സഹോദരിയുടെ സ്വര്ണാഭരണങ്ങള് മോഷ്ടിച്ചെന്ന് ആരോപിച്ച് നിലമ്പൂര് പോത്തുകല്ല് ചളിക്കല് കണ്ടമംഗലത്ത് ബ്രാഞ്ച് കമ്മിറ്റി അംഗത്തെ പൊലീസ് ക്രൂരമായി മര്ദ്ദിച്ചതായി പരാതി
മുഖ്യമന്ത്രി പിണറായി വിജയന് പൊലീസിനെ കയറൂരി വിടുകയാണെന്നും പാര്ട്ടി പ്രവര്ത്തകര് പോലും പൊലീസിന്റെ ക്രൂരതയ്ക്ക് ഇരയാകുന്നെന്നുമുള്ള ആരോപണം ശക്തമാകുന്നതിനിടെ മലപ്പുറത്ത് സഹോദരിയുടെ സ്വര്ണാഭരണങ്ങള് മോഷ്ടിച്ചെന്ന് ആരോപിച്ച് നിലമ്പൂര് പോത്തുകല്ല് ചളിക്കല് കണ്ടമംഗലത്ത് വീട്ടില് കൃഷ്ണന്കുട്ടിയെയാണ് (42) മര്ദ്ദിച്ചത്. ഇയാള് ചികിത്സയിലാണ്. ക്ഷീരകര്ഷകനായ കൃഷ്ണന്കുട്ടിയുടെ ശരീരത്തിലും മുഖത്തും മര്ദ്ദനത്തിന്റെ പാടുകള് കാണാം. മുണ്ടേരി ബ്രാഞ്ച് കമ്മിറ്റി അംഗമാണ്. പൊലീസ് നടപടിക്കെതിരെ പ്രദേശത്തെ പാര്ട്ടി നേതാക്കളും പ്രവര്ത്തകരും കടുത്ത അമര്ഷത്തിലാണ്.
അമ്മ ലീലയ്ക്കും സഹോദരി വിജിയ്ക്കുമൊപ്പമാണ് കൃഷ്ണന്കുട്ടിയും താമസിക്കുന്നത്. കഴിഞ്ഞ ദിവസം വിജി അലമാരയില് സൂക്ഷിച്ച മൂന്ന് പവന്റെ സ്വര്ണാഭരണങ്ങള് കാണാതായി. തുടര്ന്ന് പോത്തുകല്ല് പൊലീസ് സ്റ്റേഷനില് പരാതി നല്കി. രണ്ട് ദിവസം ഉച്ചയ്ക്ക് എസ്.ഐയും മറ്റ് പൊലീസുകാരും ഡോഗ് സ്ക്വാഡും വിരലടയാള വിദഗ്ധരും വിജിയുടെ വീട്ടിലെത്തി പരിശോധന നടത്തിയിരുന്നു. തുടര്ന്ന് സംശയത്തിന്റെ പേരില് കൃഷ്ണന്കുട്ടിയെ കസ്റ്റഡിയിലെടുത്ത് കൊണ്ടുപോവുകയായിരുന്നു. ജീപ്പില് വെച്ച് തന്നെ പൊലീസ് മര്ദ്ദനം തുടങ്ങിയെന്ന് കൃഷ്ണന്കുട്ടി പറയുന്നു. പരാതിയില് ഒപ്പിടാനുണ്ടെന്ന് പറഞ്ഞാണ് തന്നെ കൂട്ടിക്കൊണ്ട് പോയതെന്നും ഇയാള് പറയുന്നു.
സ്റ്റേഷനിലെത്തിയ ശേഷം ഒന്നാം നിലയിലുള്ള പൊലീസുകാരുടെ വിശ്രമ മുറിയിലിട്ട് എസ്ഐയും മറ്റ് രണ്ട് സിവില് പൊലീസുകാരും മര്ദിച്ചെന്നും സ്വര്ണം മോഷ്ടിച്ചത് താനാണെന്ന് സമ്മതിക്കണമെന്നും സമ്മതിച്ചാല് വെറുതേ വിടാമെന്നും വാഗ്ദാനം നല്കി. കൃഷ്ണന്കുട്ടി വഴങ്ങാതിരുന്നപ്പോള് വീണ്ടും മര്ദ്ദിച്ചതായും കൃഷ്ണന്കുട്ടി പറഞ്ഞു. സംഭവമറിഞ്ഞ് അമ്മ ലീലയും സഹോദരിമാരും പൊലീസ് സ്റ്റേഷനിലെത്തി. അവരുടെ മുന്നിലിട്ടും ക്രൂരമായി മര്ദ്ദിച്ചെന്നും ബ്രാഞ്ച് സെക്രട്ടറി കബീര് പറഞ്ഞു. സ്റ്റേഷനിലെ ചില പൊലീസുകാര് പരാതി പറയാന് എത്തുന്നവരോട് മോശമായാണ് പെരുമാറുന്നതെന്നും ആക്ഷേപമുണ്ട്.
പൊലീസിന്റെ കിരാത നടപടിക്കെതിരെ മുഖ്യമന്ത്രി, ഡിജിപി, കലക്ടര്, ജില്ലാ പൊലീസ് മേധാവി എന്നിവര്ക്കു പരാതി നല്കുമെന്ന് കൃഷ്ണന്കുട്ടി പറഞ്ഞു. കൃഷ്ണന്കുട്ടി മൊഴി മാറ്റിപ്പറഞ്ഞതാണ് സംശയത്തിനിടയാക്കിയതെന്ന് പൊലീസ് പറയുന്നു. മര്ദ്ദിച്ചിട്ടില്ലെന്ന് എസ്.ഐയും വ്യക്തമാക്കി. പാര്ട്ടി ഭരിക്കുമ്പോള് പ്രവര്ത്തകര്ക്കും നേതാക്കള്ക്കും പോലും പൊലീസ് സ്റ്റേഷനില് നിര്ഭയമായി പോകാനും പരാതി പറയാനും പറ്റാത്ത സാഹചര്യം അംഗീകരിക്കാനാവില്ലെന്നും നിരുത്തരവാദപരമായി പെരുമാറുന്ന പൊലീസുകാര്ക്കെതിരെ കര്ശന നടപടി സ്വീകരിക്കണമെന്നും പ്രദേശത്തെ സി.പി.എം നേതാക്കളും പ്രവര്ത്തകരും ആവശ്യപ്പെട്ടു.
https://www.facebook.com/Malayalivartha
