ഫ്രാന്‍സിലെ പ്രശസ്തമായ നോട്ടര്‍ ഡാം കതീഡ്രലില്‍ ആക്രമണത്തിന് പദ്ധതിയിട്ട രണ്ട് വനിത തീവ്രവാദികള്‍ക്ക് ശിക്ഷ വിധിച്ചു. 2016 നവംബര്‍ നാലിന് നഗരഹൃദയത്തിലുള്ള കത്രീഡലില്‍ തീവ്രവാദി ആക്രമണത്തിന് പദ്ധതിയിട്ടെന്ന് ആരോപിച്ച് അറസ്റ്റിലായ ഈനെസ് മദനി(22), ഓര്‍നെല്ല ഗില്ലിഗ്മാന്‍ (42) എന്നിവര്‍ക്കാണ് ശിക്ഷ വിധിച്ചത്.
ഫ്രാന്‍സിന്റെ ചരിത്രത്തില്‍ ഇതാദ്യമായാണ് വനിത തീവ്രവാദികള്‍ക്ക് ശിക്ഷ ലഭിക്കുന്നത്. ഈനെസിന് 30 വര്‍ഷത്തെ തടവും ഓര്‍സെല്ലക്ക് 25 വര്‍ഷത്തെ തടവുമാണ് വിധിച്ചത്. ഇസ്‌ലാമിക് സ്‌റ്റേറ്റിന്റെ ആശയങ്ങളിലൂന്നി പ്രവര്‍ത്തിക്കുന്ന റാഷിദ് കാസിമിന്റെ നിര്‍ദേശപ്രകാരം കത്രിഡലില്‍ ഭീകരാക്രമണത്തിന് പദ്ധതിയിട്ടുവെന്നാണ് ഇവര്‍ക്കെതിരായ കേസ്. അഞ്ചംഗ വനിത തീവ്രവാദികളാണ് സംഘത്തിലുണ്ടായിരുന്നത്. നോട്ടര്‍ ഡാം കതീഡ്രലില്‍ ഗ്യാസ് സിലിണ്ടറുകളുമായി എത്തിച്ച് കാര്‍ കത്തിക്കുക എന്നതായിരുന്നു ഇവരുടെ ദൗത്യം.
എന്നാല്‍ സംശയാസ്പദമായ രീതിയില്‍ കണ്ടെത്തിയ കാര്‍ പൊലീസ് കസ്റ്റഡിയിലെടുക്കുകയായിരുന്നു. പൊലീസ് എത്തിയതോടെ സംഘത്തിലുണ്ടായിരുന്നവര്‍ വെടിയുതിര്‍ത്തു. വെടിവെപ്പില്‍ ഈനെല്ല മദനിക്ക് കാലില്‍ പരിക്കേറ്റിരുന്നു. അറസ്റ്റിലായ സാറാ ഹേര്‍വെറ്റ്, അമല്‍ സാകോവ്, സാമിയ ചലേല്‍ എന്നിവരെ നേരത്തെ ശിക്ഷിച്ചിരുന്നു. സാറാ ഹേര്‍വെറ്റ്, അമല്‍ സാകോവ് എന്നിവര്‍ക്ക് 20 വര്‍ഷത്തെ തടവും ഈനെല്ല മദനിയെ സഹായിച്ചുവെന്ന കുറ്റത്തിന് സാമിയ ചലേലിന് അഞ്ചു വര്‍ഷം തടവുമാണ് വിധിച്ചത്.