ചീഫ് വിപ്പ് പി.സി. ജോര്‍ജിന് അബ്ദുള്‍ നാസര്‍ മഅദ്‌നിയുടെ പിന്തുണ. പി.സി.ജോര്‍ജിന്റെ പൂഞ്ഞാര്‍ മണ്ഡലത്തില്‍ മുസ്ലീം വോട്ടുകള്‍ നിര്‍ണായകമാണ്. ഇക്കാലമത്രയും മുസ്ലീം വോട്ടുകള്‍ ജോര്‍ജ് ഉറപ്പാക്കിയിരുന്നു. എന്നാല്‍ യുഡിഎഫില്‍ ഉണ്ടായിക്കൊണ്ടിരിക്കുന്ന പ്രശ്‌നങ്ങള്‍ കാരണമാണ് ജോര്‍ജ് മഅദ്‌നിയെ കണ്ട് പിന്തുണ അഭ്യര്‍ത്ഥിച്ചത്. തെരഞ്ഞെടുപ്പില്‍ താന്‍ പിന്തുണയ്ക്കാമെന്നാണ് മഅദ്‌നി പറഞ്ഞത്.
മഅദ്‌നിക്ക് കേരളത്തിലെ മുസ്ലീം സമുദായത്തില്‍ വന്‍ പിന്തുണയാണുള്ളത്. മഅദ്‌നിയെ ജയിലിലടച്ചതിനെതിരെ ഇസ്ലാം മത വിശ്വാസികള്‍ക്കിടയില്‍ അമര്‍ഷം കനക്കുന്നു. കര്‍ണാടകം ഭരിച്ചിരുന്ന ബിജെപി സര്‍ക്കാരാണ് മഅദ്‌നിയെ ജയിലിലടച്ചെങ്കിലും തുടര്‍ന്ന് അധികാരത്തില്‍ വന്ന കോണ്‍ഗ്രസ് സര്‍ക്കാര്‍ അദ്ദേഹത്തെ സഹായിച്ചതേയില്ല. മാത്രവുമല്ല കോണ്‍ഗ്രസ് സര്‍ക്കാര്‍ മഅദ്‌നിയെ കൂടുതല്‍ കുരുക്കുകയും ചെയ്തു. കര്‍ണാടകത്തിലെ ആഭ്യന്തരമന്ത്രി മലയാളിയുമാണ്.
യുഡിഎഫില്‍ നിന്നും പ്രതികൂലമായ അന്തരീക്ഷമാണ് ജോര്‍ജ് അനുഭവിക്കുന്നത്. അടുത്ത നിയമസഭാ തെരഞ്ഞെടുപ്പില്‍ യുഡിഎഫ് സ്ഥാനാര്‍ത്ഥിയായാല്‍ തന്നെ അവര്‍ എത്രത്തോളം സഹായിക്കുമെന്ന് ജോര്‍ജിന് ഉറപ്പില്ല. കെ.എം.മാണി ജോര്‍ജിനു വേണ്ടി പിന്തുണ ആവര്‍ത്തിക്കുന്നുണ്ടെങ്കിലും അതിലും അദ്ദേഹത്തിനു അത്ര വിശ്വാസം പോരാ. ലീഗ് നേതൃത്വം ഇക്കാലമത്രയും ജോര്‍ജിനെ സഹായിച്ചിരുന്നു. എന്നാല്‍ ഉമ്മന്‍ചാണ്ടിയുമായി അടുപ്പം പുലര്‍ത്തുന്ന ലീഗ് പിന്തുണ ആവര്‍ത്തിക്കുമോ എന്ന് ജോര്‍ജിന് സംശയമുണ്ട്.
മഅദ്‌നിയെ തുറങ്കിലടച്ചത് ശരിയായില്ലെന്ന് സര്‍ക്കാര്‍ ചീഫ് വിപ്പ് സന്ദര്‍ശനാന്തരം മാധ്യമ പ്രവര്‍ത്തകരോട് പറഞ്ഞു. അദ്ദേഹം എത്രയും വേഗം ജയില്‍ മോചിതനാകണമെന്നും പ്രാര്‍ത്ഥിച്ചു. ജയില്‍ മോചിതനായ മഅദ്‌നിയെ കാണാന്‍ താന്‍ കാത്തിരിക്കുകയാണെന്നും ജോര്‍ജ് പറഞ്ഞു.
പൂഞ്ഞാര്‍ നിയോജകമണ്ഡലത്തില്‍ ക്രിസ്ത്യന്‍, മുസ്ലീം വോട്ടുകള്‍ക്കാണ് ഭൂരിപക്ഷം. ലീഗ് പറഞ്ഞാല്‍ വോട്ടു ചെയ്തിരുന്ന മുസ്ലീം വോട്ടര്‍മാര്‍ എന്നാല്‍ കാലാന്തരത്തില്‍ ലീഗില്‍ നിന്നകന്ന് മറ്റ് പാര്‍ട്ടികളുമായി അടുപ്പം സൂക്ഷിച്ചു. ഇത് ജോര്‍ജിന് നന്നായറിയാം. ജോര്‍ജിന് പൂഞ്ഞാര്‍ നിന്നും ഇടതു വലതു ബിജെപി ഭേദമന്യേ വോട്ടുകള്‍ ലഭിക്കാറുണ്ട്. വോട്ടര്‍മാരുമായുള്ള വ്യക്തിബന്ധമാണ് കാരണം. വോട്ടര്‍മാരെ പേരെടുത്തു വിളിക്കാന്‍ തക്കബന്ധം ജോര്‍ജിന് മണ്ഡലത്തിലുണ്ട്. പൂഞ്ഞാറിലെ തന്റെ സാന്നിധ്യം തന്നെ തനിക്ക് ഈസിവാക്ക് ഓവറിന് വഴിയൊരുക്കുമെന്ന് പി.സി.ജോര്‍ജ് വിശ്വസിക്കുന്നു. മഅദ്‌നിയുടെ മോചനത്തിനു വേണ്ടി കേന്ദ്ര സര്‍ക്കാരിനെ സമീപിക്കാനും ജോര്‍ജ് ആലോചിക്കുന്നു. സാമ്പത്തിക രാഷ്ട്രീയ ന്യൂനപക്ഷങ്ങളെ ഒപ്പം നിര്‍ത്താന്‍ ജോര്‍ജിനു കഴിഞ്ഞിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha