കേരളം വളരെയധികം ആകാംക്ഷയോടെ കാത്തിരിക്കുന്ന അഞ്ചു നിയമസഭ മണ്ഡലങ്ങളിലെ ഉപതെരഞ്ഞെടുപ്പ് ഫലം അറിയാന്‍ ഇനി  മിനിട്ടുകള്‍ മാത്രം. വോട്ടെണ്ണല്‍ രാവിലെ എട്ടിന് ആരംഭിക്കും. ആദ്യ ഫലസൂചന എട്ടരയോടെ ലഭ്യമാകും. ഔദ്യോഗിക പ്രഖ്യാപനം വൈകീട്ട് മൂന്നോടെ ഉണ്ടാകും. വോട്ടെണ്ണലിന് എല്ലാ ഒരുക്കങ്ങളും പൂര്‍ത്തിയായതായി മുഖ്യതെരഞ്ഞെടുപ്പ് ഓഫിസര്‍ ടിക്കാറാം മീണ അറിയിച്ചു.നസംസ്ഥാന രാഷ്ട്രീയത്തില്‍ നിര്‍ണായക സ്വാധീനമുണ്ടാക്കുന്ന ഉപതെരഞ്ഞെടുപ്പ് ഫലം തങ്ങള്‍ക്ക് അനുകൂലമാകുമെന്നാണ് ഇടത്-വലത് മുന്നണികള്‍ അവകാശപ്പെടുന്നത്.
അഞ്ചില്‍ നാലെണ്ണം യു.ഡി.എഫിന്റെയും ഒന്ന് ഇടതുമുന്നണിയുടെയും സിറ്റിങ് സീറ്റുകളാണ്. മഞ്ചേശ്വരം, വട്ടിയൂര്‍ക്കാവ് എന്നിവിടങ്ങള്‍ ബി.ജെ.പി രണ്ടാം സ്ഥാനത്ത് വന്നവയും. കേരളം കൂടാതെ മറ്റ് 17 സംസ്ഥാനങ്ങളിലെ 46 നിയമസഭ മണ്ഡലങ്ങളിലേക്ക് നടന്ന ഉപതെരഞ്ഞെടുപ്പിന്റെയും മഹാരാഷ്ട്ര, ഹരിയാന നിയമസഭ തെരഞ്ഞെടുപ്പിന്റെയും വോട്ടെണ്ണല്‍ ഇന്നാണ്. സമസ്തിപുര്‍ (ബിഹാര്‍), സത്താറ (മഹാരാഷ്ട്ര) ലോക്‌സഭ ഉപതെരഞ്ഞെടുപ്പ് ഫലവും ഇന്നറിയാം.