കാലിക്കറ്റ് സര്‍വകലാശാലയില്‍ നടക്കുന്നത് ലീഗിന്റെ താലിബാനിസമാണെന്ന് കോടിയേരി : ലീഗിന്റെ ഇടപെടല്‍ ഒരു തരത്തിലും അനുവദിക്കാനാവില്ലെന്നും കോടിയേരി
കാലിക്കറ്റ് സര്‍വകലാശാലയില്‍ നടക്കുന്നത് മുസ്‌ളീംലീഗിന്റെ താലിബാനിസമാണെന്ന് സി.പി.എം പോളിറ്റ്ബ്യൂറോ അംഗം കോടിയേരി ബാലകൃഷ്ണന്‍ പറഞ്ഞു. മുസ്‌ളീംലീഗ് പ്രാദേശിക കമ്മിറ്റി പറയുന്നതു പോലെയാണ് സര്‍വകലാശാല വൈസ് ചാന്‍സലര്‍ പ്രവര്‍ത്തിക്കുന്നതെന്നും അദ്ദേഹം കുറ്റപ്പെടുത്തി. സര്‍വകലാശാലയിലെ ഹോസ്റ്റല്‍ പ്രശ്‌നം പരിഹരിക്കണമെന്ന് ആവശ്യപ്പെട്ട് എസ്.എഫ്.ഐയുടെ നേതൃത്വത്തില്‍ നടത്തുന്ന സമരം ഉദ്ഘാടനം ചെയ്യുകയായിരുന്നു കോടിയേരി.
സര്‍വകലാശാലയുടെ ഭരണത്തില്‍ മുസ്‌ളീം ലീഗിന്റെ ഇടപെടല്‍ ഒരു തരത്തിലും അനുവദിക്കാനാവില്ല. ഇതിനെ ചെറുത്ത് തോല്‍പിക്കുക തന്നെ ചെയ്യും. ഹോസ്റ്റല്‍ പ്രശ്‌നം പരിഹരിക്കാന്‍ സര്‍ക്കാര്‍ തയ്യാറായില്ലെങ്കില്‍ സമരം സി.പി.എം ഏറ്റെടുക്കുമെന്നും അദ്ദേഹം മുന്നറിയിപ്പ് നല്‍കി. അണ്‍ എയ്ഡഡ് കോഴ്‌സുകളില്‍ വന്‍ തുക ഫീസ് നല്‍കി പ്രവേശനം തേടുന്ന വിദ്യാര്‍ത്ഥികള്‍ക്ക് പ്രത്യേക ഹോസ്റ്റല്‍ സൗകര്യമാണ് ഒരുക്കേണ്ടത്. അല്ലാതെ സാധാരണ വിദ്യാത്ഥികള്‍ക്ക് ലഭിക്കേണ്ട ഹോസ്റ്റല്‍ സൗകര്യം അണ്‍ എയ്ഡഡ് വിദ്യാര്‍ത്ഥികള്‍ക്ക് നല്‍കുകയല്ല വേണ്ടത്. യു.ഡി.എഫ് സര്‍ക്കാരിന്റെ വിദ്യാഭ്യാസ കച്ചവടത്തിന്റെ ഭാഗമാണിത്. ഇക്കാര്യം ഉന്നയിച്ച് പലതവണ വിദ്യാര്‍ത്ഥികള്‍ മുഖ്യമന്ത്രിയെ സമീപിച്ചിരുന്നുവെന്നും അദ്ദേഹം പറഞ്ഞു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
