ശോഭനയുടെ \'റിവേഴ്സ് ഓഫ് ഇന്ത്യ എന്ന നൃത്തപരിപാടിയിലൂടെ ദേശീയ ഗെയിംസിന് നാളെ സമാപനം
ദേശീയ ഗെയിംസ് സമാപനച്ചടങ്ങുകള് നാളെ വൈകിട്ട് കാര്യവട്ടം രാജ്യാന്തര സ്റ്റേഡിയത്തില് നടക്കും. ചടങ്ങിലെ കലാപരിപാടികള് ഉള്പ്പെടെയുള്ളവയുടെ ഒരുക്കങ്ങള് അന്തിമഘട്ടത്തിലാണ്. വൈകിട്ട് ആറിനു തുടങ്ങുന്ന പരിപാടി രാത്രി ഒന്പതിന് അവസാനിക്കും. നടി ശോഭനയുടെ \'റിവേഴ്സ് ഓഫ് ഇന്ത്യ എന്ന നൃത്തശില്പമാണു സമാപനച്ചടങ്ങിലെ മുഖ്യ ആകര്ഷണം. ചടങ്ങില് പങ്കെടുക്കാന് പാസ് സമ്പ്രദായമുണ്ടാകില്ല. സംവിധായകന് ടി.കെ. രാജീവ്കുമാറാണു സമാപനച്ചടങ്ങുകളുടെ സംവിധാനം നിര്വഹിക്കുന്നത്. ഉദ്ഘാടനച്ചടങ്ങിലെ താളപ്പിഴകളെക്കുറിച്ചു വലിയ പരാതികളുണ്ടായതിനാല് കര്ശന മുന്നൊരുക്കത്തോടെയാണു സമാപനച്ചടങ്ങുകള് നടക്കുന്നത്. ഗവര്ണര് പി. സദാശിവമാണു മുഖ്യാതിഥി.
ഇന്ത്യയിലെ നദികളെക്കുറിച്ചുള്ള ശോഭനയുടെ നൃത്തശില്പം ആധുനിക സാങ്കേതികവിദ്യയുടെ സഹായത്തോടെയാണ് ഒരുക്കിയിട്ടുള്ളത്. ഇന്ത്യയിലെ പല നദികളില് നിന്നുള്ള വെള്ളം നര്ത്തകര് ഒഴുക്കുന്നതു വലിയ പ്രവാഹമായി മാറുന്നതാണു നൃത്തശില്പത്തിന്റെ ആശയം. ഇന്ത്യയിലെ മറ്റു സംസ്ഥാനങ്ങളില് നിന്നുള്ള പരമ്പരാഗത നൃത്തരൂപങ്ങളുടെ അവതരണവും ഉണ്ടാകും. വെടിക്കെട്ടും ലൈറ്റ് ഷോയും ഉണ്ടാകും. മാര്ച്ച്പാസ്റ്റിനും മെഡല് വിതരണത്തിനും ശേഷം അടുത്ത ഗെയിംസ് വേദിയായ ഗോവയില് നിന്നുള്ള സംഘം കലാപരിപാടികള് അവതരിപ്പിക്കും.
ഉദ്ഘാടനച്ചടങ്ങില് അതിഥികളില് പലര്ക്കും ഇരിപ്പിടം കിട്ടിയില്ലെന്നു പരാതി ഉണ്ടായിരുന്നു. അതിനാല് ഓരോ വിഭാഗത്തിനുമായി പ്രത്യേകം മേഖലകള് തിരിച്ചിട്ടുണ്ട്. കാല് ലക്ഷം കസേരകള് ജനങ്ങള്ക്കായി മാറ്റിവച്ചിട്ടുമുണ്ട്. മുകളിലും താഴെയുമായി കാല്ലക്ഷം സീറ്റുകളാണു ജനങ്ങള്ക്കായി ഒഴിച്ചിട്ടിരിക്കുന്നത്. പാസ് ഇല്ലാത്തതിനാല് ആദ്യം വരുന്നവര്ക്കു സീറ്റ് കിട്ടും.
മന്ത്രിമാര്, എംപിമാര്, എംഎല്എമാര്, തദ്ദേശ സ്ഥാപന ജനപ്രതിനിധികള് എന്നിവര്ക്കും കുടുംബാംഗങ്ങള്ക്കും മുഖ്യവേദിയോടു ചേര്ന്നാണ് ഇരിപ്പിടമൊരുക്കിയിരിക്കുന്നത്. ഉന്നത ഉദ്യോഗസ്ഥര്ക്കും മാധ്യമപ്രവര്ത്തകര്ക്കും കുടുംബാംഗങ്ങള്ക്കുമായി പ്രത്യേക വിഭാഗമുണ്ട്. കായികതാരങ്ങള്ക്കും ഗെയിംസ് അധികൃതര്ക്കും സര്ക്കാര് ഉദ്യോഗസ്ഥര്ക്കും സൈനികര്ക്കും കേരള യൂണിവേഴ്സിറ്റി അധ്യാപകര്ക്കും വിദ്യാര്ഥികള്ക്കുമൊക്കെ പ്രത്യേക സെക്ടറുകളുണ്ട്. ഇതില് പ്രവേശനത്തിനു തിരിച്ചറിയല് കാര്ഡ് കാണിക്കണം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
