ആറന്മുളയില് വീണ്ടും വിമാനത്താവള പദ്ധതിയുമായി വ്യവസായി
ജനകീയപ്രക്ഷോഭത്തെ തുടര്ന്ന് കേന്ദ്ര-സംസ്ഥാന സര്ക്കാരുകള് ഉപേക്ഷിച്ച ആറന്മുള വിമാനത്താവള പദ്ധതി വീണ്ടും പൊടിതട്ടിയെടുക്കാന് നീക്കം. പദ്ധതി വീണ്ടും ആരംഭിക്കുമെന്ന് വ്യവസായി ഡോ.എബ്രഹാം കലമണ്ണില് മാധ്യമങ്ങളോട് പ്രതികരിച്ചു. മൗണ്ട് സീയോണ്ഗ്രൂപ്പാണ് ഇതിന് നേതൃത്വം നല്കുന്നത്. 500 ഏക്കര് സ്ഥലത്ത് എയര് ടാക്സി സര്വീസ് ഉള്പ്പെടെ ഉള്ള സംവിധാനങ്ങളാണ് ഒരുക്കുക എന്നും അദ്ദേഹം പറഞ്ഞു. നേരത്തെ എന്.ഒ.സി ലഭിച്ച ആഞ്ഞൂറ് ഏക്കര് ഭൂമിയില് പ്രവര്ത്തനം തുടങ്ങാന് കേന്ദ്ര സംസ്ഥാന സര്ക്കാരുകളെ ഉടന് സമീപിക്കും. പദ്ധതി നടപ്പിലാക്കാനായി ക്യാപ്റ്റന് രവീന്ദ്രന് നായര്, ചന്ദ്രശേഖര കുറുപ്പ് എന്നിവരുടെ നേതൃത്വത്തിലാണ് പദ്ധതി ഏകോപനം നടക്കുക.
പ്രാരംഭ പ്രവര്ത്തനങ്ങള്ക്ക് തുടക്കം കുറിച്ചു കഴിഞ്ഞു എന്നും എബ്രഹാം കലാമണ്ണില് പറഞ്ഞു. സ്വാഭാവിക വനത്തിന്റെ സ്വഭാവത്തില് ഉള്ള ചെറുവള്ളി എസ്റേറ്റ് വന് പരിസ്ഥിതി നാശത്തിന് ഇടയാക്കും എന്നും മികച്ച അനിയോജ്യമായ സ്ഥലം ആറന്മുളയാണെന്നും അദ്ദേഹം പറയുന്നു. നിലവില് ചെറുവള്ളി എസ്റ്റേറ്റില് വിമാനത്താവള പദ്ധതി സര്ക്കാര് പ്രഖ്യാപിച്ചിരിക്കേ, എന്.ഒ.സി ലഭിച്ച ഭൂമി അടക്കം വ്യവസായി വിമാനത്തവളത്തിനായി രംഗത്തിറങ്ങുന്നത് വരും ദിവസങ്ങളില് ചര്ച്ചയാകും. ചെറുവള്ളി വിമാനത്താവള പദ്ധതിക്ക് തുരങ്കം വയ്ക്കാനുള്ള ചില കോണ്ഗ്രസ് നേതാക്കളുടെ നീക്കത്തിന്റെ ഭാഗമായാണ് വ്യവസായി ഇപ്പോള് രംഗത്തെത്തിയിരിക്കുന്നതെന്നും കേന്ദ്ര-സംസ്ഥാന സര്ക്കാരുകള് ഉപേക്ഷിച്ച പദ്ധതി യാഥാര്ത്ഥ്യമാകില്ലെന്നും എല്.ഡി.എഫ് ആരോപിക്കുന്നു.
https://www.facebook.com/Malayalivartha
