കൂടത്തായി കൂട്ടക്കൊലപാതക്കേസിലെ മുഖ്യപ്രതി ജോളി ജോസഫ് കൊടും ക്രിമിനലുകള്‍ക്കും ഉന്നത പോലീസ് ഉദ്യോഗസ്ഥര്‍ക്കും ഒരുപോലെ ആശ്ചര്യമാകുന്നു. ജോളിക്ക് സൈക്കോയാണെന്ന തരത്തില്‍ പ്രചാരണമുണ്ടായെങ്കിലും റൂറല്‍ എസ്പി കെജി സൈമണ്‍ അത് തള്ളിക്കളഞ്ഞിട്ടുണ്ട്. ജോളിക്ക് സൈക്കോയല്ല മറിച്ച് ബുദ്ധിമതിയായ കൊലയാളിയാണെന്നാണ് റൂറല്‍ എസ്പി പറയുന്നത്. കുടുംബത്തിലെ ആറ് പേരുടെ മരണ കാരണം അന്വേഷിച്ച് തുടങ്ങിയപ്പോള്‍ സംശയം തന്നിലേക്ക് നീളുന്നത് തടയാന്‍ ജോളി നടത്തിയത് വന്‍ നാടകം. ഒരു തരത്തിലുമുള്ള സൈക്കോ സ്വഭാവമുള്ള സ്ത്രീ അല്ല ജോളി. ഏറ്റവും ബുദ്ധിമതിയായ കൊലയാളി തന്നെയാണ്. അവര്‍ ഒറ്റയ്ക്കാണ് ഇത് ചെയ്തതെങ്കില്‍ ഒരിക്കലും പിടിക്കപ്പെടില്ലായിരുന്നു.

കല്ലറ തുറന്ന് പരിശോധന നടത്തുമെന്നറിഞ്ഞതോടെ അങ്ങനെ ചെയ്താല്‍ ആത്മാക്കള്‍ ഓടി വരുമെന്ന് പൊന്നാമറ്റം തറവാട്ടിലും മരിച്ച മഞ്ചാടി മാത്യുവിന്റെ വീട്ടിലെത്തി പ്രചരിപ്പിക്കുകയായിരുന്നു. ഇത്തരത്തില്‍ വിശ്വാസം മുതലെടുത്ത് അന്വേഷണം തടസ്സപ്പെടുത്താനായിരുന്നു ജോളിയുടെ ശ്രമം.

കേരള പോലീസിന്റെ ചരിത്രത്തിലോ തന്റെ അന്വേഷണ അറിവിലോ ഇത്തരമൊരു കേസ് ഉണ്ടായിട്ടില്ല. അതുകൊണ്ട് തന്നെയാണ് ഈ കേസ് പഠിക്കാനായി ഐപിഎസ് ട്രെയിനികളെ അടക്കം എത്തിച്ചത്. അത്രത്തോളം സങ്കീര്‍ണമാണ് കേസും പ്രതിയുമെന്നാണ് എസ്പി സൈമണ്‍ പറഞ്ഞത്.

പോലീസിന് ആവശ്യമുള്ളതെല്ലാം കിട്ടിക്കഴിഞ്ഞു. ജോളി ബികോം ബിരുദം പോലും പാസായിട്ടില്ല എന്ന് വ്യക്തമായിട്ടുണ്ട്. അങ്ങനെയുള്ള സ്ത്രീയാണ് എന്‍ഐടി പ്രൊഫസറെന്ന് പറഞ്ഞ് നടന്നത്. എന്‍ഐടിയുമായി ബന്ധപ്പെട്ട കാര്യങ്ങള്‍ കൂടുതലായി അന്വേഷിച്ച് വരുന്നതേയുള്ളൂവെന്നും അദ്ദേഹം വ്യക്തമാക്കി.

കൂടത്തായി കൊലപാതക പരമ്പരയുമായി ബന്ധപ്പെട്ട കേസ് പഠിക്കാന്‍ ഉന്നത പോലീസുകാര്‍ കൂട്ടത്തോടെ കേരളത്തിലേക്കെത്തുകയാണ്. ശനിയാഴ്ച 10 ഐപിഎസ് ട്രെയിനുകളാണ് വടകര എസ് പി ഓഫീസിലെത്തിയത്. മുഖ്യപ്രതി ജോളിയെ ചോദ്യം ചെയ്യുന്നതിനിടെയാണ് ഐപിഎസ് ട്രെയിനികളായ 10 എഎസ്പിമാര്‍ വടകരയില്‍ എത്തിയത്. പ്രത്യേക ഉത്തരവ് പ്രകാരമാണ് ഐപിഎസ് ട്രെയിനികള്‍ വടകരയില്‍ എത്തിയത്.

ഇതിനായി പ്രത്യേകം തയ്യാറാക്കിയ ചാര്‍ട്ട് അന്വേഷണ ഉദ്യോഗസ്ഥനായ എസ് പി കെ. ജി സൈമണ്‍ കൈമാറി. ഉത്തരമേഖല ഐ ജി അശോക് യാദവിന്റ നേതൃത്വത്തിലായിരുന്നു കേസിന്റെ വിലയിരുത്തലും ചോദ്യംചെയ്യലും. ഉച്ചയ്ക്ക് ഒരു മണിക്ക് തുടങ്ങിയ പ്രത്യേക ക്ലാസും ചോദ്യംചെയ്യലും വൈകിട്ട് നാല് മണി വരെ തുടര്‍ന്നു.

ചോദ്യംചെയ്യലുമായി ജോളി കൂടുതല്‍ സഹകരിക്കുന്നുണ്ട്. ഇത് കേസന്വേഷണത്തിന് വളരെ സഹായകമാവുമെന്നും അന്വേഷണ ഉദ്യോഗസ്ഥനായ എസ്.പി പറഞ്ഞു.

ഡിജിപി ലോക്‌നാഥ് ബെഹ്‌റ ശനിയാഴ്ച വടകരയില്‍ എത്തിയിരുന്നു. കൂടത്തായി കേസ് ഏറെ വെല്ലുവിളി നിറഞ്ഞതാണ്. അതുകൊണ്ട് ഐപിഎസ് ട്രെയിനികളെ കേസ് പഠിക്കാന്‍ അയക്കുമെന്ന് കഴിഞ്ഞദിവസം ഡിജിപി പറഞ്ഞിരുന്നു. അദ്ദേഹത്തിന്റെ സന്ദര്‍ശനത്തിന് ശേഷം ഉച്ചയോടെയാണ് 10 ഐപിഎസ് ട്രെയിനികള്‍ സ്ഥലത്തെത്തിയത്. തുടര്‍ന്ന് ഇവരും കേസന്വേഷണത്തിന്റെ ഭാഗമാകുമെന്നാണ് സൂചന.