കേരളത്തെ വളരെ ചിന്തിപ്പിക്കുകയും വേദനിപ്പിക്കുകയും ചെയ്ത സംഭവമാണ് ജിഷ വധക്കേസ്. ഇതരസംസ്ഥാന തൊഴിലാളിയായ അമിറുള്‍ ഇസ്ലാമിന്റെ ക്രൂരമായ ലൈംഗിക പീഡനത്തിലാണ് ജിഷ മരണമടഞ്ഞതെന്ന വാര്‍ത്ത മലയാളികളെ അക്ഷരാര്‍ത്ഥത്തില്‍ ഞെട്ടിപ്പിച്ചിരുന്നു. പിന്നീട് കേരളത്തിന്റെ വിവിധ ഭാഗങ്ങളില്‍ നിന്നും ഇതുപോലെ ഇതര സംസ്ഥാന തൊഴിലാളികളുടെ പേടിപ്പിക്കുന്ന ആക്രമണ പരമ്പരകള്‍ കണ്ടു. ഇതോടെ എല്ലാവരും ഒരുപോലെ ബംഗാളികളെ വെറുത്തു. മലയാളികള്‍ക്കങ്ങനെയാണ് കേരളത്തിന് പുറത്താരെ കണ്ടാലും ബംഗാളികളാണ്. എന്നാല്‍ നന്മയുള്ള ബംഗാളികളും കുറവല്ല. കൊച്ചിയില്‍ നിന്നാണ് ആരുടേയും കരളലിയിക്കുന്ന കഥ വന്നത്.

ഒരിക്കലും തിരിച്ചു കിട്ടില്ലെന്ന് ഉറപ്പിച്ച പണം തിരിച്ചു കിട്ടിയ സന്തോഷത്തിലാണ് കലൂര്‍ സ്വദേശി നയന പ്രകാശ്. അമ്മയുടെ ഡയാലിസിസിനു കരുതി വച്ചിരുന്ന പണമാണ് ഇന്നലെ ബൈക്ക് യാത്രയ്ക്കിടെ നഷ്ടമായത്. അതും 32,000 രൂപ. വളരെ സങ്കടത്തോടെയാണ് നയനപ്രകാശ് സന്തോഷം പങ്കുവയ്ക്കുന്നത്. പണം നഷ്ടമായപ്പോള്‍ ആദ്യം എന്തു ചെയ്യണമെന്ന് അറിയാത്ത അവസ്ഥയിലായി. കുറെ നേരത്തേയ്ക്ക് ഫുള്‍ ബ്ലാങ്ക് ആയി. പിന്നെ അമ്മയെ വിളിച്ചു പറഞ്ഞു. ആശ്വാസ വാക്കുകളും പൊലീസില്‍ പറയാനുള്ള നിര്‍ദേശവുമാണ് അമ്മ നല്‍കിയത്. സ്‌റ്റേഷനിലേയ്ക്കു വിളിച്ചപ്പോള്‍, പൊലീസ് ഇങ്ങോട്ടു വിളിച്ചു കൊണ്ടിരിക്കുകയായിരുന്നു. ഇതിനകം പണം കിട്ടിയ ആള്‍ സ്‌റ്റേഷനില്‍ എത്തിച്ചിരുന്നു.

വഴിയില്‍നിന്നു കളഞ്ഞുകിട്ടിയ 32,000 രൂപ മണിക്കൂറുകള്‍ക്കകം ഒറീസ സ്വദേശി കന്‍ഹു ചരണ്‍ ആണ് തിരിച്ചേല്‍പ്പിച്ചു മാതൃകയായത്. വൈകിട്ട് കോട്ടയത്തു പോയി മടങ്ങും വഴി കുണ്ടന്നൂര്‍ പാലത്തില്‍ വച്ചാണു നയനപ്രകാശിനു പഴ്‌സ് നഷ്ടമായത്. കടവന്ത്ര എത്തിയപ്പോഴാണ് അറിയുന്നത് പഴ്‌സ് നഷ്ടമായെന്ന്. എടിഎം കാര്‍ഡ്, ക്രെഡിറ്റ് കാര്‍ഡ് തുടങ്ങിയവ പഴ്‌സിലാണുള്ളത്.

