ആലപ്പുഴയിലെ എല്ലാ പ്രധാന വിനോദസഞ്ചര മേഖലകളേയും ഒന്നിച്ചു ചേര്‍ക്കുകയെന്ന ലക്ഷ്യത്തോടെ ആലപ്പുഴ ടൂറിസം വകുപ്പ് തയാറാക്കിയ മെഗാടൂറിസം സര്‍ക്യൂട്ട് പദ്ധതി നിശ്ചലമായിട്ട് വര്‍ഷങ്ങള്‍ കഴിഞ്ഞു.

52 കോടി 25 ലക്ഷം രൂപ ആയിരുന്നു പദ്ധതിയുടെ ആകെ തുക. 2013-ല്‍ അനുമതി ലഭിച്ച പദ്ധതിയുടെ നിര്‍മാണ പ്രവര്‍ത്തനങ്ങള്‍ 2014-ലാണ് ആരംഭിച്ചത്. കേന്ദ്ര സര്‍ക്കാരിന്റെ ഒമ്പത് കോടിയും സംസ്ഥാന സര്‍ക്കാരിന്റെ 27 കോടിയും അടക്കം ആകെ 38 കോടിയുടെ നിര്‍മാണ പ്രവര്‍ത്തനങ്ങളാണ് ഇതുവരെ നടത്തിയിട്ടുള്ളത്. എന്നാല്‍ ഇതില്‍ ഒന്നുപോലും ഇതുവരെ പ്രവര്‍ത്തനക്ഷമമായിട്ടില്ല.

മെഗാ ടൂറിസം സര്‍ക്യൂട്ടിനായി തയാറാക്കിയിരുന്നത് 21 പദ്ധതികള്‍ അടങ്ങിയ രൂപരേഖയാണ്. ഇതില്‍ 19 പദ്ധതികളുടെ പ്രവര്‍ത്തനങ്ങള്‍ പൂര്‍ത്തിയായി കിടക്കുകയാണെന്നാണ് ടൂറിസം വകുപ്പു പറയുന്നത്. കെഐഡിഎസിന്റെ കീഴിലായിരുന്നു ഈ നിര്‍മാണ പ്രവര്‍ത്തനങ്ങള്‍ എല്ലാം തന്നെ നടന്നത്. അരൂക്കുറ്റി, തണ്ണീര്‍മുക്കം, പള്ളാത്തുരുത്തി, നെടുമുടി, കഞ്ഞിപ്പാടം, തോട്ടപ്പള്ളി, കായംകുളം എന്നിവിടങ്ങളില്‍ ഹൗസ് ബോട്ട് ടെര്‍മിനലുകളും വട്ടക്കായല്‍, കരുമാടി എന്നിവിടങ്ങളില്‍ നൈറ്റ് ഹാള്‍ട്ട് ടെര്‍മിനലുകള്‍ എന്നിവയും നിര്‍മിക്കുകയെന്നതായിരുന്നു പദ്ധതിയുടെ പ്രധാന ലക്ഷ്യം.

വട്ടക്കായല്‍ നൈറ്റ് ഹാള്‍ട്ട് ടെര്‍മിനലിന് വേണ്ടി മാത്രം 12 കോടി രൂപയാണ് ചെലവാക്കിയത്. മൈക്രോ ഡെസ്റ്റിനേഷനുകളായി തഴുപ്പ്, വയംകരച്ചിറ, പാണ്ടി, കുതിരവട്ടന്‍ചിറ എന്നീ സ്ഥലങ്ങളും പദ്ധതിയില്‍ ഉള്‍പ്പെടുത്തിയിരുന്നു. അര്‍ത്തുങ്കല്‍, തോട്ടപ്പള്ളി എന്നീ ബീച്ചുകളുടെ നവീകരണവും പദ്ധതിയുടെ ഭാഗമായിരുന്നു. എന്നാല്‍ പദ്ധതിക്ക് ഇപ്പോള്‍ എന്ത് സംഭവിച്ചു എന്ന ചോദ്യത്തിനു കൃത്യമായ ഉത്തരം നല്‍കാന്‍ ഒരു ഉദ്യോഗസ്ഥരും തയാറാകുന്നില്ല. പദ്ധതികള്‍ ഉടന്‍ പൂര്‍ത്തിയാക്കാനുള്ള നടപടികള്‍ സ്വീകരിച്ചിട്ടുണ്ട് എന്നുമാത്രമേ ഉദ്യോഗസ്ഥര്‍ക്ക് പറയാനുള്ളു.

പഞ്ചായത്തുകളുടെയും സിആര്‍എസിന്റേയും അനുമതികള്‍ കൂടാതെയാണ് ടൂറിസം വകുപ്പ് ഈ പദ്ധതിയില്‍ തന്നെ പല നിര്‍മാണപ്രവര്‍ത്തങ്ങളും നടത്തിയത്. ആലപ്പുഴ വിനോദ സഞ്ചാരമേഖലയുടെ സ്വപ്നപദ്ധതിയായി ടൂറിസം വകുപ്പ് ഉയര്‍ത്തിക്കാട്ടിയ ഈ പദ്ധതിയില്‍ ഇത്രയും വലിയ പിഴവുകളുണ്ടായത് ഉദ്യോഗസ്ഥരുടെ തികഞ്ഞ അലംഭാവം കൊണ്ട് മാത്രമാണെന്നാണ് ആക്ഷേപം.രണ്ടു വര്‍ഷം കൊണ്ട് പൂര്‍ത്തിയാക്കും എന്നുപറഞ്ഞ പദ്ധതി ആറു വര്‍ഷം കഴിഞ്ഞിട്ടും പൂര്‍ത്തിയാക്കാന്‍ ടൂറിസം വകുപ്പിനു കഴിഞ്ഞിട്ടില്ല.

കൂടാതെ കെഎസ്ഇബിയില്‍ നിന്നും വൈദ്യുതി കണക്ഷന്‍ ലഭിക്കാത്തതും പദ്ധതിയെ പിന്നോക്കം വലിച്ചു. കോടികള്‍ മുടക്കി വികസനത്തിനായി നിര്‍മിച്ച കെട്ടിടങ്ങള്‍ പലതും ഇപ്പോള്‍ സാമൂഹിക വിരുദ്ധരുടെ താവളങ്ങളാണ്.

കെട്ടിടങ്ങളില്‍ പലതും രാത്രിയുടെ മറവില്‍ സാമൂഹിക വിരുദ്ധര്‍ അടിച്ച് പൊളിക്കുകയും ബാക്കിയുള്ളവ കാടുപിടിച്ച് നശിക്കുകയും ചെയ്തു. വ്യക്തമായ രൂപരേഖയില്ലാതെ നടപ്പിലാക്കിയതാണ് പദ്ധതി പാളിപ്പോകാന്‍ കാരണമെന്ന് ഉദ്യോഗസ്ഥര്‍ പോലും രഹസ്യമായി സമ്മതിക്കുന്നുമുണ്ട്.