കൂടത്തായി ആക്രമണ പരമ്പരയില്‍ കൂടോത്രവും പ്രയോഗിച്ചിരുന്നതായി വെളിപ്പെടുത്തല്‍. സയനൈഡിന് മുമ്പ് ജോളി കൊണ്ടു നടന്ന ആയുധമായിരുന്നു ദുര്‍മന്ത്രവാദം. ആള്‍ക്കാരെ തന്റെ ഇഷ്ടത്തിനനുസരിച്ച് നിര്‍ത്തുന്നതിനും എതിരാളികളെ വക വരുത്തുന്നതിനും എല്ലാം കൂടോത്രം ഉപയോഗിച്ചു. കൂടത്തായിയിലെ പൊന്നാമറ്റം കുടുംബത്തില്‍ ജോളി വന്നു കയറുന്നതിന് മുമ്പ് തന്നെ കൂടോത്രവും കൂട്ടുപിടിച്ചിരുന്നു. എല്ലാത്തിനും കാരണം സമ്പത്തിനോടുള്ള ജോളിയുടെ അമിത സ്‌നേഹമാണ്.

ജോളിക്ക് ജ്യോത്സ്യനുമായി വിവാഹത്തിനു മുന്‍പേ ബന്ധമുണ്ടായിരുന്നുവെന്ന് ക്രൈംബ്രാഞ്ചും കണ്ടെത്തിയിട്ടുണ്ട്. കുടുംബത്തിലെ സാമ്പത്തിക പ്രതിസന്ധികള്‍ ഒഴിവാക്കുന്നതിന് ദുര്‍മന്ത്രവാദം നടത്താന്‍ ജോളിയെ സഹായിച്ചിരുന്നത് ഇടുക്കി കട്ടപ്പനയിലെ ജ്യോതിഷരത്‌നം രാധാകൃഷ്ണന്‍ ആയിരുന്നു. ജ്യോത്സ്യനെ ചോദ്യം ചെയ്യുന്നതിലൂടെ കേസുമായി ബന്ധപ്പെട്ട നിര്‍ണായക വിവരങ്ങള്‍ ലഭ്യമാകുമെന്ന നിഗമനത്തിലാണ് അന്വേഷണസംഘം. ജ്യോത്സ്യനെ ക്രൈംബ്രാഞ്ച് കസ്റ്റഡിയിലെടുക്കുമെന്നാണ് അറിയുന്നത്. ധനമോഹിയും, ആഡംബര ജീവിതവും ഇഷ്ടപ്പെടുന്ന ജോളി ആര്‍ഭാട ജീവിതം തുടരുന്നതിന് തനിക്ക് തടസമായി നിന്നവരെ ഇല്ലായ്മ ചെയ്യുന്നതിന് ജ്യോത്സ്യന്റെ കരങ്ങളുണ്ടെന്ന സംശയത്തിലാണ് അന്വേഷണസംഘം. ഇടയ്ക്ക് ഒളിവില്‍പോയ ജ്യോത്സ്യന്‍ വ്യാഴാഴ്ചയാണ് തിരിച്ചെത്തിയത്.

കൂടത്തായി കൊലപാതകവുമായി ബന്ധപ്പെട്ട് നടുക്കുന്ന വിവരങ്ങളാണ് പുറത്ത് വന്ന് കൊണ്ടിരിക്കുന്നത്. പുതിയ വിവരങ്ങള്‍ ദുരൂഹതയുടെ ചുരുളുകള്‍ അഴിക്കുന്നതിനൊപ്പം പുതിയ സംശയങ്ങള്‍ക്കും അമ്പരപ്പുകള്‍ക്കും വഴി തുറക്കുകയാണ്. കൊലപാതക കഥയിലേക്ക് പുതിയ കഥാപാത്രങ്ങളും പ്രവേശിക്കുന്നു. 6 പേരെ പല കാലങ്ങളായി കൊലപ്പെടുത്താന്‍ ജോളിക്ക് പലരുടേയും സഹായം ലഭിച്ചിട്ടുണ്ട് എന്നാണ് പോലീസ് കരുതുന്നത്.

