ലോകത്തെ അതിബുദ്ധിമാന്മാരുടെ പട്ടികയില് മലയാളി ബാലിക
ലോകത്തിനു മുന്നില് ബുദ്ധിശക്തിയില് വിസ്മയം തീര്ത്ത് മലയാളി ബാലിക. ലോകം അംഗീകരിക്കപ്പെട്ട ഐക്യു ടെസ്റ്റുകളില് 98 ശതമാനം എങ്കിലും മാര്ക്ക് വാങ്ങുന്നവര്ക്ക് മാത്രം അംഗത്വം നല്കുന്ന മെന്സ ഇന്റര്നാഷണല് ക്ലബില് അംഗത്വം എടുത്താണ് ലണ്ടനില് താമസിക്കുന്ന മലയാളി ദമ്പതികളുടെ മകള് ലൊറെയ്ന് മിന്നാ ജോണ് ലോകമെമ്പാടുമുള്ള മലയാളികള്ക്ക് ആവേശം ആയി മാറിയത്.
മെന്സയില് അംഗത്വം ലഭിക്കുന്ന ഏറ്റവും പ്രായം കുറഞ്ഞ വ്യക്തിത്വങ്ങളില് ഒരാള് കൂടിയാകുകയാണ് ലൊറെയ്ന്. വിവിധ വിഷയങ്ങളെ ആധാരമാക്കിയുള്ള പലവിധത്തിലുള്ള ചോദ്യങ്ങള്ക്കു പിഴവില്ലാത്ത ഉത്തരങ്ങള് നല്കിയ ലൊറെയ്ന് മിന്ന ജോണ്, ജഡ്ജിങ് പാനലിന്റെ പ്രശംസയും പിടിച്ചുപറ്റി.
മെന്സയിലെ അംഗത്വം ലൊറെയ്ന് മിന്ന ജോണിനു ലഭിക്കുമ്പോള് ലോക നന്മയ്ക്കായി ഒരു പെണ്കുട്ടി മലയാളികളെ പ്രതിനിധീകരിച്ച് രംഗത്തിറങ്ങുന്നു എന്ന പ്രത്യേകതയുണ്ട്. ബുദ്ധിസാമര്ത്ഥ്യം തെളിയിക്കപ്പെടുന്ന പ്രത്യേക പരീക്ഷയുടെ അടിസ്ഥാനത്തിലാണ് തെരഞ്ഞെടുപ്പ്. ഓസ്ട്രേലിയക്കാരനായ അഭിഭാഷകന് റോളണ്ട് ബെറിലും, ബ്രിട്ടീഷ് ശാസ്ത്രജ്ഞനായ ഡോ. ലാന്സ് വെയറും 1946ല് ഓക്സ്ഫോര്ഡില് രൂപം നല്കിയ സംരംഭമാണിത്. അതിബുദ്ധിയും അസാമാന്യ വൈദഗ്ധ്യവും പ്രകടിപ്പിക്കുന്നവര്ക്ക് അംഗീകാരം നല്കുന്ന ഇന്റര്നാഷണല് ഓര്ഗനൈസേഷനാണ് മെന്സ. ഉയര്ന്ന ഐ.ക്യു നിലവാരമുള്ളവരുടെ ആഗോള കൂട്ടായ്മയായ \'മെന്സ ഇന്റര്നാഷണലില്\' 1.10 ലക്ഷത്തോളം പേരാണ് ഇപ്പോള് തെരഞ്ഞെടുക്കപ്പെട്ടിട്ടുള്ളത്. ഇതില് അമ്പത് ശതമാനത്തോളം അമേരിക്കക്കാരാണ്. രണ്ടര വയസുമുതല് 103 വയസുവരെയുള്ളവര് ഇപ്പോള് ഈ സംഘത്തിലുണ്ട്.
രണ്ടു മണിക്കൂര് ദൈര്ഘ്യമുള്ള രണ്ടു പരീക്ഷകളില് നിന്നാണ് ടോപ്പ് 2 % മാത്രമുള്ള അതിബുദ്ധിശാലികളെ തെരഞ്ഞെടുക്കുന്നത്. അതിബുദ്ധിശാലികളുടെ വൈദഗ്ധ്യം സമൂഹത്തിന്റെ നന്മയ്ക്കായി വിനിയോഗിക്കുക എന്നതാണ് \'മെന്സ\' എന്ന സംഘടനയുടെ പ്രവര്ത്തന ലക്ഷ്യം. അംഗത്വം നേടിയ ബുദ്ധിശാലികള്ക്ക് പരസ്പരം ആശയ വിനിമയത്തിന് അവസരമൊരുക്കി വലിയ നേട്ടങ്ങള്ക്കുള്ള സാഹചര്യം സൃഷ്ടിക്കുന്നതാണ് മെന്സയുടെ രീതി.
ലൊറെയ്ന്റെ പരീക്ഷണങ്ങള്ക്കും ഗവേഷണങ്ങള്ക്കും പൂര്ണ പിന്തുണയുമായി മാതാപിതാക്കള് കൂടെയുണ്ട്. എറണാകുളം ജില്ലയിലെ പുത്തന്കുരിശ് സ്വദേശിയാണ് പോള് ജോണ്. മാലിനി പോളാണ് ലൊറെയ്ന്റെ മാതാവ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
https://www.facebook.com/Malayalivartha