എന്തു ചെയ്യണമെന്ന് അറിയാതെ കുറെ നേരം അവിടെത്തന്നെ നിന്നു. പിന്നെയാണ് അമ്മയെ വിളിച്ചു പറയുന്നത്. അമ്മ എസ്‌ഐ ആയി റിട്ടയര്‍ ചെയ്ത ആളാണ്. സ്‌റ്റേഷനില്‍ അറിയിക്കാനായിരുന്നു ഉപദേശം. ശേഷം സുഹൃത്തിനൊപ്പം കടവന്ത്രയില്‍നിന്നു നേരത്തെ സഞ്ചരിച്ച വഴിയിലൂടെ കുറെ അന്വേഷിച്ചു. ഇതിനിടെയാണ് പൊലീസ് സ്‌റ്റേഷനില്‍ നിന്ന് വിളി വന്നത്.

ഒന്‍പതു വര്‍ഷമായി കന്‍ഹു ചരണ്‍ കൊച്ചിയിലാണ്. വീടുകളില്‍ ചെടികള്‍ വെട്ടിയൊരുക്കുക, കാട് വെട്ടിത്തെളിക്കുക തുടങ്ങിയ ജോലികള്‍ ചെയ്യും. മലയാളം പഠിച്ചെടുത്തു. ഒരു പഴ്‌സ് കളഞ്ഞ് കിട്ടിയെന്ന് കന്‍ഹു വീട്ടുടമയോടാണ് വിളിച്ച് പറഞ്ഞത്. വൈകിട്ട് വീട്ടില്‍ നിന്ന് പണി കഴിഞ്ഞു പോയി കുറച്ചു കഴിഞ്ഞപ്പോഴാണ് കന്‍ഹുവിന്റെ വിളി വന്നത്. ഒരു പഴ്‌സും കുറെ പണവും കളഞ്ഞു കിട്ടിയിട്ടുണ്ടെന്നാണ് പറഞ്ഞത്. എത്രയുണ്ടെന്നു ചോദിച്ചപ്പോള്‍ കുറെ ഉണ്ടെന്നായിരുന്നു മറുപടി. എങ്കില്‍ അടുത്തുള്ള സ്‌റ്റേഷനില്‍ ഏല്‍പിക്കാന്‍ പറഞ്ഞു. വീട്ടുടമ പറഞ്ഞതുപോലെ കന്‍ഹു ചെയ്തു.

പഴ്‌സുമായി കടവന്ത്ര സ്‌റ്റേഷനിലെത്തി ഇന്‍സ്‌പെക്ടര്‍ അനീഷ് ജോയിയെ ഏല്‍പിച്ചു. ഉടമയെ ബന്ധപ്പെടുന്നതിനുള്ള ഫോണ്‍നമ്പരുകള്‍ ഒന്നും ഉണ്ടായിരുന്നില്ല. പഴ്‌സില്‍നിന്നു കിട്ടിയ ഒരു ആശുപത്രി കാര്‍ഡിലെ വിവരങ്ങള്‍ വച്ച് ബന്ധപ്പെട്ടാണു പൊലീസ് ഫോണ്‍ നമ്പര്‍ സംഘടിപ്പിക്കുന്നതും നയനപ്രകാശിനെ ബന്ധപ്പെടുന്നതും.

ഒരു മാസം ജോലിചെയ്താല്‍ കന്‍ഹുവിന് ലഭിക്കുന്നത് 10,000 രൂപയാണ്. ഇതില്‍ നല്ലൊരു ഭാഗം ചെലവിനു വേണം. ബാക്കിയുള്ള തുക നാട്ടിലേയ്ക്ക് അയച്ചു കൊടുക്കും. മൂന്നു മാസം ജോലി ചെയ്താല്‍ കിട്ടാത്തത്ര തുക കയ്യില്‍ വന്നപ്പോള്‍ സ്വന്തമാക്കാന്‍ തോന്നിയില്ലേ എന്ന് ചിര്‍ ചോദിച്ചപ്പോള്‍ മറ്റൊരു ഉത്തരമാണ് കന്‍ഹു നല്‍കിയത്. അത് വേണ്ട സേട്ടാ, എനിക്ക് ജോലി ചെയ്ത പൈസ മതി. അത് ദൈവം തരുന്നുണ്ട്...