ഇനി ശരണം വിളിയുടെ നാളുകള്... മണ്ഡല മകരവിളക്ക് ഉത്സവത്തിനായി ശബരിമല നട തുറന്നു, മേല്ശാന്തി വിഎന് വാസുദേവന് നമ്പൂതിരിയാണ് നട തുറന്നത്, വിവിധ സ്ഥലങ്ങളില് നിന്നും കെഎസ്ആര്ടിസി ബസ്സ് സര്വ്വീസുകള് തുടങ്ങി, പമ്പ, നിലക്കല്, സന്നിധാനം എന്നിവിടങ്ങളിലെ ആശുപത്രികളുടെ പ്രവര്ത്തനവും ആരംഭിച്ചു
ഇനി ശരണം വിളിയുടെ നാളുകള്. മണ്ഡല മകരവിളക്ക് ഉത്സവത്തിനായി ശബരിമല നട തുറന്നു. മണ്ഡല മകരവിളക്ക് ഉത്സവത്തിനായിട്ടാണ് ശബരിമല നട തുറന്നത്. പതിനെട്ട് മലകളും മുഴങ്ങിയ ശരണമന്ത്രങ്ങള്ക്കിടയില് ശബരിമല ശ്രീധര്മശാസ്താ ക്ഷേത്രനടയിലേക്ക് ദേശങ്ങള് താണ്ടിയെത്തിയ ഭക്തര് ഭഗവാന്റെ ചിന്മുദ്രാങ്കിത യോഗസമാധി രൂപം കണ്ടുതൊഴുതു. ഇന്നലെ വൈകീട്ട് അഞ്ചിന് തന്ത്രി കണ്ഠര് മഹേശ്വര് മോഹനരും മേല്ശാന്തി വി.എന്.വാസുദേവന് നമ്പൂതിരിയും ശ്രീകോവില് വലംവെച്ചെത്തി തിരുനടയിലെ പടികളില് തീര്ഥംതളിച്ച് മണിയടിച്ച് നടതുറന്നു. നെയ്വിളക്ക് തെളിച്ച്, യോഗനിദ്രയിലുള്ള ഭഗവാനെ ഭക്തജനസാന്നിധ്യം അറിയിച്ചു. തുടര്ന്ന് മേല്ശാന്തി പതിനെട്ടാം പടിയിറങ്ങി ആഴിതെളിച്ചു. അതിനുശേഷം ഭക്തരെ പതിനെട്ടാംപടി ചവിട്ടാന് അനുവദിച്ചു. ശബരിമല മേല്ശാന്തിയുടെ സ്ഥാനാരോഹണ ചടങ്ങ് വൈകീട്ട് നടന്നു. ആശൂലം കാരണം മാളികപ്പുറം മേല്ശാന്തിയുടെ അവരോധം നടന്നില്ല.
ശബരിമലയിലെ പുതിയ മേല്ശാന്തി മലപ്പുറം തിരുനാവായ മണിയങ്കാട് അരീക്കര ഇല്ലത്ത് എ.കെ.സുധീര് നമ്പൂതിരിയെ തന്ത്രിയുടെ കാര്മികത്വത്തില് കലശം പൂജിച്ച് അഭിഷേകം ചെയ്തു. തുടര്ന്ന് ശ്രീകോവിലിനുള്ളില് കൊണ്ടുപോയി അയ്യപ്പന്റെ മൂലമന്ത്രം ചൊല്ലിക്കൊടുത്തു. രാത്രിയില് ഹരിവരാസനംപാടി നട അടച്ചശേഷം മേല്ശാന്തി വി.എന്.വാസുദേവന് നമ്പൂതിരി ശ്രീകോവിലിന്റെ താക്കോല് പുതിയ മേല്ശാന്തിക്ക് കൈമാറി. വൃശ്ചികപ്പുലരിയായ ഇന്ന് ശാസ്താവിന്റെ നട തുറന്നത് പുതിയ മേല്ശാന്തിയാണ്.
നിലവിലുള്ള ശബരിമല, മാളികപ്പുറം മേല്ശാന്തിമാര് ഇന്നലെ രാത്രി പടിയിറങ്ങി.ദേവസ്വം ബോര്ഡ് പ്രസിഡന്റ് എന്.വാസു, ബോര്ഡ് അംഗങ്ങളായ കെ.എസ്.രവി, എന്.വിജയകുമാര്, ദേവസ്വം കമ്മീഷണര് എം.ഹര്ഷന്, സ്പെഷ്യല് കമ്മീഷണര് മനോജ് തുടങ്ങിയവര് സന്നിഹിതരായിരുന്നു. നിയുക്ത മാളികപ്പുറം മേല്ശാന്തി ആലുവ പുളിയനം പാറക്കടവ് മാടവന ഇല്ലത്ത് എം.എസ്.പരമേശ്വരന് നമ്പൂതിരിയുടെ അടുത്ത ബന്ധുവിന്റെ മരണത്തെതുടര്ന്നാണ് അദ്ദേഹത്തിന് ചുമതലയേല്ക്കാന് കഴിയാഞ്ഞത്. വ്യാഴാഴ്ച ആശൂലം തീരും. ഒരുദിവസംകൂടി കഴിഞ്ഞ് ശനിയാഴ്ച രാവിലെ അദ്ദേഹത്തെ മേല്ശാന്തിയായി അവരോധിക്കും. അദ്ദേഹത്തിന്റെ അടുത്ത ബന്ധു പാലക്കാട് സ്വദേശി ദാമോദരന് നമ്പൂതിരിയാണ് മരിച്ചത്.
പരമ്പരാഗത കാനനപാതകള് വഴി തീര്ത്ഥാടകരെ കയറ്റിവിടുന്നതിന് കര്ശന നിയന്ത്രണങ്ങളാണ് ഇത്തവണ ഏര്പ്പെടുത്തിയിരിക്കുന്നത്. വിവിധ സ്ഥലങ്ങളില് നിന്നും കെഎസ്ആര്ടിസി ബസ്സ് സര്വ്വീസുകള് തുടങ്ങി. പമ്പ, നിലക്കല്, സന്നിധാനം എന്നിവിടങ്ങളിലെ ആശുപത്രികളുടെ പ്രവര്ത്തനവും ആരംഭിച്ചു.
https://www.facebook.com/Malayalivartha
