കയ്പമംഗലം വഴിയമ്പലത്തെ എച്ച്പി പെട്രോള്‍ പമ്പ് ഉടമസ്ഥനായ കയ്പമംഗലം കാളമുറി കോഴിപ്പറമ്പില്‍ കെ.കെ. മനോഹരനെ (68) കൊല ചെയ്യപ്പെട്ട നിലയില്‍ കണ്ടെത്തി. കയ്പമംഗലത്തുനിന്നു ഇന്നലെ രാത്രി കാണാതായ ഇദ്ദേഹത്തിന്റെ മൃതദേഹം ഗുരുവായൂര്‍ എല്‍എഫ് കോളജിനു സമീപം കുന്നംകുളം ഗുരുവായൂര്‍ റോഡുവക്കില്‍ ഇന്നു രാവിലെയാണ് കണ്ടത്.

മനോഹരന്‍ പെട്രോള്‍ പമ്പിലേക്കു പോയത് ഇന്നലെ രാത്രി പത്തുമണിയോടെയാണ്. തിരികെ രണ്ടുമണിക്ക് എത്തേണ്ടയാളെ കാണാതായപ്പോള്‍ വീട്ടുകാര്‍ ഫോണില്‍ വിളിച്ചു. ഫോണെടുത്തയാള്‍ സാര്‍ കാറില്‍ ഉറങ്ങുകയാണെന്നു പറഞ്ഞു. കാറില്‍ തട്ടുന്ന ശബ്ദം കേട്ടു. പിന്നീട് ഫോണ്‍ കട്ടായി. വീണ്ടും വിളിച്ചപ്പോള്‍ ഫോണെടുത്തില്ല. പിന്നെ സ്വിച്ച്ഡ് ഓഫ് ആയി. ഇതോടെ വീട്ടുകാര്‍ പൊലീസില്‍ വിവരമറിയിച്ചു. എന്നാല്‍ രാവിലെ റോഡരികില്‍ മൃതദേഹം കണ്ടെത്തുകയായിരുന്നു.

മനോഹരന്‍ സഞ്ചരിച്ചിരുന്ന കെഎല്‍47 ഡി: 8181 നമ്പറിലുള്ള വെള്ള കാര്‍, ആഭരണങ്ങള്‍, പഴ്‌സ്, പമ്പിലെ കലക്ഷനുണ്ടായിരുന്ന ബാഗ് എന്നിവ കാണാതായിട്ടുണ്ട്. ബന്ധുക്കളെത്തി മൃതദേഹം തിരിച്ചറിഞ്ഞു. ശരീരത്തില്‍ മര്‍ദ്ദനമേറ്റ പാടുകളുണ്ട്. കൈകള്‍ പിന്നിലേക്കു കെട്ടിവച്ചതിന്റെ ലക്ഷണങ്ങളുണ്ട്. സമീപത്തുനിന്ന് ഒട്ടിക്കുന്ന വലിയ ടേപ്പ് കണ്ടെത്തി. പൊലീസ് നായ, ഫൊറന്‍സിക് സംഘങ്ങള്‍ എന്നിവര്‍ സ്ഥലത്തെത്തി പരിശോധിക്കുകയാണ്.

തൃശൂരില്‍ സമാനമായ രീതിയില്‍ ഇന്നലെ രാത്രി നടക്കുന്ന രണ്ടാമത്തെ ആക്രമണമാണിത്. ഊബര്‍ ടാക്‌സി ഡ്രൈവറെ തലയ്ക്കടിച്ച് പരുക്കേല്‍പ്പിച്ച് രണ്ടു പേര്‍ ചേര്‍ന്ന് ടാക്‌സി തട്ടിയെടുത്തതും ഇന്നലെ അര്‍ധരാത്രിയിലാണ്. ടാക്‌സി പിന്നീട് പൊലീസ് കാലടിയില്‍ നിന്നു പിടികൂടുകയായിരുന്നു. ഡ്രൈവര്‍ പരുക്കുകളോടെ ആശുപത്രിയില്‍ ചികിത്സയിലാണ്. തൃശൂര്‍ റൂറല്‍ പൊലീസ് പരിധിയില്‍ നടന്ന രണ്ടു സംഭവങ്ങളും തമ്മില്‍ ബന്ധമുണ്ടോയെന്ന് അന്വേഷിച്ചുവരികയാണ്.