ഉപതെരഞ്ഞെടുപ്പിന്റെ അവസാനഘട്ടത്തിലേക്ക് പ്രചരണം നീങ്ങുമ്പോള്‍ കൂടത്തായി കൊലപാതക പരമ്പര എല്‍.ഡി.എഫും യു.ഡി.എഫും ആയുധമാക്കുന്നു. ആറ് കൊലപാതകങ്ങള്‍ നടത്തിയ ജോളിക്കെതിരായ തെളിവുകള്‍ മാസങ്ങള്‍ക്ക് മുമ്പ് കിട്ടിയിട്ടും സര്‍ക്കാര്‍ അറസ്റ്റ് വൈകിപ്പിക്കുകയായിരുന്നെന്ന കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്റെ പ്രസ്താവനയ്ക്ക് സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ മഞ്ചേശ്വരത്ത് മറുപടി നല്‍കി. ഭര്‍ത്താവിനെയും രണ്ടാം ഭര്‍ത്താവിന്റെ പിഞ്ച് കുഞ്ഞിനെയും അടക്കം ആറ് പേരെ ക്രൂരമായി കൊലപ്പെടുത്തിയ ജോളിയെ പൊലീസ് തന്ത്രപരമായി വലയിലാക്കിയത് കേരളസമൂഹം ആദരിക്കുമ്പോള്‍ മുല്ലപ്പള്ളി രാമചന്ദ്രന് മാത്രം ഇഷ്ടപ്പെട്ടിട്ടില്ലെന്ന് കോടിയേരി ആരോപിച്ചു. ജോളി കൂടുതല്‍ ആളുകളെ കൊല്ലണമായിരുന്നോ എന്നാണോ മുല്ലപ്പള്ളി ഉദ്ദേശിച്ചതെന്നും കോടിയേരി ചോദിച്ചു.

കൂടത്തായിയില്‍ സയനൈഡ് ഉപയോഗിച്ച് ജോളി കൊലപാതകങ്ങള്‍ നടത്തിയ വിവരം അഞ്ചുമാസം മുമ്പേ അറിഞ്ഞിരുന്നെന്നാണ് മുല്ലപ്പള്ളി പറയുന്നത്. എങ്കില്‍ അദ്ദേഹം എന്തുകൊണ്ട് പൊലീസിനെ അറിയിക്കാതെ മറച്ചുവെച്ചെന്ന് പൊതുസമൂഹത്തോട് പറയണമെന്നും കോടിയേരി ആവശ്യപ്പെട്ടു. കേസ് സംബന്ധിച്ച വസ്തുകളും തെളിവുകളും ക്രൈംബ്രാഞ്ച് ശേഖരിച്ചിട്ട് മാസങ്ങളായി. ഉപതിരഞ്ഞെടുപ്പ് പ്രഖ്യാപിച്ച ശേഷം അറസ്റ്റും മറ്റും നടത്തി ജനശ്രദ്ധ തിരിക്കാനും രാഷ്ട്രീയവിഷയങ്ങള്‍ ചര്‍ച്ചചെയ്യാതിരിക്കാനും സര്‍ക്കാരും ക്രൈംബ്രാഞ്ചും ഒത്തുകളിക്കുകയാണ്. പ്രധാനപ്രതി ജോളിയെ അറസ്റ്റ് ചെയ്യാന്‍ തെരഞ്ഞെടുത്ത സമയം കൃത്യമായ ആസൂത്രണത്തോടെയായിരുന്നു. ഉപതെരഞ്ഞെടുപ്പ് കഴിയും വരെ ആഭ്യന്തരമന്ത്രിയും ഡി.ജി.പിയും പാര്‍ട്ടി സെക്രട്ടറിയും ഈ നാടകം തുടരുമെന്നും മുല്ലപ്പള്ളി ആരോപിച്ചിരുന്നു.

