കോഴിക്കോട്ട് നടന്ന സംസ്ഥാന സ്‌കൂള്‍ കലോത്സവത്തിലെ നൃത്തവേദിയില്‍ മികച്ച പ്രകടനം കാഴ്ചവച്ച, സാമ്പത്തികമായി പിന്നാക്കം നില്‍ക്കുന്ന പന്ത്രണ്ടു കുട്ടികളുടെ നൃത്തപഠനം ഏറ്റെടുത്തതിനൊപ്പം അവരുടെ കുടുംബത്തെ സാമ്പത്തികമായി സഹായിക്കുകയെന്ന വലിയ ദൗത്യത്തിന് കൂടി മഞ്ജു തുടക്കമിട്ടു. \' നൃത്തപഠനം മുടങ്ങാതിരിക്കാനുള്ള സഹായം പ്രതീക്ഷിച്ചെത്തിയ പന്ത്രണ്ടു കുട്ടികള്‍ക്കു മുന്നില്‍ മഞ്ജു സ്‌നേഹത്തിന്റെ വലിയൊരു മുദ്രയായി. അവരുടെ പ്രിയപ്പെട്ട ചേച്ചിയായി മഞ്ജു അവരിലൊരാളായി എന്നു പറയുന്നതാവും ശരി.
\'ഇതിനെ ഒരു സഹായം എന്ന് വിളിക്കാന്‍ ഞാന്‍ ഇഷ്ടപ്പെടുന്നില്ല. എന്റെ സമ്പാദ്യത്തില്‍ നിന്നൊരു പങ്ക്, അത്രമാത്രം. എന്നേക്കാള്‍ എത്രയോ ഉയരെയാണ് നിങ്ങള്‍. ഒരു പാട് പ്രതിസന്ധികളെ അതിജീവിച്ചാണ് നിങ്ങള്‍ ഈ വിജയങ്ങള്‍ നേടിയത്. അതുകൊണ്ട് അതിന്റെ മധുരം വളരെ വലുതാണ്. എനിക്കറിയാം, എന്റെ അച്ഛനുമമ്മയും എന്നെ നൃത്തം പഠിപ്പിക്കാന്‍ എന്തെല്ലാം സഹിച്ചുവെന്ന്. പക്ഷേ, നിങ്ങളുടെ സങ്കടങ്ങളറിയുമ്പോള്‍ എന്റേത് ഒന്നുമല്ലായിരുന്നു എന്നു മനസ്സിലാകുന്നു.
എനിക്ക് അടിസ്ഥാന സാഹചര്യങ്ങളുണ്ടായിരുന്നു. നിങ്ങളില്‍ പലര്‍ക്കും അതില്ല. എനിക്കൊപ്പം വരാന്‍ അച്ഛനും അമ്മയുമുണ്ടായിരുന്നു. നിങ്ങളില്‍ പലര്‍ക്കും അവരുടെ കൂട്ടുമില്ല. മെച്ചപ്പെട്ട ജീവിതസാഹചര്യങ്ങള്‍ കിട്ടിയാല്‍ നിങ്ങളുടെ ചുവടുകളും മുദ്രകളും ഈറനണിഞ്ഞതാകില്ല എന്നുറപ്പാണ്. ഇനി നിങ്ങള്‍ കരയരുത്\'\'മഞ്ജു കുട്ടികളോടായി പറഞ്ഞു.
സ്‌കൂള്‍ പഠനം പൂര്‍ത്തിയാകുമ്പോള്‍ നൃത്തത്തില്‍ ശ്രദ്ധ കേന്ദ്രീകരിക്കാനാണ് തീരുമാനമെങ്കില്‍ രണ്ടു തരത്തില്‍ പഠനം തുടരാം. ഗുരുക്കന്മാരെ കുട്ടികള്‍ക്ക് തന്നെ തിരഞ്ഞെടുക്കാം. ഏത് ഇനത്തിലാണോ തുടര്‍പഠനം വേണ്ടത്, അതിനുള്ള സംവിധാനം മഞ്ജു ഒരുക്കും. കലാക്ഷേത്ര, കലാമണ്ഡലം തുടങ്ങിയ കേന്ദ്രങ്ങളില്‍ പ്രവേശനം നേടി പഠനം തുടരാനാണ് ആഗ്രഹമെങ്കില്‍ അവിടത്തെ എല്ലാ പഠനച്ചെലവും മഞ്ജു നല്‍കും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha