അഞ്ച് നിയമസഭാ മണ്ഡലങ്ങളിലെ വാശിയേറിയ ഉപതെരഞ്ഞെടുപ്പ് പ്രചാരണത്തിന് ഇന്ന് കൊട്ടിക്കലാശം. ഒരുമാസത്തിലേറെ നീണ്ടുനിന്ന ചൂടിയേറിയ പ്രചാരണത്തിനാണ് കൊടിയിറങ്ങുന്നത്. നാളെ നിശബ്ദ പ്രചാരണത്തിന്റെ ദിവസം. തിങ്കളാഴ്ചയാണ് വോട്ടെടുപ്പ്. എം.എല്‍.എ മരിച്ചതിനെ തുടര്‍ന്ന് മഞ്ചേശ്വരത്തും എം.എല്‍.എമാര്‍ പാര്‍ലമെന്റ് അംഗങ്ങളായതോടെ വട്ടിയൂര്‍ക്കാവിലും അരൂരിലും എറണാകുളത്തും കോന്നിയുലും ആണ് ഉപതെരഞ്ഞെടുപ്പിന് കളമൊരുങ്ങിയത്. തെരഞ്ഞെടുപ്പ് ഫലം നിയമസഭയില്‍ ഭരണകക്ഷിക്കോ പ്രതിപക്ഷത്തിനോ എന്‍.ഡി.എയ്‌ക്കോ നിര്‍ണായകമല്ലെങ്കിലും രാഷ്ട്രീയമായി മൂന്ന് മുന്നണികള്‍ക്കും പ്രധാനപ്പെട്ടതാണ്.

ലോക്‌സഭാ തെരഞ്ഞെടുപ്പില്‍ യു.ഡി.എഫിനുണ്ടായ ഉജ്ജ്വല വിജയവും പാലായിലെ കനത്ത പരാജയവും കടന്നാണ് അഞ്ചിടത്ത് അംഗത്തിനിറങ്ങിയത്. മാര്‍ക്ക്ദാന വിവാദവും വോട്ടുകച്ചവടവും സജീവ ചര്‍ച്ചയായ പ്രചരണത്തില്‍ എന്‍.എസ്.എസ് നേതൃത്വം സര്‍ക്കാരിനെതിരെ തുറന്നടിക്കുക കൂടി ചെയ്തതോടെ എല്‍.ഡി.എഫിന് കനത്ത ആഘാതമായി. സമദൂരത്തില്‍ നിന്ന് ശരിദൂര നിലപാട് എന്‍.എസ്.എസ് സ്വീകരിച്ചത് കോണ്‍ഗ്രസ് സ്ഥാനാര്‍ത്ഥിയെ പിന്തുണയ്ക്കാനാണെന്ന് ചൂണ്ടിക്കാട്ടി സി.പി.എം തെരഞ്ഞെടുപ്പ് കമ്മീഷന് പരാതി നല്‍കിയിരിക്കുകയാണ്. ബി.ജെ.പി നേതാവ് ഒ. രാജഗോപാലും ശരിദൂരത്തിനെതിരെ രംഗത്തെത്തിയിരിക്കുകയാണ്. സമുദായ സംഘടനകള്‍ അവരുടെ ആവശ്യങ്ങള്‍ നേടിയെടുക്കാന്‍ താരാതരമായി ഓരോ സിദ്ധാന്തങ്ങള്‍ സ്വീകരിക്കുകയാണെന്ന് അദ്ദേഹം ആരോപിച്ചു.

എന്‍.എസ്.എസിന് ശക്തമായ അടിത്തറയുള്ള വട്ടിയൂര്‍ക്കാവില്‍ എല്‍.ഡി.എഫും എസ്.എന്‍.ഡി.പിക്ക് വേരുള്ള കോന്നിയിലും അരൂരിലും യു.ഡി.എഫിനും അടിപതറുമോ എന്ന് ആശങ്കയുണ്ട്. മുന്‍ കാലങ്ങളില്‍ നിന്ന് വ്യത്യസ്തമായി പ്രധാന നേതാക്കള്‍ വിവിധ മണ്ഡങ്ങളില്‍ കൂടുതല്‍ വോട്ടര്‍മാരെ നേരില്‍ കണ്ട് വോട്ട് അഭ്യര്‍ത്ഥിച്ചിട്ടുണ്ട്. അഞ്ച് മണ്ഡലങ്ങളിലും എല്‍.ഡി.എഫിന് വേണ്ടി മന്ത്രിമാര്‍ തന്നെ നേരിട്ടിറങ്ങി. യു.ഡി.എഫ് ക്യാമ്പിന് ആവേശമായി എ.കെ ആന്റണി, ഉമ്മന്‍ചാണ്ടി, രമേശ് ചെന്നിത്തല, പി.കെ കുഞ്ഞാലിക്കുട്ടി തുടങ്ങിയ നേതാക്കള്‍ സജീവമായിരുന്നു. കുമ്മനം രാജശേഖരന്‍ തന്നെയായിരുന്നു ബി.ജെ.പിയുടെ താര പ്രചാരകന്‍. സുരേഷ് ഗോപിയും വിവിധ മണ്ഡലങ്ങളില്‍ പര്യടനം നടത്തി.

എല്‍.ഡി.എഫിനെ സംബന്ധിച്ചിടത്തോളം ലോക്‌സഭാ തെരഞ്ഞെടുപ്പിലെ പരാജയം ഒരു താല്‍ക്കാലിക പ്രതിഭാസമാണെന്ന് തെളിയിക്കാന്‍ അഞ്ചിടത്തും വിജയിക്കണം. പാലായിലെ നാണക്കേടില്‍ നിന്ന് രക്ഷപെടാന്‍ യു.ഡി.എഫിനും അത് തന്നെ വേണം. എന്‍.ഡി.എ ആകട്ടെ വട്ടിയൂര്‍ക്കാവും കോന്നിയും മഞ്ചേശ്വരവുമാണ് ലക്ഷ്യമിടുന്നത്. രണ്ടിടത്തും ഓര്‍ത്തഡോക്‌സ് സഭയുടെ പിന്തുണയും എന്‍.ഡി.എയ്ക്കുണ്ട്. വട്ടിയൂര്‍ക്കാവിലും മഞ്ചേശ്വരത്തും കോന്നിയിലും ത്രികോണ മത്സരം തന്നെയാണ്. മൂന്നിടത്തും ശബരിമല പ്രധാന പ്രചരണ വിഷയം തന്നെ. കാരണം ഹൈന്ദവ ഭൂരിപക്ഷ മണ്ഡലങ്ങളാണിവ. ക്രിസ്ത്യന്‍ ഭൂരിപക്ഷ മണ്ഡലമായ എറണാകുളത്ത് ശബരിമലയും ആചാര വിഷയങ്ങളും ചര്‍ച്ചയേ ആയില്ല. പതിവില്‍ നിന്ന് വ്യത്യസ്തമായി സാമുദായിക സംഘടനകള്‍ നേരിട്ട് തെരഞ്ഞെടുപ്പിനിറങ്ങി എന്ന പ്രത്യേകതയുണ്ട് ഇത്തവണ. അതിനെ കേരളത്തിന്റെ മതേതരമനസ്സ് എങ്ങനെ വിലയിരുത്തുമെന്നുള്ള കാര്യംകൂടി ഈ തെരഞ്ഞെടുപ്പ് ഫലം വ്യക്തമാക്കും.