ജോളിയെ സഹായിക്കാന്‍ പ്രാദേശിക മുസ്്‌ലിംനേതാക്കളടക്കം ശ്രമിച്ചിരുന്നു. അതിന്റെ തെളിവുകള്‍ ഏതാനും ദിവസം മുമ്പ് കണ്ടെത്തിയതോടെയാണ് മുല്ലപ്പള്ളി സര്‍ക്കാരിനെതിരെ തിരിഞ്ഞത്. സൂര്യനെ വിറ്റ് കാശാക്കാന്‍ നോക്കിയവരാണ് യുഡിഎഫ് എന്ന് സോളാര്‍ കേസ് ചൂണ്ടിക്കാണിച്ച് കോടിയേരി പറഞ്ഞു. പാലാരിവട്ടം പാലം യുഡിഎഫ് വികസനത്തിന്റെ ഉത്തമ മാതൃകയാണെന്നും കോടിയേരി പരിഹസിച്ചു. മഞ്ചേശ്വരത്ത് ആര്‍.എസ്.എസ് മുസ്്‌ലിം വോട്ടര്‍മാരെ ഭീഷണിപ്പെടുത്തുകയാണെന്നും കോടിയേരി ആരോപിച്ചു. പിണറായി സര്‍ക്കാരിന്റെ വികസന നേട്ടങ്ങള്‍ കാരണം ഇടതുപക്ഷം വികസന വിരോധികള്‍ എന്ന വിമര്‍ശനം മാറിയെന്നും അദ്ദേഹം വ്യക്തമാക്കി.

ഒരു സമുദായ സംഘടനയും ഇടതുപക്ഷത്തിന് എതിരാണെന്ന് വിശ്വസിക്കുന്നില്ലെന്ന് എന്‍എസ്എസിന്റെ ശരിദൂരത്തെ കുറിച്ച് മാധ്യമപ്രവര്‍ത്തകര്‍ ചോദിച്ചപ്പോള്‍ പ്രതികരിച്ചു. ഇടതുപക്ഷം വിശ്വാസികള്‍ക്ക് എതിരല്ല. അങ്ങനെ പ്രചരിപ്പിക്കാന്‍ ചിലര്‍ നീക്കം നടത്തുന്നുണ്ട്. വിശ്വാസികളെ സര്‍ക്കാരില്‍ നിന്നും എല്‍.ഡി.എഫില്‍ നിന്നും അകറ്റാനുള്ള ചിലരുടെ നീക്കം വിലപ്പോവില്ല. ലോക്‌സഭാ തെരഞ്ഞെടുപ്പില്‍ ചിലര്‍ തെറ്റിദ്ധാരണകള്‍ പറഞ്ഞ് പരത്തി. ഇത്തവണ അത് വിലപ്പോവില്ല. എന്‍.എസ്.എസ് ഒരു രാഷ്ട്രീയ പാര്‍ട്ടിക്കും പിന്തുണ പ്രഖ്യാപിച്ചിട്ടില്ല. എല്‍.ഡി.എഫ് സര്‍ക്കാരാണ് ശബരിമലയില്‍ വികസനപ്രവര്‍ത്തനങ്ങള്‍ നടത്തിയത്. ഈ സര്‍ക്കാര്‍ മോശമാണെങ്കില്‍ അടുത്തനിയമസഭാ തെരഞ്ഞെടുപ്പില്‍ വോട്ട് മാറ്റി ചെയ്യാമെന്നും കോടിയേരി പറഞ്ഞു. അയോധ്യാ കേസില്‍ വഖഫ് ബോര്‍ഡിന് സര്‍ക്കാര്‍ സഹായം ചെയ്യരുതെന്ന ശശി തരൂരിന്റെ നിലപാടിനോട് യുഡിഫ്‌ന്റെ അഭിപ്രായം എന്താണെന്ന് അറിയാന്‍ താല്‍പര്യമുണ്ടെന്നും കോടിയേരി ബാലകൃഷ്ണന്‍ ആവശ്യപ്പെട്ടു.