രാഷ്ട്രീയ നേതാക്കളും സര്‍ക്കാര്‍ ഉദ്യോഗസ്ഥരും ബിഎസ്എന്‍എല്‍ ജീവനക്കാരനും അടക്കമുളളവര്‍ പോലീസ് സംശയിക്കുന്നവരുടെ കൂട്ടത്തിലുണ്ട്. പലര്‍ക്കെതിരെയും ജോളി ഇതിനകം പോലീസിന് മൊഴി നല്‍കിയിട്ടുളളതായും റിപ്പോര്‍ട്ടുകളുണ്ട്. അതിനിടെ ചോദ്യം ചെയ്യലിനിടെ ജോളി തന്നെക്കുറിച്ച് പറഞ്ഞ കാര്യങ്ങള്‍ കേട്ട് അന്വേഷണ ഉദ്യോഗസ്ഥര്‍ തന്നെ ഞെട്ടിയിരിക്കുകയാണ്.

സ്വത്തിന് വേണ്ടിയുളള ആര്‍ത്തിയും പകയും അടക്കം ഓരോ കൊലപാതകങ്ങള്‍ക്ക് പിന്നിലും ജോളിക്ക് കൃത്യമായ കാരണങ്ങള്‍ ഉണ്ടായിരുന്നു. ജോളി സയനൈഡ് നല്‍കി കൊലപ്പെടുത്തിയ 6 പേരില്‍ മൂന്ന് പേര്‍ സ്ത്രീകളും മൂന്ന് പേര്ഡ പുരുഷന്മാരും ആയിരുന്നു. അതിലൊന്ന് പത്ത് മാസം മാത്രം പ്രായമുളള പെണ്‍കുഞ്ഞായിരുന്നു. പല കാലങ്ങളായി നടത്തിയ കൊലപാതകങ്ങള്‍ക്ക് ശേഷം ഇപ്പോഴേങ്കെിലും പിടിക്കപ്പെട്ടില്ലായിരുന്നുവെങ്കിലും ഇനിയും പലരും കൊല്ലപ്പെടുമായിരുന്നു എന്നാണ് ബന്ധുക്കള്‍ തന്നെ ആരോപിക്കുന്നത്.

തനിക്ക് പെണ്‍കുട്ടികളോട് വെറുപ്പാണ് എന്നാണ് ചോദ്യം ചെയ്യലിനിടെ ജോളി അന്വേഷണ ഉദ്യോഗസ്ഥരോട് വെളിപ്പെടുത്തിയിരിക്കുന്നത് എന്നാണ് റിപ്പോര്‍ട്ടുകള്‍. കുടുംബത്തിലെ ചില പെണ്‍കുട്ടികളെ ഇല്ലാതാക്കാന്‍ താന്‍ ശ്രമിച്ചിട്ടുണ്ട് എന്നും ജോളി പോലീസിനോട് സമ്മതിച്ചാതായി റിപ്പോര്‍ട്ടുകളുണ്ട്. ആദ്യ ഭര്‍ത്താവ് റോയി തോമസിന്റെ സഹോദരിയായ രഞ്ജിയുടെ മകളെ കൊലപ്പെടുത്താന്‍ താന്‍ ശ്രമം നടത്തിയതായും ജോളി സമ്മതിച്ചതായി വിവരമുണ്ട്. പെണ്‍കുട്ടിയുടെ വായയില്‍ നിന്ന് നുരയും പതയും വന്നതിനെ തുടര്‍ന്ന് ആശുപത്രിയില്‍ ചികിത്സ തേടിയിരുന്നതായും പോലീസ് അന്വേഷണത്തില്‍ കണ്ടെത്തി. തുടര്‍ന്ന് ഈ കുട്ടി രക്ഷപ്പെടുകയായിരുന്നു. ജോളി ഒന്നിലേറെ തവണ ഗര്‍ഭഛിദ്രം നടത്തിയതായും പോലീസിന് വിവരം ലഭിച്ചിട്ടുണ്ട്.