അവസാനം കള്ളനും സങ്കടം വന്നു... എല്ലാം നഷ്ടമായി ജീവിതം അസ്തമിച്ചെന്നു കരുതിയ വിഷ്ണു പ്രസാദിന് തുണയായി വീണ്ടും വടക്കുംനാഥന്; മോഷ്ടിക്കപ്പെട്ട രേഖകളില് ചിലതുകൂടി തേക്കിന്കാട് മൈതാനത്ത് ഉപേക്ഷിക്കപ്പെട്ട നിലയില് കണ്ടെത്തി
മലയാളികള് അടുത്തിടെ ഏറെ സങ്കടപ്പെട്ട ഒരു സംഭവമാണ് വിഷ്ണുപ്രസാദിന്റെ ബാഗ് നഷ്ടപ്പെട്ടത്. അത് കേവലമൊരു ബാഗ് മാത്രമായിരുന്നില്ല. വിഷ്ണുപ്രസാദിന്റെ ജീവനും ജീവിതവുമായിരുന്നു. ഭാവി പോലും നിര്ണയിക്കുന്ന ആ ബാഗ് നഷ്ടപ്പെട്ടതോടെ വിഷ്ണു പ്രസാദ് വിതുമ്പിപ്പോയി. സെലിബ്രിറ്റികളുള്പ്പെടെ പലരും വിഷ്ണുപ്രസാദിന് നഷ്ടപ്പെട്ട ബാഗ് തിരിച്ച് കിട്ടാന് പ്രാര്ത്ഥിച്ചിരുന്നു. അവസാനം കഴിഞ്ഞ ദിവസം ചില രേഖകള് ഉള്ള ബാഗ് തൃശൂര് വടക്കുംനാഥ ക്ഷേത്രത്തിന് സമീപം കണ്ടെത്തിരുന്നു. വിഷ്ണുപ്രസാദിന്റെ മോഷ്ടിക്കപ്പെട്ട രേഖകളില് ചിലതു കൂടി ഇന്നലെ തിരികെക്കിട്ടി. തേക്കിന്കാട് മൈതാനത്ത് ഉപേക്ഷിക്കപ്പെട്ട നിലയില് കിട്ടിയ രേഖകള് ഐസ്ക്രീം കച്ചവടക്കാരന് പൊലീസ് കണ്ട്രോള് റൂമിന്റെ വാഹനത്തില് ഏല്പിക്കുകയായിരുന്നു.ആധാര് കാര്ഡ്, ട്രെയ്നിങ് സര്ട്ടിഫിക്കറ്റുകള് എന്നിവയായിരുന്നു ഇത്.
തിരിച്ചറിയല് കാര്ഡും തൊഴില് പരിചയ സാക്ഷ്യപത്രങ്ങളും മാത്രമാണ് ഇനി കിട്ടാനുള്ളത്. പാസ്പോര്ട്ട് അടക്കമുള്ള പ്രധാന രേഖകള് കഴിഞ്ഞ ദിവസം തിരികെ കിട്ടിയതിനു പിന്നാലെയാണ് ഇന്നലെ മറ്റു രേഖകള് കൂടി കിട്ടിയത്. ഗൂഡല്ലൂരില് താമസമാക്കിയ മലയാളിയായ വിഷ്ണുപ്രസാദ് ജര്മന് കമ്പനിയില് ജോലി ശരിയാക്കി നിയമനം നേടുന്നതു വരെ വീട്ടുചെലവിനുള്ള പണം കണ്ടെത്തുന്നതിനു ജോലി തേടി തൃശൂരില് എത്തിയതായിരുന്നു.
ഞായറാഴ്ച തൃശൂര് റെയില്വെ സ്റ്റേഷനിലെ വിശ്രമ മുറിയില് വച്ചാണ് വിഷ്ണുപ്രസാദിന്റെ ബാഗ് മോഷണം പോയത്. ഏഴു വര്ഷത്തെ സാധാരണ ജോലിക്കു ശേഷം ജര്മന് കപ്പലിലെ നല്ല ശമ്പളമുള്ള ജോലി ലഭിച്ചതിന്റെ ആഹ്ലാദത്തില് ഒറിജിനല് സര്ട്ടിഫിക്കറ്റ് കാണിക്കാനായി കമ്പനിയിലേക്കു പോകുന്നതിനിടെയാണ് സംഭവം. തൃശൂരില് നിന്നു കൊച്ചിയിലേക്കു പോകുന്നതിനായി റെയില്വേ സ്റ്റേഷനില് ഇരിക്കുമ്പോഴാണ് കള്ളന് ബാഗു തട്ടിയെടുത്തത്.
വിഷ്ണുവിന് വേണ്ടി അഭ്യര്ഥിച്ചുകൊണ്ട് ചലച്ചിത്രതാരങ്ങള് ഉള്പ്പെടെയുള്ളവര് രംഗത്തെത്തിയിരുന്നു. വിദ്യാഭ്യാസ സര്ട്ടിഫിക്കറ്റുകള് അടങ്ങിയ ബാഗ് നഷ്ടപ്പെട്ട ഈ ചെറുപ്പക്കാരന് നാല് ദിവസങ്ങളായി തൃശൂര് നഗരത്തില് അലയുകയാണെന്നും ഈ വാര്ത്ത പരമാവധി ആളുകളിലേയ്ക്ക് എത്തിക്കാന് കഴിഞ്ഞാല് ഒരുപക്ഷേ അദ്ദേത്തെ നമുക്ക് സഹായിക്കാന് കഴിഞ്ഞേക്കുമെന്നാണ് ചലച്ചിത്രതാരം സണ്ണി വെയിന് ബാഗ് നഷ്ടപ്പെട്ട വാര്ത്ത പങ്കുവച്ചു കൊണ്ടു പറഞ്ഞത്.
അന്നു മുതല് വിഷ്ണുപ്രസാദ് ബാഗിനു വേണ്ടി നടത്തുന്ന അന്വേഷണം മാധ്യമങ്ങള് വാര്ത്തയാക്കുകയും ഈ വാര്ത്ത സമൂഹമാധ്യമങ്ങള് ഏറ്റെടുക്കുകയും ചെയ്തു. ഉപേക്ഷിക്കപ്പെട്ട നിലയില് കണ്ടെത്തിയ സര്ട്ടിഫിക്കറ്റുകള് വിഷ്ണുപ്രസാദിനു തിരികെയേല്പ്പിച്ച ഷാഹിദിനും ഇമ്രാനും ഇന്നലെ റെയില്വേ പൊലീസ് ഉപഹാരം നല്കി. പട്ടാമ്പിയിലാണു വിഷ്ണുപ്രസാദിന്റെ അച്ഛന്റെ തറവാട്. കൂടുതല് സര്ട്ടിഫിക്കറ്റുകള് ലഭിച്ച സന്തോഷത്തിലാണ് വിഷ്ണു പ്രസാദ്.
https://www.facebook.com/Malayalivartha
