എം.ജി സര്‍വ്വകലാശാലയിലെ മാര്‍ക്ക് ദാനത്തില്‍ ഉന്നതവിദ്യാഭ്യാസമന്ത്രി കെ.ടി ജലീലിന്റെ വാദം കളവാണെന്ന് വിവരാവകാശ രേഖ വ്യക്തമാക്കുന്നതിനാല്‍ അദ്ദേഹം രാജിവയ്ക്കണമെന്ന് പ്രതിപക്ഷനേതാവ് രമേശ് ചെന്നിത്തല ആവശ്യപ്പെട്ടു. സര്‍വ്വകലാശാലയുടെ ചരിത്രത്തിലെ ഏറ്റവും വലിയ അഴിമതിയാണ് നടക്കുന്നത്. 140 കുട്ടികള്‍ക്കാണ് മാര്‍ക്ക് കൂട്ടി നല്‍കിയത്. മന്ത്രിയുടെ അറിവോടെ അദാലത്തിലാണ് തട്ടിപ്പ് നടന്നത്. എന്നാല്‍ അദാലത്തിലാണ് മാര്‍ക്ക് നല്‍കിയതെങ്കിലും ഉത്തരവാദിത്തം സിന്‍ഡികേറ്റിനാണെന്ന നിലപാടിലാണെന്ന് മന്ത്രി പ്രതികരിച്ചു. മാര്‍ക്ക് കൂട്ടി നല്‍കണമെന്ന് ആവശ്യപ്പെട്ട 60 അപേക്ഷകള്‍ പരിഗണനയിലാണ്. കഷ്ടപ്പെട്ട് പഠിച്ച് മാര്‍ക്ക് വാങ്ങിയവരെ അപമാനിക്കുന്നതിന് തുല്യമാണ് സര്‍ക്കാര്‍ നടപടിയെന്നും പ്രതിപക്ഷനേതാവ് ചൂണ്ടിക്കാട്ടി.

അഞ്ച് മാര്‍ക്കോളം നിയമവിരുദ്ധമായാണ് നല്‍കിയത്. സിന്‍ഡിക്കേറ്റിന്റെ നടപടി സര്‍വകലാശാല മാന്വലിന് വിരുദ്ധമാണ്. ഏത് ചട്ടം അനുസരിച്ചാണ് മാര്‍ക്ക് കൂട്ടി നല്‍കിയതെന്ന് വ്യക്തമാക്കാന്‍ മന്ത്രിയും വിസിയും തയാറാകണം. ഇക്കാര്യത്തില്‍ ഇരുവരും പറയുന്നത് കള്ളമാണെന്നും രമേശ് ചെന്നിത്തല ആരോപിച്ചു. എം.ജി. സര്‍വകലാശാലയില്‍ ബി.ടെക് വിദ്യാര്‍ഥികള്‍ക്കു മാര്‍ക്ക് ദാനം ചെയ്തതില്‍ മന്ത്രി കെ.ടി. ജലീലും പഴ്‌സണല്‍ സ്റ്റാഫും വഴിവിട്ട് ഇടപൈട്ടെന്ന് കഴിഞ്ഞ ദിവസമാണ് പ്രതിപക്ഷനേതാവ് വെളിപ്പെടുത്തിയത്. മന്ത്രി രാജിവച്ചു ജുഡീഷ്യല്‍ അന്വേഷണം നേരിടണമെന്നും പ്രതിപക്ഷ നേതാവ് ആവശ്യപ്പെട്ടിരുന്നു.

എന്‍.എസ്.എസ് വോളന്റിയറായതിനാല്‍ അധികമാര്‍ക്ക് അനുവദിക്കണമെന്നാണ് വിദ്യാര്‍ത്ഥി ആവശ്യപ്പെട്ടത്. ആദ്യം വെയിറ്റേജ് മാര്‍ക്ക് നല്‍കിയതിനാല്‍ വീണ്ടും നല്‍കാന്‍ ചട്ടമില്ലെന്ന് വ്യക്തമാക്കി ജോയിന്റ് രജിസ്ട്രാറും വൈസ് ചാന്‍സലറും ഈ വിദ്യാര്‍ത്ഥിയുടെ അപേക്ഷ തള്ളിയിരുന്നു. പ്‌ക്ഷെ, മന്ത്രി കെ.ടി ജലീലിന്റെ പ്രൈവറ്റ് സെക്രട്ടറി അദാലത്തില്‍ പങ്കെടുത്താണ് തിരിമറി നടത്തിയത്. അദാലത്തിലൂടെ മാര്‍ക്ക് കൂട്ടാന്‍ അധികാരമില്ലെന്നു സര്‍വകലാശാല ചൂണ്ടിക്കാട്ടിയതോടെ സിന്‍ഡിക്കേറ്റില്‍ ഔട്ട് ഓഫ് അജന്‍ഡയായാണ് ഇക്കാര്യം അവതരിപ്പിച്ചത്.