മുഖ്യമന്ത്രി പിണറായി വിജയന്‍ 2019-ലെ പുതുവത്സര ആശംസാ കാര്‍ഡില്‍ പ്രളയാതിജീവനത്തിന്റെ പ്രതീകമായി അടയാളപ്പെടുത്തിയ ഒരു വീടുണ്ട്. പക്ഷേ ആ വീടിന്റെ ഉടമയ്ക്ക് ഒരു വര്‍ഷത്തിലേറെക്കാലം സര്‍ക്കാര്‍ ഓഫിസുകള്‍ കയറിയിറങ്ങിയിട്ടും പ്രളയ നഷ്ടപരിഹാരം കിട്ടിയില്ല.

ഉടുമുണ്ടു കീറിയുണ്ടാക്കിയ വെള്ള അക്ഷരങ്ങളില്‍ ടെറസിനു മുകളില്‍ 'താങ്ക്‌സ്' എന്നു രേഖപ്പെടുത്തിയ ഈ വീടിന്റെ ചിത്രം ലോകമെങ്ങും തരംഗമായിരുന്നു. കിഴക്കേ കടുങ്ങല്ലൂര്‍ മുല്ലേപ്പിള്ളി സുന്ദരവിലാസത്തില്‍ ധനപാലാണ് പ്രളയജലത്തില്‍ നിന്ന് ആളുകളെ ഹെലികോപ്റ്ററില്‍ രക്ഷിച്ച നാവിക സേനാംഗങ്ങള്‍ക്കുള്ള നന്ദി എന്ന നിലയില്‍ ഇംഗ്ലിഷില്‍ ഇങ്ങനെ കുറിച്ചത്. നാവികസേന അതു സമൂഹമാധ്യമങ്ങളില്‍ പ്രചരിപ്പിച്ചിരുന്നു.

വെള്ളപ്പൊക്കത്തില്‍ ധനപാലിന് 8 ലക്ഷം രൂപയുടെ നഷ്ടം സംഭവിച്ചു. എന്നാല്‍, ഉദ്യോഗസ്ഥരുടെ മുന്‍പില്‍ വെള്ളം കയറിയതു തെളിയിക്കാനാകാതെ താന്‍ തോറ്റമ്പിയെന്ന് അദ്ദേഹം പറയുന്നു. ധനസഹായം തേടി ധനപാല്‍ നല്‍കിയ അപേക്ഷകള്‍ ഓരോരോ കാരണങ്ങള്‍ പറഞ്ഞ് ഉദ്യോഗസ്ഥര്‍ തള്ളുകയായിരുന്നു. കൊച്ചിയില്‍ സ്വകാര്യ കമ്പനി ജീവനക്കാരനായ ധനപാല്‍ വെള്ളപ്പൊക്കത്തിനു ശേഷം ഇടപ്പള്ളിയില്‍ വാടകയ്ക്കു താമസിക്കുകയാണ്. ഭിത്തികളുടെ വിള്ളലും വയറിങ് തകരാറും പരിഹരിക്കാന്‍ കഴിയാത്തതിനാല്‍ സ്വന്തം വീട്ടിലേക്കു മടങ്ങാന്‍ കഴിഞ്ഞിട്ടില്ല.

പ്രളയജലം ഇറങ്ങിയപ്പോള്‍ ശുചീകരണത്തിനു നാട്ടില്‍ എല്ലാവര്‍ക്കും അനുവദിച്ച 10,000 രൂപ മാത്രമേ കിട്ടിയുള്ളൂ. പ്രളയം കഴിഞ്ഞപ്പോള്‍ റവന്യു വകുപ്പു ചുമതലപ്പെടുത്തിയ 3 ഗ്രൂപ്പുകള്‍ വീട്ടിലെത്തി പരിശോധിക്കുകയും ചിത്രങ്ങള്‍ എടുക്കുകയും ചെയ്തിരുന്നു. ആനുകൂല്യങ്ങള്‍ നിഷേധിക്കാന്‍ വിചിത്രമായ കാരണങ്ങളാണ് അധികൃതര്‍ ധനപാലിനോടു പറഞ്ഞത്.

കടുങ്ങല്ലൂര്‍ പഞ്ചായത്ത് ഓഫിസിലെയും കലകട്‌റേറ്റിലെയും ഉദ്യോഗസ്ഥരാണ് തന്നെ നിരാശപ്പെടുത്തിയതെന്നു ധനപാല്‍ പറഞ്ഞു. വീടിനു പ്രത്യേകം പേരില്ല എന്നാണ് ആദ്യം പറഞ്ഞത്. വീടിനു പേരില്ലെങ്കിലും പ്രത്യേകം വീട്ടു നമ്പര്‍ ഉണ്ടെന്നു ചൂണ്ടിക്കാട്ടിയപ്പോള്‍ ധനപാലിനു സ്വന്തമായി റേഷന്‍ കാര്‍ഡില്ല എന്നായി ഉദ്യോഗസ്ഥര്‍. മാതാപിതാക്കളുടെ കാര്‍ഡില്‍ നിന്നു തന്റെ പേരു വേര്‍പെടുത്തി ധനപാല്‍ പുതിയ റേഷന്‍ കാര്‍ഡുണ്ടാക്കി. അതുമായി ചെന്നപ്പോള്‍ ഉദ്യോഗസ്ഥര്‍ പറഞ്ഞതു 'നേരത്തേ തള്ളിയ അപേക്ഷ വീണ്ടും പരിഗണിക്കില്ലെ'ന്നാണ്. പെരിയാറിനോടു ചേര്‍ന്നുള്ള ഒറ്റനില വീടാണ് ധനപാലിന്റേത്. ഇവിടെ 12 അടി ഉയരത്തില്‍ വെള്ളം ഉയര്‍ന്നു സര്‍വവും നശിച്ചിരുന്നു.

ധനപാലും കുടുംബവും ഹെലികോപ്റ്ററിലല്ല രക്ഷപ്പെട്ടത്. പൊലീസും മത്സ്യത്തൊഴിലാളികളും ചേര്‍ന്നു വള്ളത്തിലാണ് രക്ഷിച്ചത്. എന്നാല്‍, സമീപത്തെ വയോധികരടക്കം ഒട്ടേറെപ്പേരെ എയര്‍ലിഫ്റ്റ് ചെയ്യുന്നതു നേരില്‍ കണ്ടിരുന്നു. വെള്ളത്തിലൂടെ നീന്തിയെത്തിയ അച്ഛന്‍ ഗോപാലകൃഷ്ണന്‍ നായര്‍ അഴിച്ചിട്ട ഡബിള്‍ മുണ്ടു കീറിയാണ് ഇതര സംസ്ഥാനക്കാരായ നാവിക സേനാംഗങ്ങള്‍ക്കു കൂടി മനസ്സിലാകാന്‍ ഇംഗ്ലിഷില്‍ നന്ദി രേഖപ്പെടുത്തിയത്. ടെറസിനു മുകളില്‍ ധനപാല്‍ താങ്ക്‌സ് എന്നു കുറിച്ചതു 'മുകളിലുള്ളവനെ' കൂടി മനസ്സില്‍ വച്ചു തന്നെയായിരുന്നു.