ഏറെ നാളത്തെ ഇടവേളയ്ക്ക് ശേഷം കണ്ണൂരില് വീണ്ടും രാഷ്ട്രീയ സംഘട്ടനം, ധര്മടത്ത് ഇന്നലെ സി.പി.എം- ആര്.എസ്.എസ് സംഘര്ഷം നടന്നു
ഏറെ നാളത്തെ ഇടവേളയ്ക്ക് ശേഷം കണ്ണൂരില് വീണ്ടും രാഷ്ട്രീയ സംഘട്ടനം. ധര്മടത്ത് ഇന്നലെ സി.പി.എം- ആര്.എസ്.എസ് സംഘര്ഷം നടന്നു. സംഭവത്തില് നാല് സി.പി.എം പ്രവര്ത്തകര്ക്കെതിരെയും ബി.ജെ.പി- ആര്.എസ്.എസ് പ്രവര്ത്തകര്ക്കെതിരെയും പൊലീസ് കേസ് എടുത്തു. സംഘട്ടനത്തിനിടെ ആര്എസ്എസ് പ്രവര്ത്തകന്റെ പിറകെ സി.പി.എം പ്രവര്ത്തകര് വാളുമായി ഓടിയത് ഏറെ നേരെ നാട്ടുകാരെ ആശങ്കയിലാഴ്ത്തി. മേലൂരിലായിരുന്നു സംഭവം നടന്നത്. സിപിഎം പ്രവര്ത്തകരായ മനീഷ്, മഹേഷ്, അഭിജിത്ത്, സൗരവ് എന്നിവര്ക്കെതിരെയാണു കേസ്. സംഘര്ഷത്തിനിടെ വടക്ക് ബസ് സ്റ്റോപ്പിലെ ആര്എസ്എസ് സ്തൂപവും ബിജെപി കൊടിമരവും ആല്മരവും നശിപ്പിച്ചു. മേലൂര് ചെഗുവേര ക്ലബ്ബിനു മുന്പില് റോഡരികിലായി സ്ഥാപിച്ച സിപിഎം, ഡിവൈഎഫ്ഐ കൊടിമരങ്ങള് ബി.ജെ.പി - ആര്.എസ്.എസ് പ്രവര്ത്തകര് നശിപ്പിച്ചു.
ചെഗുവേര ക്ലബ്ബിനു മുന്പിലെ സിപിഎം കൊടിമരം നശിപ്പിച്ചതോടെയാണ് പ്രശ്നങ്ങള് തുടങ്ങിയത്. സംഭവത്തില് പ്രകോപിതരായ സി.പി.എം- ഡിവൈഎഫ്ഐ പ്രവര്ത്തകര് രണ്ട് ദിവസം തിരിച്ച് പ്രകോപനം സൃഷ്ടിച്ചില്ല. തിരിച്ചടിയുണ്ടാകുമെന്ന് ഉറപ്പുണ്ടായിരുന്നിട്ടും പൊലീസ് മുന്കരുതല് നടപടികള് സ്വീകരിച്ചില്ല. വെള്ളിയാഴ്ച ഉച്ചയ്ക്ക് ശേഷം രണ്ട് ബൈക്കുകളിലായി എത്തിയ നാല് പേര് ആര്എസ്എസ് - ബിജെപി സ്തൂപവും ആല്മരവും നശിപ്പിച്ചെന്നാണ് പരാതി. സംഭവം നടക്കുമ്പോള് ബസ് സ്റ്റോപ്പിലുണ്ടായിരുന്ന ആര്എസ്എസ് പ്രവര്ത്തകന് പ്രവീഷിന്റെ പിറകെ അക്രമികള് വാളുമായി ഓടിയെങ്കിലും പ്രവീഷ് ഓടി രക്ഷപെട്ടു. അപ്പോഴേക്കും നാട്ടുകാരും ഓടിക്കൂടിയിരുന്നു. പൊലീസ് സ്ഥലത്തെത്തിയപ്പോഴേക്കും പ്രതികള് രക്ഷപെട്ടിരുന്നു.
മേലൂരിലും പരിസരപ്രദേശങ്ങളിലും പൊലീസ് സുരക്ഷ കര്ശനമാക്കി. എസ്ഐമാരായ മഹേഷ് കണ്ടമ്പേത്ത്, വി.കെ. പ്രകാശന് എന്നിവരുടെ നേതൃത്വത്തില് ഇന്നലെ വൈകിട്ട് സര്വകക്ഷി യോഗം വിളിച്ചു ചേര്ത്തു. സമാധാന അന്തരീക്ഷം തകര്ക്കരുതെന്നും ഇരുകൂട്ടരും സഹകരിക്കണമെന്നും പൊലീസ് ആഹ്വാനം ചെയ്തു. ഇരുപാര്ട്ടികളിലെയും ചെറുപ്പക്കാരെ ഉള്പ്പെടുത്തി താമസിക്കാതെ മേലൂരില് പൊലീസിന്റെ സാന്നിധ്യത്തില് യോഗം ചേരുമെന്ന് ഇരുകൂട്ടരോടും പറഞ്ഞിട്ടുണ്ട്. പ്രവര്ത്തകര് സംയമനം പാലിക്കണമെന്ന് രണ്ട് പാര്ട്ടികളിലെയും നേതാക്കള് ആവശ്യപ്പെട്ടിട്ടുണ്ട്. ജില്ലയില് ഇത്തരം ഒറ്റപ്പെട്ട സംഭവങ്ങള് ഇടയ്ക്കിടെ നടക്കാറുണ്ട്. സംസ്ഥാനത്ത് ഏറ്റവും കൂടുതല് സി.പി.എം- ആര്.എസ്.എസ് അക്രമങ്ങള് നടക്കുന്ന സ്ഥലമാണ് കണ്ണൂര്.
എല്.ഡി.എഫ് സര്ക്കാര് അധികാരത്തില് വന്ന ശേഷം കണ്ണൂരില് രാഷ്ട്രീയ സംഘട്ടനങ്ങള് കൂടിയിരുന്നു. മട്ടന്നൂരില് യൂത്ത് കോണ്ഗ്രസ് നേതാവ് ഷുഹൈബിനെ വധിച്ചിരുന്നു. ലോക്സഭാ തെരഞ്ഞെടുപ്പിനോട് അനുബന്ധിച്ച് പാര്ട്ടി വിട്ട് ബദലായി മത്സരിച്ച വിമതന് സി.ഒ.ടി നസീറിനെ സി.പി.എമ്മുകാര് തന്നെ വധിക്കാന് ശ്രമിച്ചിരുന്നു. അതിന് ശേഷം കണ്ണൂര് രാഷ്ട്രീയം പൊതുവേ സമാധാനപരമായിരുന്നു. എന്നാല് കഴിഞ്ഞ ദിവസം ധര്മടത്തുണ്ടായ സംഭവം നാട്ടുകാരെ ഭീതിയിലാഴ്ത്തുന്നുണ്ട്.
https://www.facebook.com/Malayalivartha
