കൊച്ചി കടവന്ത്രയിലെ ഫ്‌ലാറ്റില്‍ നിന്ന് കൊക്കെയ്ന്‍ പിടികൂടിയ കേസിലെ അഞ്ച് പ്രതികളെയും 24 വരെ ജുഡീഷ്യല്‍ കസ്റ്റഡിയില്‍ വിട്ടു. എറണാകുളം പ്രിന്‍സിപ്പല്‍ സെഷന്‍സ് കോടതിയാണ് പ്രതികളെ ജുഡീഷ്യല്‍ കസ്റ്റഡിയില്‍ വിട്ടത്.എന്നാല്‍ കൂടുതല്‍ ചോദ്യം ചെയ്യുന്നതിനായി പ്രതികളെ വിട്ടുകിട്ടണമെന്ന് പോലീസിന്റെ ആവശ്യം കോടതി തളളി. തുടര്‍ ചോദ്യം ചെയ്യലിനായി കസ്റ്റഡി നീട്ടണമെന്ന പോലീസിന്റെ ആവശ്യമാണ് കോടതി തള്ളിയത്.
കൊക്കെയ്ന്‍ കൈവശം വെച്ച മോഡല്‍ രേഷ്മ രംഗസ്വാമി, സഹ സംവിധായിക ബ്ലെസ്സി സില്‍വസ്റ്റര്‍, നടന്‍ ഷൈന്‍ ടോം ചാക്കോ, ടിന്‍സി ബാബു, സ്‌നേഹ ബാബു എന്നിവരെ കൂടുതല്‍ ചോദ്യം ചെയ്യാനായി വിട്ട്കിട്ടണമെന്നാവശ്യപ്പെട്ടാണ് പോലീസ് കോടതിയെ സമീപിച്ചത്. കഴിഞ്ഞ ദിവസം പ്രതികളെ ചോദ്യം ചെയ്യാനുള്ള സമയം കഴിഞ്ഞിരുന്നു. ഇതിനെ തുടര്‍ന്നായിരുന്നു പോലീസിന്റെ അവശ്യം.
കൊക്കെയിന്റെ ഉറവിടം കണ്ടെത്തുന്നതിന് ഒന്നും രണ്ടും പ്രതികളായ ബ്ലെസ്സി, രേഷ്മ എന്നിവരെ കൂടുതല്‍ ചോദ്യം ചെയ്യാന്‍ വിട്ടുതരണമെന്ന് പോലീസിനു വേണ്ടി ഹാജരായ അഭിഭാഷകന്‍ ആവശ്യപ്പെട്ടു. ചുരുങ്ങിയ ദിവസം മാത്രമേ ചോദ്യം ചെയ്യാന്‍ കഴിഞ്ഞുള്ളൂ. കൊക്കെയിന്റെ ഉറവിടവും മറ്റും കൂടുതല്‍ പരിശോധിക്കേണ്ടതുണ്ട്. കേസുമായി ബന്ധപ്പെട്ട് കൂടുതല്‍ വസ്തുതകള്‍ വെളിച്ചത്തു കൊണ്ടുവരുന്നതിനായി പ്രതികളെ വീണ്ടും കസ്റ്റഡിയില്‍ തരണമെന്ന് കോടതിയില്‍ ആവശ്യപ്പെട്ടെങ്കിലും കോടതി നിരസിക്കുകയായിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha