വട്ടിയൂര്ക്കാവ് ഉപതെരഞ്ഞെടുപ്പിന് മണിക്കൂറുകള് ബാക്കി നില്ക്കെ ഓര്ത്തഡോക്സ് സഭാ വൈദികര് നടത്തിയ വാര്ത്താസമ്മേളനം ചീറ്റിപ്പോയി
വട്ടിയൂര്ക്കാവ് ഉപതെരഞ്ഞെടുപ്പിന് മണിക്കൂറുകള് ബാക്കി നില്ക്കെ ഓര്ത്തഡോക്സ് സഭാ വൈദികര് നടത്തിയ വാര്ത്താസമ്മേളനം ചീറ്റിപ്പോയി. ഉപതിരഞ്ഞെടുപ്പ് കലാശക്കൊട്ടു ദിവസം വാര്ത്താസമ്മേളമെന്ന് പറഞ്ഞ് അച്ചന്മാര് വന്നപ്പോള് സഭയുടെ ഔദ്യോഗിക നിലപാട് വ്യക്തമാക്കുമെന്നാണ് എല്ലാവരും കരുതിയത്. തലസ്ഥാനത്ത് പത്രപ്രവര്ത്തകയൂണിയന്റെ കേസരി സ്മാരക ഹാളില് വാര്ത്താ സമ്മേളനം വിളിച്ചത് ഓര്ത്തഡോക്സ് സഭാ മാനേജിംഗ് കമ്മിറ്റി അംഗമായ ഫാ. കെ.കെ. ഗീവര്ഗീസും ഫാ. കെ.കെ. തോമസും പിന്നെ അഡ്വ. ഡാനിയും. ഉപതിരഞ്ഞെടുപ്പിന്റെ പരസ്യ പ്രചാരണം തീരുന്ന ദിവസം സ്ഥാനാര്ത്ഥികള്ക്കൊപ്പം ഓടിയിരുന്ന ചാനല് ക്യാമറകളെ അടിയന്തരം പറഞ്ഞ് വിളിച്ചുവരുത്തിയതായിരുന്നു.
സഭാ നിലപാട് ചോദിച്ചപ്പോള്, 'എന്റെ വ്യക്തിപരമായ നിലപാട് ബി.ജെ.പിക്ക് വോട്ട് ചെയ്യണമെന്നാണ്. അത് ചെയ്യുകയും ചെയ്യും.'
മാധ്യമ പ്രവര്ത്തകന്: 'അച്ചന്റെ നിലപാടല്ല, സഭയുടെ നിലപാട് പറയണം.'
അച്ചന്: 'അത് എനിക്കറിയില്ല, ഞാന് പറഞ്ഞത് എന്റെ നിലപാടാണ്.'
മാധ്യമ പ്രവര്ത്തകന്: 'വിശ്വാസികള് ആര്ക്ക് വോട്ട് ചെയ്യണമെന്നാണ് സഭയുടെ നിലപാട്?'
അച്ചന്: 'അത് സഭയുടെ ഔദ്യോഗിക വക്താവ് ഫാ. കോനാട്ട് അച്ചന് പറഞ്ഞിട്ടുണ്ട് സഭയെ സഹായിച്ചവരെ സഭ സഹായിക്കണം എന്ന്. ഞാന് പറഞ്ഞത് എന്റെ നിലപാടാണ്...'
നിലപാട് സംബന്ധിച്ച തര്ക്കം മുറുകിയപ്പോള് മറ്റൊരു മാധ്യമ പ്രവര്ത്തകന് ചോദിച്ചു: 'അച്ചോ, തിരുവനന്തപുരം ഭദ്രാസനാധിപന് നവോത്ഥാന സമിതി സെക്രട്ടറിയായി ഇടതുപക്ഷത്താണല്ലോ. ദേവലോകം അരമനയില് നിന്നുള്ള കല്പന, ബി.ജെ.പിക്ക് അനുകൂലമാണ്. അപ്പോള്... വോട്ട് ചെയ്യേണ്ട വിശ്വാസികള് എന്താണ് ചെയ്യേണ്ടത്?' ഓര്ക്കാപ്പുറത്തെ ചോദ്യം വന്നപ്പോള് ഫാ. ഗീവര്ഗീസ് നിന്നു വിയര്ത്തു. തനിക്ക് രാഷ്ട്രീയം അറിയില്ലെന്നും രാഷ്ട്രീയക്കളികള് അറിയില്ലെന്നും വാര്ത്താസമ്മേളത്തിന്റെ തുടക്കത്തിലും നടുക്കത്തിലുമൊക്കെ നൂറുവട്ടം പറഞ്ഞതാണെന്നും ആവര്ത്തിച്ചു.
ഈ കോലാഹലത്തിനെല്ലാമിടയില് വേദിയിലിരുന്ന ആമുഖക്കാരന് അഡ്വ. ഡാനി ആരെന്ന് ആരോ ഒരു ചോദ്യം ചോദിച്ചു. അത് തനിക്കറിയില്ലെന്നും, തിരുവനന്തപുരത്ത് കാരനായതു കൊണ്ട് ഡാനിയെ അറിയില്ലെന്ന് അച്ചന് പ്രതികരിച്ചു. ചോദിച്ചും പറഞ്ഞും വന്നപ്പോള് ഈ അഭിഭാഷകമായ ഡാനി, ബി.ജെ.പി യുവജന വിഭാഗമായ യുവമോര്ച്ചയുടെ സംസ്ഥാന ഭാരവാഹിയാണ്! അതോടെ, കാര്യങ്ങളുടെ കിടപ്പ് മനസ്സിലായി. തിരഞ്ഞെടുപ്പിന്റെ കലാശക്കൊട്ട് ദിവസം, ഓര്ത്തഡോക്സ് സഭയുടെ ഔദ്യോഗിക നിലപാടെന്ന മട്ടില് ബി.ജെ.പി അനുകൂല വാര്ത്താസമ്മേളനം സംഘടിപ്പിച്ച് വിശ്വാസികളെ കണ്ഫ്യൂഷനില് ആക്കാനുള്ള ഗൂഢതന്ത്രം ചീറ്റിപ്പോവുകയും ചെയ്തു.
https://www.facebook.com/Malayalivartha
