നമ്മുടെ അധ്യാപകർക്ക് എന്താണ് സംഭവിച്ചത്? പാമ്പു കടിയേറ്റ വിദ്യാർത്ഥിനിക്ക് കൃത്യമായ ചികിത്സനൽകാതെ സ്റ്റാഫ് മുറിയിൽ ഒളിച്ചിരുന്ന അധ്യാപകർ ഒരു വശത്ത്. ഇതാ മലപ്പുറത്ത് നിന്ന് പീഡനത്തിന് ഇരയായ അധ്യാപിക പരാതിയുമായി പോലീസിന് മുന്നിലെത്തിയിരിക്കുന്നു. അധ്യാപകവ്യത്തിയെ പരിപാവനമായി കരുതുന്ന ഒരു തലമുറക്ക് മുന്നിലാണ് അധ്യാപകർ തന്നെ ഇത്തരം ആഭാസങ്ങൾ കാണിക്കുന്നത്.

പീഡന ദൃശ്യങ്ങൾ സാമൂഹിക മാധ്യമങ്ങളിൽ പ്രചരിപ്പിച്ചെന്ന അക്ഷേപവുമായാണ് അധ്യാപിക പോലീസിനെ സമീപിച്ചത് കുറ്റിപ്പുറത്തെ കോളേജിൽ അധ്യാപികയാണ് പരാതിക്കാരി. ഇവർക്ക് പൊന്നാനിയിലെ കോളേജിൽ പഠിപ്പിക്കുന്ന അധ്യാപകനോട് പ്രണയം തോന്നി. പ്രണയം എന്ന് വെറുതെ പറഞ്ഞാൽ പോരാ. നല്ല ഒന്നാന്തരം പ്രണയം. പ്രണയത്തിന് ചില അതിർവരമ്പുകൾ ചില കാമുകീകാമുകൻമാർ നിശ്ചയിക്കാറുണ്ട്. അതിൽ പ്രധാനം വിവാഹത്തിന് മുമ്പ് ശരീരത്തിൽ തൊടരുത് എന്നതാണ്. എന്നാൽ മലപ്പുറത്തെ അധ്യാപിക കാമുകനെ ശരീരത്തിൽ തൊടാൻ അനുവദിച്ചു. വിവാഹ വാഗ്ദാനം കിട്ടിയതായിരുന്നു ധൈര്യം. വളരെ പെട്ടെന്ന് എല്ലാം കഴിഞ്ഞു. അതോടെ കാമുകൻ വാധ്യാർക്ക് മടുത്തു.

അധ്യാപികയെ പീഡിപ്പിക്കുന്ന രംഗം അവരറിയാതെ തന്നെ കാമുകൻ ക്യാമറയിൽ ചിത്രീകരിച്ചു. അത് എങ്ങനെയാണെന്ന് അധ്യാപികക്ക് അറിയില്ല. അധ്യാപിക അറിയാതെ എങ്ങനെ ചിത്രീകരിച്ചു എന്നത് ആശ്ചര്യകരമാണ്. അതുകൊണ്ടുകഴിഞ്ഞില്ല. അധ്യാപികയുടെ പേരും മേൽവിലാസവും ഫോൺ നമ്പറും സഹിതം നഗ്നദൃശ്യങ്ങൾ കാമുകൻ പ്രചരിപ്പിച്ചു എന്നാണ് അധ്യാപിക നൽകിയ പരാതിയിൽ പറയുന്നത്. തിങ്കളാഴ്ച വൈകിട്ടാണ് ദൃശ്യങ്ങൾ സാമൂഹ്യമാധ്യമത്തിൽ പോസ്റ്റ് ചെയ്തത്. വന്നപാടേ സംഗതി വൈറലായി. സംഭവം പുറത്തായ വിവരം അധ്യാപികയെ വിളിച്ചറിയിച്ചത് കുട്ടികൾ ആണെന്നത് വിധി വൈപരീത്യം.

പീഡിപ്പിച്ച ശേഷം കാമുകൻ വിദേശത്തേക്ക് കടന്നു. അജ്മനിലെ വസ്ത്രനിർമ്മാണ യൂണിറ്റിലെ മാനേജരാണ് ആരോപണവിധേയനായ യുവാവ്. ഫോൺ നമ്പർ നൽകിയതോടെ യുവതിയുടെ വാട്ട്സ്ആപ്പിലും ഫെയ്സ്ബുക്കിലും അശ്ലീല കമന്റുകൾ വന്നുനിറയുന്നു എന്നാണ് പരാതി. വിവരമറിഞ്ഞപ്പോൾ ബ്ലോക്ക് ചെയ്യാൻ പരാതി നൽകിയെങ്കിലും അതിന് മുമ്പ് ദൃശ്യങ്ങൾ കണ്ടവരാണ് യുവതിയെ രഹസ്യമായി സമീപിക്കുന്നത് രംഗത്ത് എത്തിയത്. സംഭവം കുട്ടികൾക്കിടയിൽ പാട്ടായി. ഇതോടെ പഠിപ്പിക്കാനാവാത്ത സാഹചര്യം വന്നു ചേർന്നു.

പക്ഷേ അധ്യാപികയെ സഹായിക്കാൻ പോലീസ് ഒരുക്കമല്ല. കാരണം പ്രതി വിദേശത്താണ്. ഇര പരാതി നൽകിയതിന്റെ പേരിൽ പ്രതിയെ കൊണ്ടു വരാൻ കഴിയില്ലെന്ന് പോലീസ് അറിയിച്ചു. അതിന് നിയമം അനുവദിക്കുന്നില്ല. ഇര മരിക്കുകയാണെങ്കിൽ പ്രതിയെ വിദേശത്ത് നിന്ന് എത്തിക്കാമെന്നാണ് പോലീസ് പറയുന്നത്. ഇവിടെ അധ്യാപിക ജീവനോടെ ഇരിക്കുകയാണ്. അതു കൊണ്ടു തന്നെ ഒന്നും ചെയ്യാൻ നിയമം അനുവദിക്കുന്നില്ല. എന്നെങ്കിലും അധ്യാപകൻ നാട്ടിലെത്തുമ്പോൾ നോക്കാം എന്നാണ് പോലീസിന്റെ മറുപടി. അതിൽ അധ്യാപിക തൃപ്തയല്ല. മേലുദ്യോഗസ്ഥരെ സമീപിക്കാൻ ഒരുങ്ങുകയാണ് അവർ.