി മൂന്നാമതൊരാളെ കൂടി കണ്ടതോടെ പൊലീസ് നടത്തിയ അന്വേഷണത്തിലാണ് ഓട്ടോഡ്രൈവര്‍ രക്ഷകനായെന്ന് വ്യക്തമായത്.

പ്രേതഭീതിയുള്ള സ്ഥലമായിരുന്നു അത്. അതിനാല്‍ തന്നെ വനംവാച്ചര്‍മാര്‍ മാറിനിന്നപ്പോള്‍ കുഞ്ഞിനെ കോരിയെടുത്ത് ചെക്ക്‌പോസ്റ്റില്‍ എത്തിച്ച് അണച്ചുപിടിച്ചത് മൂന്നാറിലെ ഓട്ടോ ഡ്രൈവര്‍ കനകരാജാണ്. സംഭവദിവസം വനപാലകള്‍ പുറത്തുവിട്ടത് ഭാഗീക ദൃശ്യങ്ങളായതാണ് കനകരാജ് പുറത്ത് വരാതിരിക്കാന്‍ ഇടയാക്കിയത്. കയ്യടിയത്രയും വനപാലകര്‍ക്കും ലഭിച്ചു. മനുഷ്യജീവിയെന്ന് തിരിച്ചറിയാതെ പ്രദേശത്ത് പ്രേതശല്യമുള്ളത് പറഞ്ഞു ഭയപ്പെട്ട് മാറിനിന്ന വാച്ചര്‍മാര്‍ കനരാജ് കുട്ടിയെ എടുത്തശേഷമാണ് കൂടെ ചേര്‍ന്നത്.

കുഞ്ഞിന് വസ്ത്രം ഇല്ലാതിരുന്നതും തല മൊട്ടയടിച്ചതും ഇഴഞ്ഞു വന്നതുമാണ് ഇത് മനുഷ്യജീവിയല്ലെന്നും പ്രേതമാണെന്നും ഭയപ്പെടാന്‍ വാച്ചര്‍മാരായ ഇടമലക്കുടി നൂറടി കൈലേഷ്, വിശ്വനാഥ് എന്നിവരെ പ്രേരിപ്പിച്ചത്. രാജമലയില്‍ ഓട്ടംപോയി തിരികെവന്ന കനകരാജ് വനംവകുപ്പ് ചെക്ക്‌പോസ്റ്റില്‍ ഗേറ്റ് തുറക്കാന്‍ ഓട്ടോ നിര്‍ത്തിയപ്പോഴാണ് ലൈറ്റിന്റെ വെളിച്ചത്തില്‍ അപൂവ ജീവിയെ കണ്ടത്. ഇതുകണ്ടെങ്കിലും പേടി കാരണം ചെന്നുനോക്കാന്‍ കനകരാജിനെ നിര്‍ബന്ധിക്കുകയായിരുന്നു വാച്ചര്‍മാര്‍.

മുട്ടിലിഴഞ്ഞ് റോഡ് കടന്നുവന്ന കുട്ടി തന്നെ കണ്ടതോടെ കരഞ്ഞതായി കനകരാജ് പറഞ്ഞു. അപ്പോള്‍തന്നെ കുട്ടിയെ വാരിയെടുത്ത് ചെക്ക്‌പോസ്റ്റിലെത്തിച്ചു. മുറിവുകള്‍ തുടച്ച് തോര്‍ത്തില്‍ പൊതിഞ്ഞ് തണുപ്പകറ്റി. അപ്പോഴേക്കും രണ്ടു കി.മീ അകലെനിന്ന് ഫോറസ്റ്ററും ഗാര്‍ഡും പിറകെ വൈല്‍ഡ്‌ലൈഫ് വാര്‍ഡനും എത്തി. മൂന്നാര്‍ എസ്.ഐയും വനിത പൊലീസും വന്നശേഷമാണ് വീട്ടിലേക്ക് പോയതെന്നും കനകരാജ് പറഞ്ഞു.

സെപ്റ്റംബര്‍ ഒമ്പതിന് രാത്രിയാണ് വനമേഖലയിലൂടെയുള്ള രാത്രി യാത്രക്കിടെ ഒപ്പമുണ്ടായിരുന്നവരുടെ ശ്രദ്ധയില്‍പെടാതെ ഒരുവയസുകാരി ജീപ്പില്‍നിന്ന് തെറിച്ചു വീണ സംഭവമുണ്ടായത്. പഴനി ക്ഷേത്രദര്‍ശനം കഴിഞ്ഞ് തിരികെ വീട്ടിലേക്ക് മടങ്ങുന്നതിനിടെ അമ്മയുടെ മടിയില്‍ ഉറങ്ങിക്കിടന്ന കുഞ്ഞാണ് റോഡിലേക്ക് വീണത്. കുട്ടിയെ നഷ്ടപ്പെട്ടെന്ന് മാതാപിതാക്കളറിയുന്നത് സംഭവസ്ഥലത്തുനിന്ന് 50 കി.മീ അകലെ സ്വന്തം വീട്ടിലെത്തിയ ശേഷമാണ്. നേയമക്കാട് എസ്‌റ്റേറ്റ് ലയത്തില്‍ താമസിക്കുന്ന കനകരാജാണ് സത്യത്തില്‍ ആ കുട്ടിയെ രക്ഷിച്ചത്. ആ സത്യം ഇപ്പോള്‍ എല്ലാവരും തിരിച്ചറിഞ്ഞിരിക്കുകയാണ്.