ലക്ഷങ്ങള്‍ മുടക്കി മുഖ്യമന്ത്രി പിണറായി വിജയന്‍ വീണ്ടും ഉപദേശകനെ നിയമിച്ചു. അയര്‍ലന്റുകാരനായ ഡോ.വില്യം ഹാളിനെ രണ്ട് വര്‍ഷത്തേക്ക് തിരുവനന്തപുരത്തെ ഇന്‍സ്റ്റിറ്റിയൂട്ട് ഓഫ് അഡ്വാന്‍സ്ഡ് വൈറോളജി ഉപദേശകനായി നിയമിച്ച് ഉത്തരവിറക്കി സര്‍ക്കാര്‍. വില്യം ഹാളിന്റെ ഓരോ സന്ദര്‍ശനത്തിനും ഖജനാവില്‍ നിന്ന് സര്‍ക്കാര്‍ ചെലവഴിക്കുന്നത് 10.21 ലക്ഷം രൂപയാണ്. യാത്രാ ചിലവിന് 2.87 ലക്ഷം രൂപയും താമസത്തിന് മൂന്ന് ലക്ഷം രൂപയും 79,462 രൂപ അലവന്‍സും 3.54 ലക്ഷം രൂപ ഓണറേറിയം അങ്ങനെ പോകുന്നു... ചെലവുകള്‍. സംസ്ഥാനം കടുത്ത സാമ്പത്തികപ്രതിസന്ധിനേരിടുമ്പോള്‍ മുണ്ട്മുറുക്കിയുടുക്കണം എന്ന് ജനങ്ങളോട് ആഹ്വാനം ചെയ്തിട്ടാണ് മുഖ്യമന്ത്രിയും ധനമന്ത്രിയും പുതിയ നിയമനം നടത്തിയത്.

അയര്‍ലന്റ് തലസ്ഥാനമായ ഡബ്ലിനില്‍ സ്‌കൂള്‍ ഓഫ് മെഡിക്കല്‍ സയന്‍സസിലെ പ്രൊഫസറും മൈക്രോ ബയോളജിസ്റ്റുമാണ് ഡോ.വില്യം ഹാള്‍. മുഖ്യമന്ത്രിക്ക് ഇപ്പോള്‍ തന്നെ മുന്‍ ഡി.ജി.പി രമണ്‍ശ്രീ വാസ്തവയും മാധ്യമപ്രവര്‍ത്തകന്‍ ജോണ്‍ബ്രിട്ടാസും അടക്കം ഉപദേശകരുണ്ട്.ഉപദേശക നിയമനത്തെ ചൊല്ലി നിരവധി വിവാദങ്ങള്‍ ഉണ്ടായിരുന്നു. 1957 മുതല്‍ മുഖ്യമന്ത്രിമാര്‍ക്ക് ഉപദേശകര്‍ ഇല്ലായിരുന്നു. ഐ.ടി. പോലുള്ള സങ്കീര്‍ണ വിഷയങ്ങള്‍ പരമപ്രധാനമായി ഉയര്‍ന്നുവന്നപ്പോള്‍ ഉപദേശകരെ നിയമിച്ചത്. പ്രമുഖ അഭിഭാഷകനായ എം.കെ.ദാമോദരന്‍ നിയമോദേഷ്ടാവാണ്. ഇവര്‍ പിണറായി വിജയന് പാര്‍ട്ട് ടൈം അടിസ്ഥാനത്തിലാണ് ഉപദേശം നല്‍കുക. നിയമ ഉപദേശകന്റെ നിയമനത്തിലും പ്രവര്‍ത്തനത്തിലും തുടക്കത്തില്‍ത്തന്നെ സംശയങ്ങളും ആശങ്കയും ഉയര്‍ന്നിരുന്നു.

നിയമപ്രശ്‌നങ്ങളില്‍ ചക്രശ്വാസം വലിച്ച മുഖ്യമന്ത്രിയായിരുന്നു ഉമ്മന്‍ചാണ്ടി. എന്നിട്ടും ഉപദേഷ്ടാവ് ഉണ്ടായില്ല. എന്തുകൊണ്ട് എന്ന് നിയമരംഗത്തുള്ളവര്‍ക്കെല്ലാം അറിയാം. നിയമനിര്‍മാതാക്കള്‍ അക്കാര്യം പണ്ടേ മുന്നില്‍കാണുകയും അതിനുള്ള പരിഹാരത്തിന് നിയമവ്യവസ്ഥകള്‍ ഉണ്ടാക്കുകയും ചെയ്തിട്ടുണ്ട്. അഡ്വക്കറ്റ് ജനറല്‍ ആണ് മുഖ്യമന്ത്രിയുടെ നിയമപരമായ നിയമോപദേഷ്ടാവ്. സംസ്ഥാന ഭരണത്തെ സംബന്ധിക്കുന്ന എല്ലാ നിയമപ്രശ്‌നങ്ങളും കൈകാര്യം ചെയ്യുന്നത് എ.ജി.യാണ്. ഉപദേഷ്ടാക്കളെ കൊണ്ട് സെക്രട്ടറിയേറ്റിലെ നോര്‍ത്ത് ബ്‌ളോക്കിലെ ഓഫീസ് നിറഞ്ഞിരിക്കുകയാണ്. ഹൈക്കോടതിയില്‍ കേസുകള്‍ പ്രത്യേകം കൈകാര്യം ചെയ്യാന്‍ രണ്ട് മാസം മുമ്പ് ഒരാളെ ഒരു ലക്ഷത്തോളം രൂപയ്ക്ക് നിയമിച്ചത് വിവാദമായിരുന്നു.

മന്ത്രിമാരെ കൂടാതെ ക്യാബിനെറ്റ് റാങ്കോടെ അഞ്ച് പേരെ നിയമിച്ചത് ഖജനാവിന് വലിയ ചെലവാണ് വരുത്തിവച്ചത്. ഡല്‍ഹിയില്‍ ഡോ. എ സമ്പത്തിനെ പ്രത്യേക ഓഫീസറായി ക്യാബിനെറ്റ് റാങ്കോടെയാണ് നിയമിച്ചിരിക്കുന്നത്. ഭരണപരിഷ്‌ക്കാര കമ്മീഷന്‍ ചെയര്‍മാന്‍ വി.എസ് അച്യുതാനന്ദന്‍, മുന്നോക്കക്ഷേമ വികസന കോര്‍പ്പറേഷന്‍ ചെയര്‍മാന്‍ ആര്‍ ബാലകൃഷ്ണപിള്ള, അഡ്വക്കേറ്റ് ജനറല്‍ സുധാകരപ്രസാദ്, ചീവ് വിപ്പ് കെ. രാജന്‍ എന്നിവര്‍ക്കും ക്യാബിനെറ്റ് പദവിയാണുളളത്. അതിലൂടെ സര്‍ക്കാരിന് ലക്ഷങ്ങളാണ് മാസന്തോറും ചെലവാകുന്നത്.