മുന്‍ ബിഷപ്പ് ഫ്രാങ്കോ കത്തോലിക്ക സഭയ്ക്കുണ്ടാക്കിയ നാണക്കേട് ചെറുതല്ല. ഇതിന് പിന്നാലെ മൈസൂരു ബിഷപ്പിനെതിരെ ലൈംഗികാരോപണം. ഇതുസംബന്ധിച്ച് മൈസൂരു അതിരൂപത ബിഷപ്പ് കെ.എ വില്യമിനെതിരെ 37 വൈദികരാണ് മാര്‍പാപ്പയ്ക്ക് കത്തയച്ചത്. വില്യമും മറ്റൊരു വൈദികനായ ലെസ്ലി മോറിസും ചേര്‍ന്ന് ലൈംഗികമായി പീഡിപ്പിക്കാന്‍ ശ്രമിച്ചതായി ആരോപിച്ച് ഒരു യുവതി രംഗത്തെത്തിയിരുന്നു. യുവതിയുടെ തുറന്ന് പറച്ചില്‍ കാട്ടുതീപോലെ പടരുകയും ഇടവകക്കാര്‍ ഇത് പാടി നടക്കുകയും ചെയ്തു. ഇതോടെയാണ് സംഭവം പുറത്താകുന്നതും 37 അച്ചന്‍മാര്‍ രംഗത്തെത്തുകയും ചെയ്തത്.

ആരോപണങ്ങള്‍ അടിസ്ഥാനരഹിതമാണെന്ന് ബിഷപ്പ് വില്യം പറയുന്നത്. കേസ് രമ്യമായി പറഞ്ഞ് തീര്‍ക്കാനുള്ള ശ്രമങ്ങളും നടക്കുകയാണ്. അതിനിടെ മുംബൈ ആസ്ഥാനായ അസോസിയേഷന്‍ ഓഫ് കണ്‍സേന്‍ഡ് കാത്തലിക്‌സ് എന്ന സംഘടന ബിഷപ്പിനെതിരെ മൈസുരു പൊലീസില്‍ പരാതി നല്‍കിയിട്ടുണ്ട്. പരാതിക്കാരിയായ യുവതിയുടെ വീഡിയോ ദൃശ്യങ്ങളും പൊലീസിന് നല്‍കിയിട്ടുണ്ട്. രൂപതയിലെ ഫാമിലി കമ്മീഷനുമായി ബന്ധപ്പെട്ട് പ്രവര്‍ത്തിച്ചിരുന്ന യുവതിക്കുനേരെയാണ് ലൈംഗിക പീഡന ശ്രമമുണ്ടായത്.

ഫീല്‍ഡ് വര്‍ക്കിന്റെ പ്രതിദിന റിപ്പോര്‍ട്ട് സമര്‍പ്പിക്കാന്‍ രൂപത ആസ്ഥാനത്ത് എത്തിയപ്പോഴാണ് ബിഷപ്പും വൈദികനും മോശമായി പെരുമാറിയത്. വൈദികന്‍ ലെസ്ലി മോറിസ്, ലൈംഗികബന്ധത്തിന് നിര്‍ബന്ധിച്ചതായാണ് ആരോപണം. ബിഷപ്പ് അപമര്യാദയായി പെരുമാറുകയും അശ്ലീലച്ചുവയോടെ സംസാരിക്കുകയും ചെയ്തതായി യുവതി പറയുന്നു. ബിഷപ്പും അച്ചനും ഉപയോഗിച്ച ഭാഷയും വള്ളിപുള്ളി തെറ്റാതെ പരാതിയില്‍ പറയുന്നുണ്ട്. വഴങ്ങിയില്ലെങ്കില്‍ ജോലിയില്‍നിന്ന് പിരിച്ചുവിടുമെന്ന് ഭീഷണിപ്പെടുത്തിയതായും പരാതിക്കാരി പറയുന്നു വില്യം ബിഷപ്പായി എത്തിയ 2017 മുതലാണ് തനിക്ക് ദുരനുഭവമുണ്ടായത്. 2018ല്‍ താന്‍ ജോലി രാജിവെക്കുകയും ചെയ്തു. പുതിയ ജോലിസ്ഥലത്തും ബിഷപ്പിന്റെ ആളുകളെ തന്നെ പിന്തുടരുകയും ശല്യപ്പെടുത്തുകയും ചെയ്തതായി യുവതി പറയുന്നു.

ലൈംഗികാരോപണത്തിന് പുറമെ സാമ്പത്തിക തട്ടിപ്പ്, ഫണ്ട് വകമാറ്റല്‍ തുടങ്ങിയ പരാതിയും ബിഷപ്പിനെതിരെയുണ്ട്. സഭയുടെ ഫണ്ട് ബിഷപ്പും കൂട്ടരും ചേര്‍ന്ന് വകമാറ്റിയതായും ആരോപണമുണ്ട്. സഭയുടെ സ്ഥാപനങ്ങളില്‍ നിയമനത്തിനും വിദ്യാഭ്യാസ സ്ഥാപനങ്ങളിലെ പ്രവേശനത്തിനും വന്‍തുക കോഴയായി വാങ്ങാറുണ്ട്. സ്വന്തമായി കാര്‍ വാങ്ങുകയും പിന്നീട് അത് ഒരു യുവതിയുടെ പേരിലേക്ക് മാറ്റുകയും ചെയ്തതായും ബിഷപ്പിനെതിരെ ആരോപണമുണ്ട്. ബിനാമി പേരില്‍ നിരവധി വസ്തുവകകള്‍ ബിഷപ്പ് സ്വന്തമാക്കിയതായും പരാതിയില്‍ പറയുന്നുണ്ട്. കൂടാതെ ബിഷപ്പിനും ഭാര്യയും മക്കളുമുണ്ടെന്നും, നിരവധി സ്ത്രീകളുമായി ബന്ധമുണ്ടെന്നും ആരോപണം ഉയര്‍ന്നിട്ടുണ്ട്.

അതേസമയം തനിക്കെതിരെ വൈദികര്‍ ഉള്‍പ്പടെ ഉന്നയിച്ച ആരോപണങ്ങള്‍ വ്യാജമാണെന്ന് മൈസൂരു ബിഷപ്പ് കെ.എ വില്യം പറയുന്നു. രൂപതയെ ക്രൈസ്തവരെയും അപകീര്‍ത്തിപ്പെടുത്താനുള്ള ചിലരുടെ ഗൂഢാലോചനയാണ് പരാതിക്ക് പിന്നിലെന്നും ബിഷപ്പ് ആരോപിച്ചു. ആരോപണങ്ങള്‍ തന്നെ ബാധിക്കില്ലെന്നും, മൈസൂരു രൂപതയെ സാമ്പത്തികമായി സ്വയംപര്യാപ്തതയിലെത്തിക്കാനും ഭരണത്തില്‍ സുതാര്യതയുണ്ടാക്കാനുമുള്ള നടപടികള്‍ തുടരുമെന്നും ബിഷപ്പ് വ്യക്തമാക്കി. അതേസമയം വത്തിക്കാനില്‍ നിന്നും ഉചിതമായ നടപടി വരമെന്നാണ് കരുതുന്നത്.