തിരുവനന്തപുരം സോണില്‍ മാത്രം മാസം തോറും മൂന്നരകോടിയോളം ലാഭം.160 സര്‍വീസ് റദ്ദാക്കിയിട്ടും വെള്ളിയാഴ്ച 2.51 കോടി കളക്ഷന്‍ കിട്ടി. തിരക്കേറിയ ദിവസങ്ങളില്‍ പോലും പരമാവധി കിട്ടുന്നത് 2.60 കോടിരൂപ. അതായത് 160 സര്‍വീസുകളോളം റദ്ദാക്കിയിട്ടും ചെലവിലെ കുറവ് കൂടി കണക്കാക്കുമ്ബോള്‍ മെച്ചമേയുള്ളു.

മൂന്ന് മേഖലകളിലെ കണക്ക് നോക്കിയാലും ഡ്രൈവര്‍മാരുടെ കുറവ് കാരണം സര്‍വീസുകള്‍ കൂട്ടത്തോടെ റദ്ദാക്കേണ്ടിവന്ന ആഴ്ചയിലടക്കം ശരാശരി ആറുകോടിയിലധികം കലക്ഷനുണ്ട്. അതുകൊണ്ടുതന്നെ യാത്രക്കാര്‍ക്ക് ബുദ്ധിമുട്ട് അനുഭവപ്പെടുന്നുണ്ടെങ്കിലും സര്‍വീസുകള്‍ ആവശ്യമെങ്കില്‍ മാത്രം പുനരാരംഭിച്ചാല്‍ മതിയെന്നാണ് കെഎസ്‌ആര്‍ടിസിയുടെ തീരുമാനം. ഡ്രൈവര്‍മാരുടെ കുറവിനെ തുടര്‍ന്ന് അപ്രധാന റൂട്ടുകളിലെ സര്‍വീസുകളെല്ലാം ഒഴിവാക്കിയിട്ടും വരുമാനത്തില്‍ ഇടിവ് വരാത്തതിനാലാണ് കെഎസ്‌ആര്‍ടിസിയുടെ പുതിയനീക്കം. ദിവസേന നാനൂറോളം സര്‍വീസുകള്‍ റദ്ദാക്കിയിട്ടും വരുമാനത്തില്‍ കാര്യമായ നഷ്ടമുണ്ടായിലില്ലെന്ന് മാനേജ്‌മെന്റ് പറയുന്നു. കെഎസ്‌ആര്‍ടിസി ഏറ്റവും കൂടുതല്‍ സര്‍വീസ് നടത്തുന്ന തിരുവനന്തപുരം മേഖലയിലെ വെള്ളിയാഴ്ചത്തെ കണക്ക് നോക്കിയാല്‍ റദ്ദാക്കിയത് 160 സര്‍വീസുകള്‍.

അതായത് നാല്‍പതിനായിരത്തോളം കിലോമീറ്റര്‍ ബസ് ഓടിയില്ല. ലിറ്ററിന് നാലു കിലോമീറ്റര്‍ മൈലേജ് കണക്കാക്കിയാല്‍ 10000 ലിറ്റര്‍ ഡീസല്‍ ലാഭം. ലിറ്ററിന് 70 രൂപ വച്ച്‌ 7ലക്ഷം രൂപ ചെലവിനത്തില്‍ കുറഞ്ഞു. ഒരു ബസില്‍ നാല് ഡ്യൂട്ടി വീതം 640 ഡ്യൂട്ടി. ഡ്യൂട്ടിയൊന്നിന് 500 രൂപ വച്ച്‌ 3.20 ലക്ഷം രൂപ വേതന ഇനത്തിലും കുറഞ്ഞു. സ്‌പെയര്‍പാട്‌സിലും ടയര്‍ തേയ്മാനത്തിലും രണ്ടുശതമാനം ചെലവ് വീണ്ടും കുറയും. ആകെ ദിവസം ചെലവിനത്തില്‍ പതിനൊന്ന് ലക്ഷത്തോളം രൂപയുടെ കുറവ്.