മലയാള സിനിമയിലെ പല സെറ്റുകളിലും ലഹരിമരുന്നുകള്‍ വ്യാപകമായി ഉപയോഗിക്കുന്നെന്ന് നിര്‍മാതാക്കളുടെ സംഘടന സെക്രട്ടറി എം.രഞ്ജിത്ത്. ലൊക്കേഷനുകളിലും കാരവനുകളിലും പാെലീസ് പരിശോധന നടത്തണമെന്നും അദ്ദേഹം വാര്‍ത്താസമ്മേളനത്തില്‍ ആവശ്യപ്പെട്ടു. യുവതാരങ്ങളില്‍ പലരെയും കുറിച്ച് നിരവധി പരാതികളാണ് ഉയരുന്നത്. നിര്‍മാതാക്കള്‍ പരാതിയുമായി താര സംഘടനയായ അമ്മയെ സമീപിക്കുമ്പോഴാണ് ഇവരാരും അംഗങ്ങളല്ലെന്ന് അറിയുന്നത്. അമ്മയില്‍ അംഗത്വം മനപ്പൂര്‍വ്വം എടുക്കാത്തതാണ്. വ്യാപകമായി മയക്കുമരുന്നുകള്‍ ഉപയോഗിക്കുന്നുണ്ട്. സ്വബോധത്തോടെ ഒരാള്‍ക്ക് മുടിമുറിക്കാന്‍ കഴിയില്ലെന്നും രഞ്ജിത്ത് ആരോപിച്ചു.

80 ശതമാനം നഷ്ടത്തിലായ ഇന്‍ഡസ്ട്രിയെ നശിപ്പിക്കാനാണ് ചിലരുടെ ശ്രമം. പത്രങ്ങളില്‍ കഞ്ചാവും മറ്റും പിടിക്കുന്ന വാര്‍ത്തകള്‍ കാണാം. പക്ഷെ, സെലിബ്രിറ്റികള്‍ ഉപയോഗിക്കുന്നതിന് പ്രശ്‌നമില്ലേ, ഇവരെ മാറ്റിനിര്‍ത്തിക്കൊണ്ട് സാധാരണക്കാരെ മാത്രം അറസ്റ്റ് ചെയ്യുന്നത് ശരിയല്ല. മുമ്പും ഇക്കാര്യങ്ങള്‍ അറിയാമായിരുന്നെങ്കിലും ലൊക്കേഷനില്‍ ഉപയോഗം തുടങ്ങി, നിയന്ത്രിക്കാനാകാത്ത വിധം കാര്യങ്ങള്‍ വളര്‍ന്നത് കൊണ്ടാണ് പരസ്യമായി പറയേണ്ടിവന്നത്. ലൊക്കേഷനില്‍ ആര് പ്രശ്‌നമുണ്ടാക്കിയാലും നഷ്ടം നിര്‍മാതാക്കള്‍ക്കാണ്. ഈ രീതിയില്‍ സിനിമാ നിര്‍മാണവുമായി മുന്നോട്ട് പോകാനാകില്ലെന്നും നിര്‍മാതാവ് സിയാദ്‌കോക്കര്‍ പറഞ്ഞു.

എല്‍.എസ്.ഡി അടക്കമുള്ള ലഹരിവസ്തുക്കള്‍ സെറ്റുകളില്‍ ചില യുവതാരങ്ങള്‍ ഉപയോഗിക്കുന്നുണ്ടെന്ന് സിയാദ്‌കോക്കര്‍ ആരോപിച്ചു. പൊലീസ് പരിശോധിച്ച് നടപടി സ്വീകരിക്കണമെന്നും ആവശ്യപ്പെട്ടു. ചില താരങ്ങള്‍ കാരവനില്‍ നിന്ന് ഇറങ്ങാറില്ല. ലഹരിയുടെ ഉന്‍മാദ അവസ്ഥയില്‍ കഴിയുകയാണ്. എല്‍.എസ്.ഡി പോലുള്ള ലഹരിവസ്തുക്കള്‍ നിരീക്ഷണത്തില്‍ കണ്ടെത്താനാകില്ല. യുവതാരങ്ങളില്‍ പലര്‍ക്കും അച്ചടക്കമില്ലെന്നും അദ്ദേഹം ആരോപിച്ചു. ആരേയും തേജോവധം ചെയ്യാനല്ല ഇക്കാര്യം പറയുന്നതെന്നും സിയാദ് കോക്കര്‍ പറഞ്ഞു. പുതിയതലമുറ എന്ന് പറയുന്നത് ലഹരി ഉപയോഗിക്കുന്നവരെയാണ്, അല്ലാത്ത നിരവധി പേര്‍ ഉണ്ടെന്ന് പ്രസിഡന്റ് ആന്റോ ജോസഫ്് പറഞ്ഞു.

മൂന്നാല് കൊല്ലം മുമ്പ് കൊച്ചി കേന്ദ്രീകരിച്ചുള്ള ചില സിനിമാ പ്രവര്‍ത്തകര്‍ വ്യാപകമായി ലഹരിവസ്തുക്കള്‍ ഉപയോഗിക്കുന്നുണ്ടെന്ന് ആരോപണം ഉയര്‍ന്നിരുന്നു. യുവനടന്‍ ഷൈന്‍ടോം ചാക്കോയെ ലഹരി മരുന്ന് ഉപയോഗിച്ചതിന് അറസ്റ്റ് ചെയ്ത് ജയിലില്‍ അടച്ചിരുന്നു. അന്ന് യുവതാരങ്ങളില്‍ പലരും ലഹരി ഉപയോഗിക്കുന്നുണ്ടെന്ന് പരാതി ഉണ്ടായിരുന്നു. രമേശ് ചെന്നിത്തല ആഭ്യന്തരമന്ത്രിയായിരിക്കുമ്പോഴാണ് ഈ സംഭവങ്ങള്‍ നടന്നത്. സംവിധായകന്‍ ആഷിഖ് അബുവിന്റെ ഉടമസ്ഥതയിലുള്ള സ്ഥാപനത്തില്‍ പൊലീസ് പരിശോധന നടത്തിയിരുന്നു. അന്ന് വിവാദം ഉണ്ടായതോടെ പ്രശ്‌നങ്ങള്‍ തണുത്തിരുന്നു. ഒരു സംവിധായകനും നടിയായ ഭാര്യയും ബാംഗ്ലൂരിലെ സ്വകാര്യ ആശുപത്രിയിലും പ്രമുഖ യുവനടന്‍ അമേരിക്കയിലും ലഹരിവിമുക്ത ചികിത്സ തേടിയിരുന്നു. അത് ശരിവയ്ക്കുന്നതാണ് നിര്‍മാതാക്കളുടെ പ്രതികരണം.